មនុស្សយ៉ាងតិច ២១នាក់បានស្លាប់ និងជាង ៧០នាក់ទៀតរងរបួស ក្រោយពេលក្រុមអ្នកតវ៉ារាប់រយអ្នក ដែលភាគច្រើនជាសិស្ស បានដុតអគារជាច្រើនខ្នងនៅក្នុងទីក្រុងមួយ ស្ថិតក្នុងខេត្ត Papua នៃប្រទេសឥណ្ឌូណេស៊ី។
ក្នុងអ្នកចំណោមអ្នកស្លាប់ មានជាច្រើននាក់បានជាប់នៅក្នុងអគារដែលត្រូវគេដុត នៅក្នុងទីក្រុង Wamena។
ការផ្ទុះការតវ៉ាកាលពីថ្ងៃចន្ទម្សិលមិញនេះ កើតឡើងដោយសារតែការបញ្ចេញមតិរើសអើងពូជសាស្រ្តរបស់លោកគ្រូម្នាក់ ប៉ុន្តែប៉ូលីសបានបដិសេធ នឹងបានហៅការចោទប្រកាន់នោះថា ជាការបោកប្រាស់។
ប៉ូលីសនិយាយថា ការប៉ះទង្គិចបានកើតឡើងក្រោយពេលមានការឈ្លោះគ្នា រវាងសិស្សមកពីសាលាផ្សេងគ្នា។
អ្នកនាំពាក្យយោធាឈ្មោះ Eko Daryanto បានថ្លែងប្រាប់ទីភ្នាក់ងារសារព័ត៌មាន AFP ថា ចំនួនអ្នកស្លាប់អាចនឹងកើតឡើង ដោយសារតែមានជនស៊ីវិលជាច្រើននាក់បានកំពុងជាប់នៅក្នុងអគារឆេះ។
សូមបញ្ជាក់ថា តំបន់Papua ត្រូវបានបែកចែកជា ២ខេត្ត គឺ Papua និង Papua ខាងលិច ហើយវាបានក្លាយទៅជាផ្នែកមួយរបស់ឥណ្ឌូណេស៊ី បន្ទាប់ពីមានការធ្វើប្រជាមតិដ៏ចម្រូងចម្រាស់។
តំបន់ Papua ដែលជាអតីតដែនដីអាណានិគមន៍របស់ហូឡង់ បានប្រកាសឯករាជ្យនៅក្នុងឆ្នាំ ១៩៦១ ប៉ុន្តែត្រូវបានត្រួតត្រាដោយប្រទេសឥណ្ឌូណេស៊ីក្នុងឆ្នាំ ១៩៦៩។ ការធ្វើប្រជាមតិដើម្បីប្រកាសឯករាជ្យត្រូវបានធ្វើឡើងក្នុងឆ្នាំ ១៩៦៩ ប៉ុន្តែមានមនុស្សចំនួន ១ពាន់នាក់ប៉ុណ្ណោះ ត្រូវបានគេអនុញ្ញាតឲ្យធ្វើការបោះឆ្នោតប្រជាមតិ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
