ភ្នំពេញ៖ ក្រសួងអភិវឌ្ឍន៍ជនបទ និងផ្នែកពាក់ព័ន្ធរួមគ្នា បើកយុទ្ធនាការអប់រំ ស្តីពីសុវត្ថិភាពចរាចរណ៍ដល់ប្រជាពលរដ្ឋ បានយល់ដឹង និងជំរុញលើកកម្ពស់ការគោរពច្បាប់ចរាចរណ៍ផ្លូវគោក និងបន្តផ្សព្វព្ផ្សាយដល់សមាជិកគ្រួសារ កូនចៅ មិត្តភក្តិ អ្នកភូមិ និងសិស្សសាលាតាមដងផ្លូវឲ្យមានការប្រុងប្រយ័ត្នខ្ពស់ ដើម្បីបញ្ចៀសខ្លួនពីគ្រោះថ្នាក់ចរាចរទាំងអស់គ្នា នៅក្នុងអំឡុងពេលថ្ងៃបុណ្យភ្ជុំបិណ្ឌ។
លោក គង់ សុវណ្ណ ទីប្រឹក្សា សុវត្ថិភាពចរាចរណ៍ នៃគម្រោងកែលម្អផ្លូវជនបទជំហានទី២ នៃក្រសួងអភិវឌ្ឍន៍ជន បទបានបញ្ជាក់ឲ្យដឹងកាលពីថ្ងៃទី២២ កញ្ញា ឆ្នាំ២០១៩ថា ការលើកកម្ពស់ ការបើកបរដោយសុវត្ថិភាពជូន ដល់ប្រជាពលរដ្ឋនៅតាមជនបទ និងបណ្តាខេត្តនេះ ក្រសួងតែងតែ ធ្វើឡើងនៅមុនអំឡុងពេលបុណ្យភ្ជុំបិណ្ឌជាងរៀងឆ្នាំ។ដូច្នេះ ដើម្បី រួមចំណែកទប់ស្កាត់គ្រោះថ្នាក់ចរាចរ ដល់អ្នកធ្វើដំណើរ ក្រសួង និងដៃគូផ្នែកចរាចរណ៍ តែងតែចុះយុទ្ធនាការអប់រំផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោក នៅមុនអំឡុងពេលបុណ្យភ្ជុំបិណ្ឌជាងរៀងឆ្នាំ។ លោកបន្តថា ចំពោះសកម្មភាពសំខាន់ៗនៅក្នុងយុទ្ធនាការ រួមមាន ការបង្ហាញសារអប់រំអំពីចរាចរណ៍តាមរយៈបដាលើដងផ្លូវ ការបិទប៉ុស្ទ័រ ការចែកខិត្តប័ណ្ណ អប់រំដល់ប្រជាពលរដ្ឋក្នុងសហគមន៍ ការផ្សាយសារអប់រក្រើនរំលឹកតាមឧគ្ឃោសនសព្ទ ដោយក្បួនរ៉ឺម៉កម៉ូតូកង់បី ពិសេសនៅទីប្រជុំជនក្នុងសហគមន៍ មានផ្សព្វផ្សាយផ្ទាល់មាត់ដល់ប្រជាពលរដ្ឋ អំពីវិធានសុវត្ថិភាព ដែលអាចយកទៅអនុវត្តន៍ ដើម្បី គ្រប់គ្នាមានសុវត្ថិភាព និងជៀសផុតអំពីគ្រោះថ្នាក់ចរាចរបាន។
លោក បានបន្តថា បច្ចុប្បន្ននៅតាមដងផ្លូវជនបទ ដែលកំពុងនឹងបានកសាងនោះ ក្រសួង តាមរយៈការគាំទ្រជំនួយបច្ចេកទេស និងថវិកា ពីដៃគូអភិវឌ្ឍន៍ មានធនាគារអភិវឌ្ឍន៍អាស៊ី ទីភ្នាក់ងារអភិវឌ្ឍន៍បារាំង និងអូស្ត្រាលី បានរៀបចំកម្មវិធីអប់រំផ្សព្វផ្សាយ អំពីសុវត្ថិភាពចរាចរណ៍ផ្លូវគោកជូនដល់ប្រជាពលរដ្ឋ និងសិស្សសាលាក្នុងតំបន់នៃគម្រោងកែលម្អផ្លូវជនបទ ទាំង១០ខេត្ត ដែលមានខេត្តកំពង់ចាម ត្បូងឃ្មុំ តាកែវ កំពង់ស្ពឺ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងកំពង់ធំ។
លោកថា ការរៀបចំកម្មវិធីអប់រំ ផ្សព្វផ្សាយសុវត្ថិភាពចរាចរណ៍ផ្លូវគោក ជូនបងប្អូននេះ ដោយផ្តោតលើកត្តាហានិភ័យនានា សំដៅធ្វើយ៉ាងណាចូលរួមទប់ស្កាត់ និងកាត់បន្ថយគ្រោះថ្នាក់ចរាចរ ដល់អ្នកប្រើប្រាស់ផ្លូវគ្រប់រូប តាមរយៈការជំរុញឲ្យមានការផ្លាស់ប្ដូរឥរិយាបថ ក្នុងការធ្វើដំណើរ ឲ្យបានត្រឹមត្រូវចេះគោរពច្បាប់ និងមានសុវត្ថិភាព។ ពិសេស ពេលបើកបរកុំទទួលទានគ្រឿងស្រវឹង មិនបើកហួសល្បឿនកំណត់ និងពាក់មួកសុវត្ថិភាពជាដើម។
គួររំលឹកថាៈ ក្នុងអំឡុងពេបុណ្យភ្ជុំបិណ្ឌឆ្នាំ២០១៧កន្លងទៅ មានមនុស្សស្លាប់ប្រមាណ៨នាក់ និងរបួសធ្ងន់១៩នាក់ ក្នុង១ថ្ងៃ។ ដោយឡែក តាមរបាយការណ៍ ការិយាល័យនគរបាលចរាចរណ៍ នៃអគ្គស្នងកានគរបាលជាតិ បានបង្ហាញថា ក្នុងរយៈពេល៦ខែ ដើមឆ្នាំ២០១៩នេះ គ្រោះថ្នាក់ចរាចរកើតឡើង២១៧១លើក បណ្តាលឲ្យមានអ្នកស្លាប់ចំនួន១០៣៣នាក់ និងរបួសចំនួន៣២២៤នាក់។ មូលហេតុដែលបង្កឲ្យមានគ្រោះថ្នាក់ គឺបណ្តាលមកអំពីបើកបរល្មើសល្បឿនកំណត់ ៣៧% មិនគោរពសិទ្ធិអទិភាព ២៤%មិនប្រកាន់ស្តាំ ១២%វ៉ាជែង ៩%បត់ ៨% ស្រវឹង ៦%និងកត្តាយានយន្ត ៣% ។
សូមបញ្ជាក់ថា៖ កម្មវិធីសុវត្ថិភាពចរាចរណ៍សហគមន៍ នៃគម្រោងកែលម្អផ្លូវជនបទជំហាន២នេះ គឺជាការចូលរួមចំណែកដ៏ធំធេង និងស្របតាមផែនការជាតិសុវត្ថិភាពចរាចរណ៍ផ្លូវគោក ឆ្នាំ២០១១-២០២០ របស់រាជរដ្ឋាភិបាលកម្ពុជា ក្នុងទិសដៅកាត់បន្ថយចំនួនអ្នកស្លាប់ឲ្យបាន៥០% ត្រឹមឆ្នាំ២០២០ ខាងមុខ៕ ដោយ៖ កូឡាប
