ភ្នំពេញ ៖ នាយឧត្តមសេនីយ៍ សន្តិបណ្ឌិត នេត សាវឿន ជួបពិភាក្សាជាមួយគណៈប្រតិភូក្រសួងសន្តិសុខសាធារណៈចិន ផ្តោតលើការរៀបចំពង្រឹងសុវត្ថិភាព សន្តិសុខ សណ្តាប់ធ្នាប់ ក្នុងខេត្តព្រះសីហនុ តាមរយៈកិច្ចសហប្រតិបត្តិការរវាងនគរបាលជាតិកម្ពុជាជាមួយនឹងខេត្តជាំងស៊ូ ដើម្បីការរៀបចំកសាងសុវត្ថិភាព ខេត្តព្រះសីហនុ កិច្ចសហប្រតិបត្តិការបង្ក្រាបឧក្រិដ្ឋកម្មឆ្លងដែន។
នៅព្រឹកថ្ងៃទី២៥ ខែកញ្ញា ឆ្នាំ២០១៩នេះ លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានទទួលជួបពិភាក្សាជាមួយនឹងគណៈប្រតិភូក្រសួងសន្តិសុខសាធារណៈ នៃសាធារណរដ្ឋប្រជាមានិតចិន ដែលដឹកនាំដោយ លោក Duan Daqi អនុប្រធាននាយកដ្ឋានកិច្ចសហប្រតិបត្តិការអន្តរជាតិ។ ស្នងការរងនគរបាលខេត្តជាំងស៊ូ នៃប្រទេសចិន លោក ZHAO JIANSHENG ក៏មានវត្តមានក្នុងកិច្ចពិភាក្សានាបរិវេណអគ្គស្នងការដ្ឋាននគរបាលជាតិ។
កិច្ចពិភាក្សាបានផ្តោតលើការរៀបចំពង្រឹងសុវត្ថិភាព សន្តិសុខ សណ្តាប់ធ្នាប់ ក្នុងខេត្តព្រះសីហនុ តាមរយៈកិច្ចសហប្រតិបត្តិការ រវាងនគរបាលជាតិកម្ពុជា ជាមួយនឹងខេត្តជាំងស៊ូ ដើម្បីការរៀបចំកសាងសុវត្ថិភាព ខេត្តព្រះសីហនុ កិច្ចសហប្រតិបត្តិការបង្ក្រាបឧក្រិដ្ឋកម្មឆ្លងដែន ការបង្កើតការិយាល័យសម្របសម្រួលចេញចូលតែមួយ និងការជួយបណ្តុះបណ្តាលធនធានមន្ត្រីនគរបាលកម្ពុជា និងការបំពាក់សម្ភារៈទំនើបដើម្បីកត្តាពង្រឹងសុវត្ថិភាព សន្តិសុខ សណ្តាប់ធ្នាប់ ក្នុងខេត្តព្រះសីហនុ។
លោក នាយឧត្តមសេនីយ៍ សន្តិបណ្ឌិត នេត សាវឿន បានមានប្រសាសន៍លើកឡើងអំពីសក្តានុពល នៃខេត្តទេសចរណ៍ព្រះសីហនុ ដែលនឹងក្លាយជាខេត្តទំនើបមួយ ស្ថិតក្នុងគម្រោងរៀបចំធ្វើផ្លូវ និងការដាក់ប្រព័ន្ធលូ ដែលរាជរដ្ឋាភិបាល បានសម្រេចនូវគម្រោងថវិកាសម្រាប់ការកសាងរួចមកហើយ។ លោកនាយឧត្តមសេនីយ៍ សន្តិបណ្ឌិត នេត សាវឿន បានបញ្ជាក់ថា នាអនាគតគម្រោងសាងសង់ផ្លូវក្នុងខេត្តព្រះសីហនុ នឹងធ្វើឲ្យខេត្តដែលជាប់នឹងមាត់សមុទ្រនេះ ក្លាយជាខេត្តដែលមានហេដ្ឋារចនាសម្ព័ន្ធទំនើបជាងគេ ក្នុងប្រទេសកម្ពុជា។
គណៈប្រតិភូចិន បានសម្តែងក្តីរីករាយពេញចិត្ត ចំពោះកិច្ចសហប្រតិបត្តិការជាមួយនឹងអគ្គស្នងការដ្ឋាននគរបាលជាតិកម្ពុជា ក្នុងគម្រោងរៀបចំពង្រឹងសុវត្ថិភាព សន្តិសុខ សណ្តាប់ធ្នាប់ ខេត្តព្រះសីហនុ និងការសន្យាជួយបណ្តុះបណ្តាល ធនធានមន្ត្រីនគរបាលកម្ពុជា ក៏ដូចជាការជួយបំពាក់សម្ភារៈបច្ចេកវិទ្យាកាមេរ៉ា និងការរៀបចំប្រព័ន្ធគ្រប់គ្រងសន្តិសុខ ប្រជាពលរដ្ឋតាមរយៈបច្ចេកវិទ្យា នៃសម័យឌីជីថលនាបច្ចុប្បន្ន៕ដោយ៖កូឡាប