ខេត្តស្វាយរៀង: លោក រស់ ផារិទ្ធ អភិបាលរង ខេត្តស្វាយរៀង តំណាងលោក ម៉ែន វិបុល អភិបាលខេត្ត ព្រមទាំងមានការអញ្ជើញចូលរួម ពីតំណាងក្រសួងមហាផ្ទៃ លោកនាយរដ្ឋបាលសាលាខេត្ត លោកនាយកទីចាត់ការសាលាខេត្ត ព្រមទាំងមន្ត្រីរាជការពាក់ព័ន្ធមួយចំនួនទៀត នាព្រឹកថ្ងៃទី២២ ខែកញ្ញា ឆ្នាំ២០១៩នេះ បានអញ្ជើញជាអធិបតីនៅក្នុងពិធីការបើកវិញ្ញាសា នៃការប្រឡងជ្រើសរើសបេក្ខជនបញ្ចូលក្នុងក្របខ័ណ្ឌមន្ត្រីរាជការស៊ីវិល ក្រសួងមហាផ្ទៃ និងដំណើរការនៃការប្រឡង។
មានប្រសាសន៍ក្នុងឱកាសនោះ លោក រស់ ផារិទ្ធ អភិបាលរងខេត្ត បានលើកទឹកចិត្តដល់បេក្ខជនទាំងអស់ ត្រូវខិតខំប្រឹងប្រែងឲ្យអស់ពីសមត្ថភាព ធ្វើឲ្យបានរួចរាល់ លើគ្រប់វិញ្ញាសាដែលបានដាក់ក្នុងការប្រឡង គោរពឲ្យបានខ្ជាប់ខ្ជួននូវបទប្បញ្ញត្តិ និងបទបញ្ជាផ្ទៃក្នុងនៃការប្រឡង ដោយមិនត្រូវលួចចម្លងគ្នា មើលគ្នា ពិភាក្សាគ្នា មិនត្រូវគូសសញ្ញាសម្គាល់លើក្រដាសវិញ្ញាសា និងលួចលាក់ប្រើប្រាស់ឧបករណ៍អេឡិចត្រូនិចនោះឡើយ ហើយលោកក៏បានជូនពរឲ្យបេក្ខជនប្រឡងជាប់គ្រប់ៗគ្នា ។
សូមបញ្ជាក់ផងដែរថា ការប្រឡងនេះមានរយៈពេលមួយព្រឹក ហើយវិញ្ញាសាក្នុងការប្រឡងក្របខ័ណ្ឌមន្ត្រីរាជការស៊ីវិលនេះមាន៖ ១- ក្របខ័ណ្ឌមន្ត្រីរដ្ឋបាលជាន់ខ្ពស់និងក្របខ័ណ្ឌមន្ត្រីក្រមការ គឺ ជំនាញឯកទេស និង ភាសារអង់គ្លេស។ ២-លេខាធិការដ្ឋបាល គឺ ចំណេះដឹងទូទៅ ចំណេះដឹងកិច្ចការរដ្ឋបាល គណិតវិទ្យា តែងសេចក្ដី ឬការសរសេរលិខិតរដ្ឋបាល។ ៣-ស្មៀនឃុំសង្កាត់ គឺ ចំណេះដឹងទូទៅ ចំណេះដឹងកិច្ចការរដ្ឋបាលឃុំសង្កាត់ តែងសេចក្ដី ឬការសរសេរលិខិតរដ្ឋបាល ។ បេក្ខជនប្រឡងមានចំនួន២១៣ នាក់៕ ដោយ៖វ៉ៃកូ
