ខេត្តស្វាយរៀងៈ នៅព្រឹកថ្ងៃអង្គារ១១រោច ខែភទ្របទឆ្នាំកុរ ឯកស័ក ព.ស២៥៦៣ត្រូវនឹងថ្ងៃទី២៤ ខែកញ្ញា ឆ្នាំ២០១៩នេះ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង ព្រមទាំងសហការី បានអញ្ជើញបង្សុកូល និងប្រគេនទេយ្យទានដល់ព្រះសង្ឃនៅវត្តប្រជុំអង្គ ស្ថិតក្នុងភូមិបាក់រនាស់សង្កាត់សង្ឃ័រ ក្រុងស្វាយរៀង ខេត្តស្វាយរៀង ដើម្បីឧទ្ទិសកុសល ផលបុណ្យ ជូនដល់ដួងវិញ្ញាណក្ខន្ធមាតាបិតា ជីដូន ជីតា និង ញាតិកាទាំង៧សណ្តានដែលបានចែកឋានទៅ កាន់លោកខាងមុខ សូមទទួលបាននូវផល្លានិសង្សដែល ដែលលោកនិងសហការីបានឧទ្ទិសជូនតាមរយៈព្រះសង្ឃ ដែលជាស្រែបុណ្យក្នុងរដូវកាលបុណ្យកាន់បិណ្ឌ និងភ្ជុំបិណ្ឌនេះ សូមឲ្យអំណាច នៃអានិសង្ស នេះជួយទ្រទ្រង់ ឲ្យវិញ្ញាណក្ខន្ធអ្នកទាំងនោះ បានទៅកាន់ ទីឋានបរមសុខ ក្នុងឋានសុគតិភពកុំបី ខានឡើយ។
ក្នុងឳកាសនោះដែរ លោកមេបញ្ជាការនិងសហការីក៏បានជូននូវ ថវិកាមួយចំនួនដល់ប្រជាពលរដ្ឋពុទ្ធបរិស័ទ ចូលរួមក្នុងកម្មវិធី និងបានចូលជាបច្ច័យចំនួន៥.៤៤០.០០០រៀល ប្រគេនដល់ព្រះសង្ឃទុក ដើម្បីធ្វើបុណ្យក្នុងឱកាសរដូវកាន់បិណ្ឌនេះផងដែរ៕ ដោយ៖វ៉ៃកូ