បាត់ដំបង ៖ ឧត្តមសេនីយ៍ឯក ហ៊ុន ម៉ាណែត បានថ្លែងថា ការបំពាក់ឋានន្តរស័ក្តិជូនយោធិន ដែលត្រូវចូលនិវត្តន៍នាពេលនេះ គឺក្នុងគោលបំណងថ្លែងអំណរគុណចំពោះគុណូបការៈស្នាដៃ និងការខិតខំរបស់នាយទាហាន នាយទាហានរង និងពលទាហាន ដែលបានបំពេញភារកិច្ច ជូនជាតិមាតុភូមិ ហើយបន្តជឿទុកចិត្ត ការយកចិត្តទុកដាក់ ចំពោះអតីតយុទ្ធជនរបស់រាជរដ្ឋាភិបាល ដែលមិនបោះបង់ចោលយោធិន ដែលកំពុងភារកិច្ច និងចូលនិវត្តន៍នោះទេ គឺរាជរដ្ឋាភិបាល បានផ្ដល់នូវគោលនយោបាយច្រើនណាស់ តាមយន្តការក្រសួងការពារជាតិផង យន្តការសមាគមអតីតយុទ្ធជនផង។ រាជរដ្ឋាភិបាលនៅតែដឹងគុណ និងផ្ដល់តម្លៃដូចគ្នា។
ក្នុងឱកាសលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក អញ្ជើញជាអធិបតីភាព ក្នុងពិធីសំណេះសំណាល និងបំពាក់ឋានន្តរសក្តិជូនយោធិន ត្រូវចូលនិវត្តន៍ឆ្នាំ២០១៩ របស់យោធភូមិភាគទី៥ និងកងពលតូចអន្តរាគមន៍លេខ១៤ កងទ័ពជើងគោក ខេត្តបាត់ដំបង នាព្រឹកថ្ងៃទី២៤ ខែកញ្ញា ឆ្នាំ២០១៩នេះ។ លោកឧត្តមសេនីយ៍ឯក ហ៊ុន ម៉ាណែត បានលើកឡើងថា រាជរដ្ឋាភិបាល បានយកចិត្តទុកដាក់ចំពោះកិត្តិយស និងជីវភាពរបស់កងទ័ព តាមរយៈការដំឡើងប្រាក់បៀវត្ស និងផ្តល់គោលនយោបាយ និងសេវាផ្សេងជាច្រើនទៀត រួមមានបេឡាជាតិសន្តិសុខសង្គម។
ឧត្តមសេនីយ៍ឯក ហ៊ុន ម៉ាណែត ថ្លែងថា ការយកចិត្តទុកដាក់នេះ មិនមែនធ្វើតែពេលបំពេញភារកិច្ចនោះទេ គឺធ្វើគ្រប់ដំណាក់កាលទាំងអស់ គឺពេលកំពុងបំពេញភារកិច្ច និងក្រោយពេលបំពេញភារកិច្ច គឺយើងបន្តជួយតាមយន្តការ សមាគមអតីតយុទ្ធជន។ នេះគឺជាយន្តការរាជរដ្ឋាភិបាល ដែលយកចិត្តទុកដាក់ចំពោះកងទ័ព និងអតីតយុទ្ធជន។
ឧត្តមសេនីយ៍ឯក ហ៊ុន ម៉ាណែត បានឲ្យដឹងថា ការជួបជុំ និងការបំពាក់ឋានន្តរស័ក្តិជូនយោធិន ដែលត្រូវចូលនិវត្តន៍នាពេលនេះ គឺក្នុងគោលបំណងថ្លែងអំណរគុណចំពោះគុណូបការៈស្នាដៃ និងការខិតខំរបស់នាយទាហាន នាយទាហានរង និងពលទាហាន ដែលបានបំពេញភារកិច្ច ជូនជាតិមាតុភូមិ ក្នុងរយៈពេលកន្លងមក ជាពិសេសស្ថិតនៅក្នុងដំណាក់កាល ដែលលំបាក ក្នុងការរំដោះជាតិ ការទប់ស្កាត់នៃការវិលត្រឡប់របបប្រល័យ ពូជសាសន៍ និងការថែរក្សាសុខសន្តិភាព និងការចូលរួមការសម្រេច បានយុទ្ធសាស្ត្រឈ្នះ-ឈ្នះ ហើយធ្វើឲ្យយើងមាន សុខសន្តិភាពដូចសព្វថ្ងៃនេះ។
ឧត្តមសេនីយ៍ឯក ហ៊ុន ម៉ាណែត បានបន្ថែមទៀតថា ការបំពាក់ឋានន្តរសក្តិជូនដល់អ៊ំពូមីង គឺជាលើកទី២ហើយ ដែលនេះគឺជាប្រវត្តិសាស្ត្រសម្រាប់កងទ័ពកម្ពុជា។ ការបំពាក់លើកទីមួយ គឺបំពាក់ជូនអ៊ំពូមីង ដែលចូលបម្រើ កងទ័ពឆ្នាំ១៩៧៩ចុះ ហើយលើកនេះ គឺការបំពាក់អ៊ំពូមីង ដែលចូលនិវត្តន៍ ដែលនេះ គឺជាករណីពិសេស ដែលយើងបំពាក់ឋានន្តរស័ក្កិ ជូនអ៊ំពូមីងមុនចូលនិវត្តន៍វត្ត។ គោលនយោបាយ នៃការលើកទឹកចិត្តនេះ គឺធ្វើសម្រាប់នេះ នាយទាហានដែលបានបំពេញភារកិច្ច ជាពិសេសនៅក្នុងដំណាក់កាលដ៏លំបាក។ យើងខិតខំរកនិតិវិធី និងតម្លាភាព ដើម្បីផ្ដល់ឱកាសកូនចៅរបស់អតីតយុទ្ធជន ហើយគោលការណ៍ នៃការជ្រើសរើសពលទាហាន នាយទាហាន មិនមានគោលការណ៍យកប្រាក់នោះទេ ព្រោះយើងមិនធ្វើឲ្យមានយន្តការ តម្លាភាព ប៉ុន្តែត្រូវការលក្ខខណ្ឌសុខភាពល្អ និងមិនប្រើប្រាស់គ្រឿងញៀន។ នេះគឺជាការផ្ដល់ឱកាសកាស និងទឹកចិត្តដល់កូនចៅអ៊ំពូមីង និងជាការលើកទឹកចិត្ត ចំពោះអតីតយុទ្ធជន៕ ដោយ ៖ បញ្ញាស័ក្តិ
