កំពង់ធំ៖ អយ្យការអមសាលាដំបូងខេត្តកំពង់ធំ កាលពីថ្ងៃទី២៣ខែកញ្ញានេះ បានឲ្យដឹងថា អយ្យការអមសាលាដំបូងខេត្តកំពង់ធំ បានសម្រេចប្រគល់សត្វព្រៃជាច្រើនប្រភេទជាង២០០គីឡូក្រាម ដែលរឹបអូសបានពីរថយន្តដឹកអ្នកដំណើរក្រុមហ៊ុនមួយ ជូនមន្រ្តីរដ្ឋបាលព្រៃឈើរាជធានីភ្នំពេញ ដើម្បីយកសត្វព្រៃដែលជាធនធានដ៏កម្រកទាំងនោះ យកទៅលែងនៅបឹងទន្លេសាប ឱ្យមានសេរីភាព។
សូមបញ្ជាក់ថា កាលពីថ្ងៃទី២២ ខែកញ្ញា ឆ្នាំ២០១៩ នៅវេលាម៉ោង៩ និង៣០នាទី សមត្ថកិច្ចសង្កាត់រដ្ឋបាលព្រៃឈើស្ទោង រួមជាមួយផ្នែករដ្ឋបាលព្រៃឈើស្ទោង និងអធិការរដ្ឋានរដ្ឋបាលព្រៃឈើខាងជើងបឹងទន្លេសាប សហការជាមួយស្នងការរដ្ឋាននគរបាលខេត្តកំពង់ធំ ដឹកនាំដោយលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ បានចុះបង្ក្រាបការដឹកជញ្ជូនពាណិជ្ជកម្មសត្វព្រៃរស់ មានសត្វពស់ចាន់ល្មម ចំនួន៨២ក្បាល ទម្ងន់៤៥គីឡូក្រាម, អណ្ដើត ចំនួន២៨ក្បាល ទម្ងន់១៧៩គីឡូក្រាម ,ទន្សងរស់ចំនួន៤ក្បាល ។ ក្រោយពីធ្វើការដកហូតវត្ថុតាងរួមមានសត្វព្រៃខាងលើរួចមក នៅថ្ងៃទី២៣ ខែកញ្ញា ឆ្នាំ២០១៩វេលាម៉ោង៩ព្រឹក អយ្យការអមសាលាដំបូងខេត្តកំពង់ធំ បានសម្រេចប្រគល់ជូនមន្រ្តីរដ្ឋបាលព្រៃឈើរាជធានីភ្នំពេញ ដើម្បីយកសត្វព្រៃដែលជាធនធានដ៏កម្រកទាំងនោះ យកទៅលែងនៅបឹងទន្លេសាបឱ្យមានសេរីភាពវិញ៕ ដោយ៖កូឡាប
