ខេត្តស្វាយរៀងៈ លោក តូច ប៉ូលីវ៉ា អភិបាលរងខេត្ត និងជាប្រធានលេខាធិការដ្ឋាន នៃគណៈកម្មាធិការត្រួតពិនិត្យគ្រឿងញៀនខេត្ត នៅថ្ងៃទី១៩ ខែកញ្ញា ឆ្នាំ២០១៩ នេះបានអញ្ជើញជាអធិបតក្នុងកិច្ចប្រជុំផ្សព្វផ្សាយស្ដីពី ”យុទ្ធនាការបង្ការ ទប់ស្កាត់ និងបង្រ្កាបបទល្មើសគ្រឿងញៀនតាមបណ្ដោយព្រំដែន និងកិច្ចប្រជុំផ្សព្វផ្សាយស្ដីពីការបង្កើតភូមិ ឃុំ/សង្កាត់ ស នៅតាមព្រំដែន (កម្ពុជា-វៀតណាម)“ នាសាលប្រជុំវរសេនាតូចនគរបាលព្រំដែនគោក៦១១ (ព្រំដែនខាងជើង) ។
លោកអភិបាលរងខេត្តក៏បានផ្តល់អនុសាសន៍មួយចំនួនដូចជា ទី១.សូមបងប្អូនប្រជាពលរដ្ឋទាំងអស់ស្វែងយល់ ឱ្យបានច្បាស់អំពីគ្រឿងញៀន ហើយត្រូវចាត់ទុកថាបញ្ហាគ្រឿងញៀន គឺជាបញ្ហារបស់យើងទាំងអស់គ្នា ពីព្រោះក្នុងពេល ដែលក្រុមគ្រួសារអ្នកដទៃ កំពុងប្រឈមជាមួយនឹងបញ្ហានេះ ក្រុមគ្រួសាររបស់យើងក៏អាច បាននិងកំពុងជួបប្រទះនឹងបញ្ហាដូចគ្នានេះដែរ។ ម្យ៉ាងទៀតមិនត្រូវឆ្លៀត ឱកាសកេងប្រវ័ញ្ចយកផលចំណេញពីសកម្មភាពប្រើប្រាស់ ជួញដូរគ្រឿងញៀនដូចជា ជួលបន្ទប់ ជួលទីតាំង ឬទទួលផ្ញើម៉ូតូ ឬមធ្យោបាយផ្សេងៗ ។ ទី២.ចំពោះមាតាបិតា ត្រូវពង្រឹងការទទួលខុសត្រូវថែមទៀត ក្នុងការអប់រំ ណែនាំ ថែទាំ និងត្រួតពិនិត្យឱ្យបានជាប្រចាំ ដើម្បីឱ្យកូនចៅចៀសឆ្ងាយពីគ្រឿងញៀន។ ក្នុងនោះ ត្រូវចេះស្វែងយល់ពីកូនចៅ ដោយត្រូវធ្វើការស្តាប់ សង្កេត និងការផ្លាស់ប្តូរឥរិយាបទរបស់កូនចៅ ។ ទី៣.គណ:កម្មាធិការត្រួតពិនិត្យគ្រឿងញៀនក្រុង ស្រុកត្រូវតែរៀបចំ និងពង្រឹង យន្តការសម្រាប់ការងារប្រយុទ្ធប្រឆាំងគ្រឿងញៀន ឲ្យសមស្របតាមតួនាទី ពាក់ព័ន្ធ និងការទទួលខុសត្រូវរបស់ខ្លួន ដើម្បីឲ្យការអនុវត្តផែនការសកម្មភាពយុទ្ធនាការ ប្រយុទ្ធ ប្រឆាំងគ្រឿង ញៀនខុសច្បាប់ លើកទី៤ ឲ្យបានល្អប្រសើរ ។ ទី៤.គណ:កម្មាធិការត្រួតពិនិត្យគ្រឿងញៀនក្រុង ស្រុក ត្រូវយកចិត្តទុកដាក់អនុវត្តន៍ឲ្យមានប្រសិទ្ធភាពនូវបទបញ្ជាលេខ ០១ ស្តីពីការពង្រឹងវិធានការ ប្រយុទ្ធប្រឆាំងគ្រឿងញៀន និងគោលនយោបាយភូមិ ឃុំមានសុវត្ថិភាព និងគោលនយោបាយភូមិ ឃុំ សង្កាត់ ស គ្មានគ្រឿងញៀន ព្រមទាំងផែនការ និងវិធានការផ្សេងៗទៀតរបស់រាជរដ្ឋាភិបាល ដោយត្រូវរៀបចំឲ្យមានយន្តការច្បាស់លាល់ពីថ្នាក់ខេត្ត ក្រុង ស្រុក ឃុំ សង្កាត់ និងផែនការ សកម្មភាពប្រចាំឆមាស និងឆ្នាំច្បាស់លាស់ ហើយធ្វើការអនុវត្តឲ្យបានជាប្រចាំ ដើម្បីឲ្យការ ទប់ស្កាត់ការរីករាលដាល នៃបញ្ហាគ្រឿងញៀនទៅដល់មូលដ្ឋាន និងទីជនបទ កាន់តែមាន ប្រសិទ្ធភាព ៕ ដោយ៖ វ៉ៃកូ