បាត់ដំបង៖ លោកជួប ណូ មេបញ្ជាការមូលដ្ឋានកងរាជអាវុធហត្ថស្រុកសំឡូត រងការចោទប្រកាន់ថា បានប្រើប្រាស់វត្ថុរឹង ចាក់ភ្នែកមេបញ្ជាការរង ឈឿង សុផាត បណ្ដាលឱ្យរងបួសយ៉ាងធ្ងន់ធ្ងរ ដោយសាររឿងបាត់ឌីណាម៉ូរថយន្តបាកុង ។
ពាក់ព័ន្ធករណីនេះឧត្តមសេនីយ៍ត្រី អេង ហ៊ី បានថ្លែងបកស្រាយជូនសាធារណជននៅលើបណ្តាញសង្គមហ្វេសប៊ុកផ្លូវការថា ” ថ្ងៃទី២០ ខែកញ្ញា ឆ្នាំ២០១៩ ខ្ញុំបាទឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស សូមជម្រាបជូនសាធារណជនជ្រាប អំពីព័ត៌មានលើករណីជម្លោះរវាងមេបញ្ជាការ និងមេបញ្ជាការរងមូលដ្ឋានកងរាជអាវុធហត្ថស្រុកសំឡូត ខេត្តបាត់ដំបង”។
លោកអ្នកនាំពាក្យបានបន្ថែមថា “ដំណើររឿង គឺមិនពិតដូចសារព័ត៌មានមួយចំនួន បានផ្សព្វផ្សាយកន្លងទៅនោះទេ។”
យោងតាមការរាយការណ៍របស់លោកឧត្តមសេនីយ៍ត្រី មាស សុវណ្ណ មេបញ្ជាការខេត្តបាត់ដំបង គឹរឿងនេះកើតឡើងដោយសារលោកអនុសេនីយ៍ឯក ឈឿង សុផាត បានប្រព្រឹត្តឱ្យមានកំហុស និងល្មើសវិន័យកងទ័ព ហើយលោកវរសេនីយ៍ត្រី ជួប ណូ បានសួរនាំអំពីកំហុសនោះ បែរជាលោកអនុសេនីយ៍ឯក ឈឿង សុផាត ចូលទៅវាយលោកវរសេនីយ៍ត្រី ជួប ណូ ខណៈនោះលោកអនុសេនីយ៍ឯក ឈឿង សុផាត ស្រវឹងស្រាផងដែរ។ ចំពោះរបួសនោះ មិនមែនលោកវរសេនីយ៍ត្រី ជួប ណូ យកសោរចាក់ភ្នែកទេ គឺមានសាក្សីឃើញពេលវាយតបនោះ។
លោកអេង ហ៊ី បានបញ្ជាក់ថា “រឿងនេះក៏មានការសម្របសម្រួល តាំងពីពេលកើតហេតុភ្លាមៗ ព្រោះជារឿងផ្ទៃក្នុង។ សូមទោសការណ៍ដែលខ្ញុំបាទ មិនបានបកស្រាយជូនភ្លាមៗអំពីរឿងនេះ ដោយសារជារឿងផ្ទៃក្នុងអង្គភាពទ័ព។ បើករណីធ្ងន់ធ្ងរយើងនឹងអនុវត្តន៍តាមច្បាប់ហើយ”។
ទោះយ៉ាងណា លោកនាយឧត្តមសេនីយ៍ មេបញ្ជាការកងរាជអាវុធហត្ថលើផ្ទៃប្រទស បានបញ្ជាឱ្យមានការត្រួតពិនិត្យហ្មត់ចត់ចំពោះករណីនេះ ដើម្បីបង្ហាញការពិតអ្នកដែលប្រព្រឹត្តនូវកំហុសឆ្គង ត្រូវទទួលទណ្ឌកម្មវិន័យកងទ័ព។ សូមសាធារណជនមេត្តាជ្រាបជាព័ត៌មាន។
សូមបញ្ជាក់ថា បើតាមប្រភពព័ត៌មានពីអំពើហិង្សា ដែលបង្កឡើងដោយមេបញ្ជាការមូលដ្ឋានកងរាជអាវុធហត្ថស្រុកសំឡូត ឈ្មោះជួប ណូ នេះបានកើតឡើងកាលពីយប់ថ្ងៃទី១៣ កញ្ញា នៅក្នុងអង្គភាពរបស់ខ្លួនតែម្ដង ។ លោកជួប ណូ បានរងការប្ដឹងចោទប្រកាន់ថា ទំនងបានប្រើប្រាស់សោរថយន្តរបស់ខ្លួនចាក់ទៅលើភ្នែកខាងឆ្វេងមេបញ្ជាការរងរបស់ខ្លួនឈ្មោះឈឿន សុផាត បណ្ដាលឲ្យរងរបួសយ៉ាងធ្ងន់ធ្ងរ ក្រោយពីផ្ទុះជម្លោះជាមួយគ្នារឿងបាត់ឌីណាម៉ូរថយន្តបាកុង ដែលរឹបអូសបានពីបទល្មើសព្រៃឈើកន្លងទៅនេះ ។
មន្ត្រីកងរាជអាវុធហត្ថបាននិយាយថា នៅយប់កើតហេតុនោះ លោកជួប ណូ បានចោទលោកឈឿង
សុផាត ថា បានលួចយកឌីណាម៉ូរថយន្តបាកុង ក្នុងអំឡុងពេលលោកឈឿន សុផាត រួមជាមួយមន្ត្រីក្នុងអង្គភាពប៉ុន្មាននាក់ទៀត ត្រូវទទួលបទបញ្ជាឲ្យដេកយាមរថយន្តបាកុងចំនួន១០គ្រឿង ដែលរឹបអូសពីបទល្មើសព្រៃឈើ ។ ប៉ុន្តែលោកឈឿន សុផាត បានបដិសេធចំពោះការចោទប្រកាន់នេះ ។ ប្រភពបានឲ្យដឹងទៀតថា លោកមេបញ្ជាការរូបនេះអះអាងថា ខ្លួនមានសាក្សីទៀតផង តែមិនបានបង្ហាញទេ ខណ:លោកមេបញ្ជាការរង (ជនរងគ្រោះ) បានទាមទារឲ្យបង្ហាញ ហើយថែមទាំងបបួលគ្នាស្បថស្បែរទៀតផង។
បើតាមមន្ត្រីក្រោមឱវាទបានបញ្ជាក់ថា ជម្លោះរវាងលោកមេបញ្ជាការ និងលោកមេបញ្ជាការរង ដែលនៅក្នុងអង្គភាពជាមួយគ្នានេះ ហាក់ប្រឈមមុខគ្នាយ៉ាងខ្លាំងផ្អើលពេញអង្គភាព តែបានស្ងប់ស្ងាត់ ក្រោយពីតឹងសរសៃកដាក់គ្នាជិតកន្លះម៉ោង ។ ប៉ុន្តែនៅយប់ជ្រៅបន្តិច ខណ:ដែលលោកឈឿន សុផាត កំពុងដេកលក់ ស្រាប់តែលោកជួប ណូ មិនដឹងមកពីណា ហើយទំនងជាស្រវឹងផង ក៏ដើរទៅចាក់ភ្នែកលោកឈឿន សុផាត បង្កឲ្យមានការភ្ញាក់ផ្អើលជាថ្មីពេញអង្គភាពតែម្ដង៕ដោយ៖បញ្ញាស័ក្តិ
