បុរសម្នាក់មកពីរដ្ឋ Louisiana សហរដ្ឋអាមេរិច បានលង់ទឹកស្លាប់ បន្ទាប់ពីគាត់បានស្នើសុំមិត្តស្រីរៀបការនៅក្រោមទឹក ខណៈពួកគេកំពុងដើរលំហែរកាយនៅក្នុងប្រទេសតង់ហ្សានី។ នេះបើតាមការចេញផ្សាយរបស់ CNN នៅថ្ងៃអាទិត្យម្សិលមិញនេះ។
លោក Steven Weber និងមិត្តស្រីរបស់គាត់ឈ្មោះ Kenesha Antoineបានស្នាក់នៅលំហែរកាយនៅលើកោះ Pemba នៅក្នុងផ្ទះឈើតូចមួយដែលមានបន្ទប់គេងលិចនៅក្រោមផ្ទៃមហាសមុទ្រ នៅឆ្នេរសមុទ្រខាងកើត នៃទ្វីបអាហ្រិ្វច។
លោក Steven Weber បានស្នើសុំមិត្តស្រីរបស់គាត់រៀបការនៅថ្ងៃព្រហស្បតិ៍ ដោយគាត់បានមុជទឹក និងបានកាន់កំណត់ហេតុដែលគាត់បានសរសេរដាក់នៅបង្អួច នៃបន្ទប់គេងរបស់ពួកគេ មុនពេលគាត់បានបង្ហាញចិញ្ជៀនសុំរៀបការ។
លិខិតដែលគាត់សរសេរនោះមានអត្ថន័យថា “ខ្ញុំមិនអាចទប់ដង្ហើមបានឡើយ ក្នុងការនិយាយប្រាប់អ្នកនូវអ្វីៗគ្រប់យ៉ាង ដែលខ្ញុំស្រឡាញ់អំពីអ្នក”។
លិខិតបន្តទៀតថា ”តើអ្នកនឹងរៀបការធ្វើជាប្រពន្ធរបស់ខ្ញុំទេ?”
បន្ទាប់ពីគាត់មុខទឹកយ៉ាងជ្រៅ ដើម្បីបិទសំបុត្រស្នេហានៅបង្អួចបន្ទប់គេងពួកគេ លោក Steven Weber បានលក់ទឹកស្លាប់ ដោយសារតែជម្រៅទឹកដ៏ជ្រៅ។
មិត្តស្រីរបស់គាត់បានបង្ហោះនៅក្នុងហ្វេសបុកថា “អ្នកមិនទាន់ងើបចេញពីជម្រៅទឹក ដូច្នេះអ្នកនឹងមិនឮពីចម្លើយរបស់ខ្ញុំនោះទេ។ ខ្ញុំនិយាយថា យល់ព្រម យល់ព្រម ជាច្រើនដង។ ខ្ញុំយល់ព្រមរៀបការជាមួយអ្នក”។
ក្រោយពីមានហេតុការណ៍នោះ ឧទ្យាន Manta កន្លែងដែលគូស្នេហ៍ទាំងពីរស្នាក់នៅ បានចេញសេចក្តីប្រកាសបញ្ជាក់ពីការស្លាប់របស់បុរសខាងលើ។
អាជ្ញាធរកំពុងធ្វើការស៊ើបអង្កេតពីករណីស្លាប់នោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN