កាហ្សាក់ស្ថាន៖សមាជិគណៈប្រតិភូជាន់ខ្ពស់រដ្ឋសភាកម្ពុជាមាន លោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា និងលោក ជា វ៉ាន់ដេត ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា បានអញ្ជើញចូលរួមកិច្ចប្រជុំពិនិត្យសេចក្តីថ្លែងការណ៍ លទ្ធផលនៃកិច្ចប្រជុំកម្រិតប្រធានសភាអាស៊ី-អឺរ៉ុប លើកទី៤ នារសៀលថ្ងៃទី២៣ ខែកញ្ញា ឆ្នាំ២០១៩ នៅសាធារណរដ្ឋកាហ្សាក់ស្ថាន។
រដ្ឋសភាប្រទេសកាហ្សាក់ស្ថានដែលធ្វើជាម្ចាស់ផ្ទះកិច្ចប្រជុំ កម្រិតប្រធានសភាអាស៊ី-អឺរ៉ុប លើកទី៤ ពីថ្ងៃទី២៣ដល់ថ្ងៃទី២៥ ខែកញ្ញា ឆ្នាំ២០១៩ ដោយមានប្រតិភូថ្នាក់ដឹកនាំសភាក្នុងតំបន់ទាំងពីរ ប្រមាណ៦០ប្រទេសចូលរួម ព្រមទាំងមានវត្តមាន អង្គការអន្តរជាតិ និងអន្តរសភាជាច្រើនទៀត។ នៅចុងបញ្ចប់ កិច្ចប្រជុំនឹងមានចេញសេចក្តីថ្លែងការណ៍បង្ហាញពីលទ្ធផលនៃកិច្ចប្រជុំ។
សូមជម្រាបថា ប្រជុំកម្រិតប្រធានសភាអាស៊ី-អឺរ៉ុប បានផ្តួចផ្តើមបង្កើតឡើងដោយសភាឌូម៉ាសហព័ន្ធរុស្ស៊ី និងរដ្ឋសភាសាធារណរដ្ឋកូរ៉េ គឺជាវេទិកាអន្តរសភាដ៏មានសារសំខាន់ ដែលថ្នាក់ដឹកនាំសភាទាំងពីរតំបន់ជួបពិភាក្សាលើប្រធានបទសំខាន់ៗ ក្នុងការដោះស្រាយបញ្ហារួម។ បង្កើនកិច្ចសហប្រតិបត្តិការរវាងតំណាងប្រជាពលរដ្ឋក្នុងតំបន់អាស៊ី និងអឺរ៉ុប។ ផ្លាស់ប្តូរទស្សនៈយោបល់ ក្នុងការការពារផលប្រយោជន៍នៃការអភិវឌ្ឍប្រកបដោយចីរភាព និងសុខុមាលភាពសង្គមនៅក្នុងតំបន់ ក៏ដូចជាពិភពលោកទាំងមូល៕ ដោយ ៖ កូឡាប
