ភ្នំពេញ៖ ឧទ្យានស្ថានទូតបារាំងប្រចាំកម្ពុជា បើកស្វាគមន៍សាធារណជនចូលទស្សនា ក្នុងឱកាសទិវាបេតិកភណ្ឌ។ ក្នុងរយ:ពេលពេញមួយថ្ងៃ រួមទាំងថ្ងៃត្រង់ពីម៉ោង១២ដល់ម៉ោង២រសៀលផង លោកអ្នកអាចចូលដើរកម្សាន្តនៅក្នុងឧទ្យានដោយសេរី។ លោកអ្នកអាចអញ្ជើញមកម្នាក់ឯងក៏បាន ជាមួយមិត្តភក្តិ ឬជាមួយក្រុមគ្រួសារ ដើម្បីរីករាយក្នុង “ដំណើរកម្សាន្តតាមព្រៃព្រឹក្សា” ដែលជាប្រធានបទនៃទិវាបេតិកភណ្ឌនៅឆ្នាំនេះ។
មិនបាច់ចុះឈ្មោះជាមុននោះទេ ចូលទស្សនាដោយសេរី ប៉ុន្តែហាមយកចំណីអាហារ ភេសជ្ជៈ និងកាបូបធំៗចូល ។
បើតាមការផ្សព្វផ្សាយព័ត៌មានរបស់ស្ថានទូតបារាំងប្រចាំកម្ពុជា បានឲ្យដឹងថា “នៅព្រឹកថ្ងៃសៅរ៍ ទី២១កញ្ញានេះ ស្ថានទូតបារាំង ប្រចាំព្រះរាជាណាចក្រកម្ពុជា បានបើកទ្វារស្វាគមន៍សាធារណជនចូលទស្សនានៅក្នុងឱកាសនៃទិវាបេតិកភណ្ឌ ។ សូមប្រញាប់អញ្ជើញមកទស្សនាព្រៃព្រឹក្សា និងស្នាដៃសិល្ប:ផ្សេងៗនៅក្នុងឧទ្យានស្ថានទូត (ចូលដោយសេរីពេញមួយថ្ងៃរហូតដល់ម៉ោង៤រសៀល)។ បើលោកអ្នកបានអញ្ជើញមក សូមកុំភ្លេចរកមើលរូបសត្វ និងវត្ថុសិល្ប:ផលិតពីច្រវ៉ាក់របស់លោក អ៊ូ វណ្ណឌី “។
សួនឧទ្យានស្ថានទូតបារាំង បើកទ្វារជូនមហាជនទស្សនាដោយសេរី ចាប់ពីម៉ោង៨ព្រឹកដល់ម៉ោង៤ល្ងាច ក្នុងឱកាសទិវាបេតិកភណ្ឌ។ សូមអញ្ជើញលោកអ្នកចូលរួម “ដំណើរកម្សាន្តតាមព្រៃព្រឹក្សា” ដើម្បីគយគន់សម្រស់ធម្មជាតិនៃឧទ្យានស្ថានទូតដែលមាន៖ ដើមឈើជាង២០០ដើម ត្រូវជាជាង៥០ប្រភេទ រួមទាំងដើមឈើទើបដាំថ្មីៗ៥០ដើមទៀតដែលជាអំណោយរបស់ក្រសួងបរិស្ថាន។ ស្លាកពន្យល់ត្រូវបានធ្វើឡើងដើម្បីបង្ហាញអំពីដើមឈើគួរឱ្យគត់សម្គាល់មួយចំនួន។ លោកអ្នកក៏អាចទស្សនាស្នាដៃគំនូររុក្ខជាតិ នៅលើជញ្ជាំងស្ថានទូតរបស់សិល្បករបារាំងនូប្លាផងដែរ៕ ដោយ៖កូឡាប