ខេត្តបាត់ដំបង៖ តាមប្រភពពីមន្ត្រីសាលាខេត្តបាត់ដំបងម្នាក់ស្និទ្ធនឹងអ្នកកាសែត បានបង្ហើបឱ្យដឹងថា លោកអភិបាលខេត្តបាត់ដំបង ងួន រតនៈ ពាក់ព័ន្ធទៅនិងការតែងតាំងភរិយារបស់ខ្លួនឈ្មោះហុង ផានី ជាអនុប្រធានមន្ទីរសុខាភិបាល ខេត្តបាត់ដំបងនិងសាច់ញាតិជាច្រើនរូប កាន់តំណែងសំខាន់ៗ ដោយមានភាពមិនប្រក្រតី ។
រាយនាមដូចខាងក្រោម៖
ទី១/ភរិយារបស់អភិបាលខេត្តបាត់ដំបងឈ្មោះ ហុង ផានី ជាអនុប្រធានមន្ទីរសុខាភិបាល ខេត្តបាត់ដំបង ដោយចេញដីកាតែងតាំងកាលពីថ្ងៃទី២៥ ខែមិថុនា ឆ្នាំ២០១៩។
ចំពោះការស្នើតែងតាំងភរិយាបស់លោកអភិបាលខេត្តបាត់ដំបង ងួន រតនៈ នេះមិនត្រឹមត្រូវតាមតារាងពិពណ៌នាមុខដំណែងនោះទេ ព្រោះលោកស្រី ហុង ផានី មានតែសញ្ញាបត្រ ឆ្មបមធ្យមមួយតែប៉ុណ្ណោះផ្ទុយនឹងអនុក្រឹត្យ១១៤ ស្តីពីកាកំណត់រចនាសម្ព័ន្ធគ្រប់គ្រងនិងមុខដំណែង ក្នុងរចនាសម្ព័ន្ធគ្រប់គ្រងនៃក្រសួង ស្ថាប័ន ថ្នាក់ជាតិនិងថ្នាក់ក្រោមជាតិ ដែលបានចុះហត្ថលេខាដោយសម្តេចកាលពីថ្ងៃទី៧ ខែកញ្ញា ឆ្នាំ២០១៥ ។ នៅត្រង់មាត្រា៥ ចំណុចលេខ២ ត្រេទី២ បានចែងថា អនុប្រធានមន្ទីរជំនាញរាជធានី ខេត្ត ឬថ្នាក់ប្រហាក់ប្រហែល ត្រូវមានចំនួនច្រើនបំផុតត្រឹម៣រូប ។
ឥឡូវនេះ អនុប្រធានមន្ទីរសុខាភិបាលខេត្តបាត់ដំបង រួមទាំងប្រពន្ធលោក ងួន រតន: មានដល់ចំនួន៤រូបលើសពីចំនួនដែលច្បាប់ជាតិកំណត់។
ទី២/ ឈ្មោះ ងួន វិបុល ជាអភិបាលរងនៃគណៈអភិបាល ស្រុកបាណន់ នៅថ្ងៃទី២៤ ខែមិថុនា ឆ្នាំ២០១៩។
ទី៣/ ឈ្មោះ សយ សេរី ជាប្រធានការិយាល័យភូមិបាលស្រុកកំរៀង។
ទី៤/ ឈ្មោះ ស៊ី ដារ៉ូ ជាប្រធានការិយាល័យរដ្ឋបាលនៅមន្ទីរដែនដី នគររូបនីយកម្មនិងសំណង់ ខេត្តបាត់ដំបង។
៥/ ឈ្មោះ ទី គឹមហេង ជាអនុប្រធានការិយាល័យភូមិបាលក្រុងបាត់ដំបង។
៦/ ឈ្មោះ ហូ លន់សីហា ជាប្រធានការិយាល័យភូមិបាលស្រុកបាណន់។
តាមប្រភពព័ត៌មានបានឲ្យដឹងថា ក្រៅមានការតែងតាំងប្រពន្ធ និងសាច់ឈាមដូចដែលមានឈ្មោះ ខាងលើនោះ គឺនៅមានការឃុបឃិតគ្នាតែងតាំងមន្ត្រីរាជការទ្បើងតោងតាមជើងខោអភិបាលខេត្តបាត់ដំបងជាច្រើននាក់ទៀត។ នេះពិតជាឱកាសមាស សម្រាប់លោក ងួន រតន: អភិបាលខេត្តបាត់ដំបង មកដល់ហើយ ទើបបានហ៊ានបំពានអនុក្រឹត្យ១១៤ របស់សម្តេចតេជោ ហ៊ុន សែន នោះ ដូច្នេះលោកអភិបាលខេត្តពិតជាខ្លាំងមែន។
ពាក់ព័ន្ធការចោទប្រកាន់ខាងលើនេះ រដ្ឋបាលខេត្តបាត់ដំបង នៅថ្ងៃទី 24 ខែកញ្ញា ឆ្នាំ 2019 បានចេញសេចក្តីបំភ្លឺដោយច្រានចោលទាំងស្រុង។
អ្នកនាំពាក្យរដ្ឋបាលខេត្តបាត់ដំបង បានឃើញព័ត៌មានផ្សព្វផ្សាយនៅលើបណ្ដាញសង្គមគេហទំព័រហ្វេសប៊ុក កាលពីថ្ងៃទី២០ ខែកញ្ញា ឆ្នាំ២០១៨ វេលាម៉ោង
៣:៣៩នាទីរសៀល ដែលបានវាយប្រហារ និងចោទប្រកាន់មកលើថ្នាក់ដឹកនាំខេត្តបាត់ដំបង គឺលោក ងួន រតនៈ អភិបាល នៃគណៈអភិបាលខេត្តបាត់ដំបង ដោយបានធ្វើការបំភ្លៃព័ត៌មានមិនពិតយកមកមួលបង្កាច់បង្ខូចកិត្តិយសថ្នាក់ដឹកនាំខេត្តយ៉ាងធ្ងន់ធ្ងរ ព្រមទាំងធ្វើការសន្និដ្ឋានដោយគ្មានមូលដ្ឋាន និងគ្មានព័ត៌មានច្បាស់លាស់ ក្នុងគោលបំណង
បំបែកបំបាក់សាមគ្គីភាពមន្ត្រីរាជការ និងធ្វើឲ្យបាត់បង់ទំនុកចិត្តពីមហាជន និងប្រជាពលរដ្ឋមកលើការដឹកនាំរបស់
រដ្ឋបាលខេត្តបាត់ដំបង ។
ជុំវិញករណ៏នេះ អ្នកនាំពាក្យរដ្ឋបាលខេត្តបាត់ដំបង សូមធ្វើការបំភ្លឺដូចតទៅ ៖
ចំពោះការប្រគល់ភារកិច្ចលោកស្រី ហុង ផានី ជាអនុប្រធានមន្ទីរសុខាភិបាលខេត្ត គឺដើម្បីជំនួស លោកស្រី
អ៊ូ វណ្ណដា អនុប្រធានមន្ទីរសុខាភិបាលខេត្ត ជាស្ត្រីដែលបានចូលនិវត្តន៍ ហើយត្រូវបំពេញជំនួសដោយស្ត្រីវិញ ស្របតាមគោលការណ៍របស់រាជរដ្ឋាភិបាល និងក្រសួងមុខងារសាធារណៈ ក្នុងការលើកកម្ពស់សមធម៌យេនឌ័រក្នុងវិស័យមុខងារសាធារណៈ ដោយមានការប្រជុំពិភាក្សាវាយតម្លៃ និងលើកសំណើសុំពីមន្ទីរសុខាភិបាលខេត្តបាត់ដំបង តាម
បែបបទ និងនីតិវិធីច្បាស់លាស់ ។
ដោយឡែកការតែងតាំងលោក ចេង លីស៊ុនឃាង ជាអនុប្រធានមន្ទីរសុខាភិបាលខេត្តបាត់ដំបង បន្ថែមក្នុង
រចនាសម្ព័ន្ឋថ្មីរបស់មន្ទីរ គឺដោយមើលឃើញ ពីទំហំការងាររបស់មន្ទីរ មានការកើនឡើងច្រើន ទើបមន្ទីរសុខាភិបាលខេត្ត
បានធ្វើការស្នើសុំមករដ្ឋបាលខេត្ត ដើម្បីលើកសំណើសុំគោលការណ៍ និងការឯកភាព ពីក្រសួងសុខាភិបាល និងក្រសួង
មុខងារសាធារណៈជាមុនដើម្បីរដ្ឋបាលខេត្ត ចេញដីកាតែងតាំងស្របតាមគោលការណ៍ បែបបទ និងនីតិវិធី។
ចំពោះការតែងតាំងលោក ងួន វិបុល ជាអភិបាលរង នៃគណៈអភិបាលស្រុកបាណន់ គឺមានការប្រជុំវាយ
តម្លៃត្រឹមត្រូវស្របតាមនីតិវិធី និងមានការគាំទ្រ ពីគណៈអភិបាលខេត្ត ក្នុងការតែងតាំង។
ចំពោះការតែងតាំងលោក សយ សេរី ជាប្រធានការិយាល័យរៀបចំដែនដី នគរូបនីយកម្ម សំណង់ និង
ភូមិបាលស្រុកកំរៀង (ឆ្នាំ២០១៦) និងការតែងតាំងលោក ហូ លន់សីហា ជាប្រធានការិយាល័យរៀបចំដែនដី នគរូបនីយកម្ម
សំណង់ និងភូមិបាលស្រុកបាណន់ (ឆ្នាំ២០១៧) រដ្ឋបាលខេត្តបានតែងតាំងមុនលោក ងួន រតនៈ ចូលកាន់
មុខតំណែងជាអភិបាល នៃគណៈអភិបាលខេត្តបាត់ដំបងម្លេះ។
ចំពោះការតែងតាំងលោក ទី គឹមហេង ជាអនុប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលក្រុងបាត់ដំបង និងការតែតាំងលោក ឈឿន ស៊ីណារ៉ូ មិនមែន (ស៊ី ដារ៉ូ ទេ) ជាប្រធានការិយាល័យ
រដ្ឋបាល នៃ
មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបាត់ដំបង គឺតែងតាំងដោយខ្សែបណ្តោយក្រសួងរៀបចំ
ដែនដី នគរូបនីយកម្ម និងសំណង់ តាំងពីឆ្នាំ២០១៣ មកម្លេះ។
អ្វីដែលគេហទំព័រហ្វេសប៊ុក បានចុះផ្សាយ គឺជាព័ត៌មានបំភ្លៃ
មូលបង្កាច់ ធ្វើឱ្យប៉ះពាល់ដល់ការដឹកនាំរបស់រដ្ឋបាលខេត្ត ដែលតែងតែប្រកាន់ភ្ជាប់នូវគោលការណ៍ សេចក្តីណែនាំ
និងលិខិតបទដ្ឋាននានា សំដៅពង្រឹង ស្ថាប័ន ព្រមទាំងសមត្ថភាពមន្ត្រីក្នុងការចូលរួមអនុវត្តកម្មវិធីនយោបាយយុទ្ធសាស្ត្រចតុកោណ របស់រាជរដ្ឋាភិបាល ការដោះស្រាយទុក្ខកង្វល់ សំណើ សំណូមពរ និងការបម្រើប្រជាពលរដ្ឋដោយភាព
ស្មោះត្រង់ ។
អ្នកនាំពាក្យរដ្ឋបាលខេត្តបាត់ដំបង សូមសូមប្រកាសធ្វើការបដិសេធទាំងស្រុង និងមិនអាចទទួលយកបាន
នូវអ្វីដែលគេហទំព័រហ្វេសប៊ុក បានធ្វើការផ្សព្វផ្សាយនៅ
លើបណ្តាញសង្គមកាលពីថ្ងៃទី២០ ខែកញ្ញា ឆ្នាំ២០១៩ នោះឡើយ ៕ដោយ៖បញ្ញាស័ក្តិ