ភ្នំពេញ៖ ក្រោមកិច្ចសហការកម្ពុជា និងការិយាល័យអង្គការសហប្រជាជាតិទទួលបន្ទុកកិច្ចការគ្រឿងញៀន និងឧក្រឹដ្ឋកម្ម UNODC កិច្ចប្រជុំពិគ្រោះយោបល់ថ្នាក់ជាតិស្តីពីការិយាល័យទំនាក់ទំនងព្រំដែន BLO ត្រូវបានប្រារព្ធឡើង កាលពីថ្ងៃទី២៤ ខែកញ្ញា ឆ្នាំ២០១៩ នៅក្រុងភ្នំពេញ។
កិច្ចពិភាក្សាប្រចាំឆ្នាំនេះ ធ្វើឡើងក្រោមអធិបតីភាពលោក ឧត្តមសេនីយ៍ឯក នាក់ យុទ្ធា អគ្គលេខាធិការស្តីទី នៃអាជ្ញាធរជាតិប្រយុទ្ធប្រឆាំងគ្រឿងញៀន និងលោក អ៊ីហ្គរ កុងដ្រាតយ៉េវ (Igor Kondratyev )តំណាងអង្គការ UNODC ទទួល បន្ទុកសម្របសម្រួលកិច្ចការការិយាល័យទំនាក់ទំនងព្រំដែនBLO ដោយមានការចូលរួមពីអភិបាលរង ប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្ត និងស្នងការរងជាអនុប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្ត ជាប់ព្រំដែនចំនួន១១ ដែលទទួលបន្ទុកការងារការិយាល័យទំនាក់ទំនងព្រំដែន BLO ទាំង១៤កន្លែង និងតំណាងគយនិងរដ្ឋាករ។
ក្នុងឱកាសនោះ លោក ឧត្ដមសេនីយ៍ឯក នាក់ យុទ្ធា អគ្គលេខាធិការស្តីទី បានប្រសាសន៍ ដោយផ្តោតលើសារសំខាន់ នៃការិយាល័យទំនាក់ទំនងព្រំដែន BLO ដែលទទួលបានការការវាយតម្លៃខ្ពស់ ពីថ្នាក់ដឹកនាំទាំងអាជ្ញាធរជាតិប្រយុទ្ធប្រឆាំងគ្រឿងញៀន ក៏ដូចជា រាជរដ្ឋាភិបាល ដែលបានឆ្លុះបញ្ចាំងតាមរយៈយុទ្ធនាការប្រយុទ្ធប្រឆាំងគ្រឿងញៀនុសច្បាប់ ជាបន្តបន្ទាប់ របស់រាជរដ្ឋាភិបាល តួនាទី និងភារកិច្ចរបស់ការិយាល័យBLO ដែលកំពុងដើរតួរយ៉ាងសំខាន់ ជួយជំរុញឲ្យការអនុវត្តផែនការភូមិឃុំសង្កាត់ ស គ្មានគ្រឿងញៀន នៅតាមតំបន់ព្រំដែនដែលជាគំនិតផ្តួចផ្តើមរបស់លោក ឧបនាយករដ្ឋមន្ត្រី កែ គឹមយ៉ាន ទទួលបានជោគជ័យ ។
ជាមួយគ្នានេះ លោកឧត្ដមសេនីយ៍ឯក នាក់ យុទ្ធា ក៏បានថ្លែងពីសភាពការណ៍គ្រឿងញៀន ប្រទេសក្នុងតំបន់ ពិសេសប្រទេសជិតខាង មាន វៀតណាម ថៃ ឡាវ ក៏ទទួលបានអត្ថប្រយោជន៍ ពីការិយាល័យBLO ដូចកម្ពុជាដែរ ។
យោងសារសំខាន់សារប្រយោជន៍នេះ លោកឧត្ដមសេនីយ៍ឯក នាក់ យុទ្ធា បានផ្តាំផ្ញើ និងសំណូមពរដល់ប្រធានការិយាល័យBLOទាំងអស់ឲ្យយកចិត្តទុកដាក់ធ្វើការពិនិត្យពិភាក្សា លើកយកបញ្ហាប្រឈម ចំណុចខ្វះខាតនិងបញ្ហាសំខាន់ៗនានាសំដៅបង្កើនប្រសិទ្ធភាពការងារ ដែលត្រូវអនុវត្តន៍នៅពេលខាងមុខ ។
ក្នុងពិធីនោះដែរ ក៏មានចុះហត្ថលេខាប្រគល់-ទទួលសម្ភាររបស់ UNODC ជូនអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន ហើយអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន នឹងធ្វើការបែងចែក ទៅតាមការិយាល័យBLO នៅពេលវេលាសមស្របខាងមុខ៕ ដោយ ៖ កូឡាប