ភ្នំពេញ៖ រដ្ឋបាលរាជធានីភ្នំពេញ បានធ្វើការអំពាវនាវឲ្យបងប្អូនប្រជាពលរដ្ឋទាំងអស់ នៅក្នុងរាជធានីភ្នំពេញ មានម្ចាស់ការ និងប្រុងប្រយ័ត្នខ្ពស់ ចំពោះគ្រោះអគ្គិភ័យក្នុងឱកាសបុណ្យកាន់បិណ្ឌ និងភ្ជុំបិណ្ឌ ខណៈដែលនៅឆ្នាំ២០១៩នេះ នៅរាជធានីភ្នំពេញ មានគ្រោះអគ្គិភ័យកើតឡើងបន្តបន្ទាប់ ដែលគ្រោះអាក្រក់នេះ ភាគច្រើនផ្តើមចេញពីឆ្លងចរន្តអគ្គិសនី ការធ្វេសប្រហែសរបស់បងប្អូនប្រជាពលរដ្ឋ និងបញ្ហាផ្សេងៗមួយចំនួនទៀត។
បើយោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ ស្តីពីការបង្ការគ្រោះអគ្គិភ័យ ក្នុងឱកាសបុណ្យកាន់បិណ្ឌ និងភ្ជុំបិណ្ឌ បានឲ្យដឹងថា រដ្ឋបាលរាជធានីភ្នំពេញ សូមជម្រាបជូនដំណឹងដល់ បងប្អូនប្រជាពលរដ្ឋក្នុងរាជធានីភ្នំពេញទាំងអស់ ឱ្យបានជ្រាបថា ៖ នៅឆ្នាំ២០១៩នេះ ក្នុងរាជធានីភ្នំពេញ មានគ្រោះអគ្គិភ័យកើតឡើងបន្តបន្ទាប់ គួរឱ្យកត់សម្គាល់ ដោយសារតែបញ្ហាមួយចំនួនដូចជា ឆ្លងចរន្តអគ្គិសនី ការធ្វេសប្រហែស របស់បងប្អូនប្រជាពលរដ្ឋ និងបញ្ហាផ្សេងៗមួយចំនួនទៀត ដែលបណ្តាលឱ្យមានគ្រោះអគ្គិភ័យជាយថាហេតុ។
រដ្ឋបាលរាជធានីភ្នំពេញ សូមអំពាវនាវដល់បងប្អូនប្រជាពលរដ្ឋ ត្រូវម្ចាស់ការ និងប្រុងប្រយ័ត្នខ្ពស់ ចំពោះដើមចមដែលអាចបង្កើត ឱ្យមានគ្រោះអគ្គិភ័យដូចជា ភ្លើងចង្ក្រាន ភ្លើងចង្កៀង ភ្លើងធូប ទៀន ការដុតសំរាម ការដុតព្រៃ ការបោះចោលកន្ទុយបារីផ្តេសផ្តាស ការតភ្ជាប់ ឬប្រើចរន្តអគ្គិសនី មិនត្រឹមត្រូវតាមលក្ខណៈបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុងាយឆេះ ឬងាយផ្ទះឆេះ។ល។ ដោយត្រូវពិនិត្យឱ្យបានហ្មត់ចត់ បង្ការកុំឱ្យមានការឆេះរាលដាល បង្កើតជាគ្រោះអគ្គិភ័យ ដែលធ្វើឱ្យបាត់បង់ទាំងទ្រព្យសម្បត្តិ និងអាចដល់អាយុជីវិត។
ដោយឡែកចំពោះអាជ្ញាធរមូលដ្ឋាន និងកងកម្លាំងមានសមត្ថកិច្ចទាំងអស់ ត្រូវត្រៀមរៀបចំ និងត្រូវរិះរកមធ្យោបាយ ឱ្យបានគ្រប់គ្រាន់ក្នុងការបង្ការទប់ស្កាត់ ការកើតមានជាយថា ហេតុនូវអគ្គិភ័យក្នុងមូលដ្ឋានរបស់ខ្លួន នៅក្នុងអំឡុងឱកាសបុណ្យកាន់បិណ្ឌ និងភ្ជុំបិណ្ឌនេះ។
ទទួលបានសេចក្តីជូនដំណឹងនេះ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ សាលាខណ្ឌទាំង១៤ មន្ទីរជុំវិញរដ្ឋបាលរាជធានី ភ្នំពេញ និងអាជ្ញាធរពាក់ព័ន្ធត្រូវធ្វើការផ្សព្វផ្សាយ ឱ្យបានទូលំទូលាយ និងចាត់វិធានការបង្ការទប់ស្កាត់ គ្រោះអគ្គិភ័យកើតឡើង សំដៅរក្សាបាននូវសន្តិសុខ សណ្តាប់ធ្នាប់ និងសុវត្ថិភាពសង្គម៕ដោយ៖កូឡាប