ក្រុមគ្រួសារដែលបានបាត់បង់សមាជិក ក្នុងហេតុការណ៍ធ្លាក់យន្តហោះ Boeing 737 Max នឹងទទួលបានសំណងចំនួន ១៤៤.៥០០ដុល្លារក្នុងមួយគ្រួសារពីក្រុមហ៊ុន Boeing។ នេះបើតាមការចុះផ្សាយរបស់ BBC នៅថ្ងៃអង្គារនេះ។
លុយសំណងទាំងនោះបានមកពីជំនួយហិរញ្ញវត្ថុចំនួន ៥០លានដុល្លារ ដែលក្រុមហ៊ុនបានប្រកាសកាលពីខែកក្កដាកន្លងទៅ។
ទោះយ៉ាងណា មេធាវីរបស់ក្រុមគ្រួសារមួយចំនួន បានបដិសេធទទួលយកសំណងទាំងនោះ។
មេធាវីម្នាក់ដែលតំណាងឲ្យគ្រួសារចំនួន ១៥បាននិយាយថា “ទឹកប្រាក់ចំនួន ១៤៤.៥០០ មិនអាចប៉ះប៉ូវគ្រួសាររបស់ពួកយើង ឬគ្រួសារដទៃទៀតឡើយ”។
មេធាវីឈ្មោះ Nomaan Husain បានថ្លែងទៀតថា “នេះមិនមែនជាអ្វីដែលធ្វើឲ្យគ្រួសារជនរងគ្រោះសប្បាយចិត្តនោះឡើយ។ គ្រួសារជនរងគ្រោះចង់បានចម្លើយ”។
សូមបញ្ជាក់ថា យន្តហោះប្រភេទ 737 Max របស់ក្រុមហ៊ុន Boeing ត្រូវបានលែងឲ្យមានការហោះហើរចាប់តាំងពីខែមីនាមក បន្ទាប់ពីក្រុមស៊ើបអង្កេតបានធ្វើការវាយតម្លៃទៅលើសុវត្ថិភាពរបស់យន្តហោះ ក្រោយពេលមានការធ្លាក់ចំនួន ២ករណីនៅក្នុងប្រទេសឥណ្ឌូណេស៊ី និងប្រទេសតេត្យូពី ដែលផ្តាច់ជីវិតមនុស្សជាង ៣៤០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
