ឆ្មាំសមុទ្រឥណ្ឌាបានធ្វើការឃាត់ខ្លួនបុរសជនជាតិមីយ៉ាម៉ាចំនួន ៦នាក់ និងរឹបអូសបានគ្រឿងញៀនដែលមានតម្លៃប្រមាណ ៤២លានដុល្លារ ក្រោយពេលពួកគេបានប្រទះឃើញទូកមួយគ្រឿងគួរឲ្យសង្ស័យនៅមហាសមុទ្រឥណ្ឌា។
ការរឹបអូសគ្រឿងញៀនទម្ងន់ ១.១៦០គីឡូក្រាមកើតឡើង ក្រោយពេលយន្តហោះល្បាតសមុទ្រ របស់ឥណ្ឌា បានប្រទះឃើញទូកមួយគ្រឿង ដែលបានបិទភ្លើង នៅថ្ងៃពុធកន្លងទៅនេះ នៅតំបន់សេដ្ឋកិច្ចផ្តាច់មុខរបស់ឥណ្ឌា។ នេះបើតាមការបញ្ជាក់របស់ក្រសួងការពារជាតិឥណ្ឌា ថ្លែងនៅក្នុងសេចក្តីប្រកាស។
អ្នកនៅលើទូកសង្ស័យនោះ មិនបានធ្វើការឆ្លើយតបចំពោះការតេតាមវិទ្យុ ហើយទីបំផុតឆ្មាំសមុត្រឥណ្ឌា ក៏បានសម្រេចចិត្តឡើងលើទូកនោះ ហើយក៏បានរកឃើញសារធាតុសង្ស័យជាច្រើន។
ក្រសួងការពារជាតិឥណ្ឌាបញ្ជាក់ថា “បើតាមការវិភាគបឋមបានបង្ហាញថា សារធាតុគួរឲ្យសង្ស័យនោះ គឺជាគ្រឿងញៀនប្រភេទកេតាមីន (ketamine) ហើយត្រូវបានគេខ្ចប់ជាច្រើនថង់ដាក់នៅលើទូក”។
បុរសជនជាតិមីយ៉ានម៉ាទាំង ៦នាក់ ព្រមទាំងគ្រឿងញៀនទាំងនោះ ត្រូវបានឆ្មាំសមុទ្រឥណ្ឌាបញ្ជូនទៅកាន់កំពុងផែ Blair៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
