ខេត្តស្វាយរៀងៈ លោក ម៉ែន វិបុល អភិបាលខេត្តស្វាយរៀង នាព្រឹកថ្ងៃទី២៥ ខែកញ្ញា ឆ្នាំ២០១៩នេះ បានដាក់់ផែនការ៦ចំណុចឱ្យមន្ត្រីក្រោមឱវាទ អនុវត្តន៍បន្តក្នុងការងារប្រចាំត្រីមាសទី៣ និងទិសដៅការងារត្រីមាសទី៤ ឆ្នាំ២០១៩ របស់រដ្ឋបាលខេត្ត ដូចជា អាជ្ញាធរពាក់ព័ន្ធជាប់ព្រំដែន ត្រូវហាមដាច់ខាតការជួលដីឲ្យទៅប្រជាជនប្រទេសជិតខាង និងសមត្ថកិច្ចពាក់ព័ន្ធ ត្រូវយកចិត្តទុកដាក់ទប់ស្កាត់បង្ក្រាប បទល្មើសនេសាទខុសច្បាប់ និងបន្តការទប់ស្កាត់បង្ក្រាបបទល្មើស ការនាំចេញឈើខុសច្បាប់ ឆ្លងកាត់ខេត្តស្វាយរៀង ។ ដែលកិច្ចប្រជុំនេះ បានប្រព្រឹត្តទៅនាសាលប្រជុំនន្ទី អគារ ខ សាលាខេត្ត នៅក្នុងកិច្ចប្រជុំបូកសរុបលទ្ធផល ការងារប្រចាំត្រីមាសទី៣ និងទិសដៅការងារត្រីមាសទី៤ ។
ពិធីនេះក៏មានការអញ្ជើញចូលរួមពីសំណាក់ អស់លោក លោកស្រីជាអភិបាលរងខេត្ត លោក លោកស្រី នាយក នាយករងរដ្ឋបាលសាលាខេត្ត លោកប្រធានសាលាដំបូងខេត្ត លោកព្រះរាជអាជ្ញារងសាលាដំបូងខេត្ត សាកលវិទ្យាធិការរងសាកលវិទ្យាល័យស្វាយរៀង លោកស្នងការរងនគរបាលខេត្ត លោកមេបញ្ជាការរងតំបន់ប្រតិបត្តិការសឹករងស្វាយរៀង លោកមេបញ្ជាការកងរាជអាវុធហត្ថខេត្ត លោក លោកស្រីប្រធានមន្ទីរ-អង្គភាពនានាជុំវិញខេត្ត លោកអភិបាលក្រុង ស្រុក លោក លោកស្រីនាយកទីចាត់ការ/ប្រធានអង្គភាពចំណុះសាលាខេត្ត ប្រធានច្រកទ្វារព្រំដែន និងមន្ត្រីពាក់ព័ន្ធជាច្រើនរូបទៀត ។
លោក អភិបាលខេត្ត បានថ្លែងអំណរគុណ និងកោតសរសើរចំពោះលោក លោកស្រីថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធក្នុងខេត្តស្វាយរៀងទាំងអស់ ដែលបានសហការអនុវត្តន៍តួនាទី ភារកិច្ចរបស់ខ្លួន ក្នុងការផ្តល់សេវាជូនប្រជាពលរដ្ឋដូចជា ការថែរក្សាសន្តិសុខ សុវត្ថិភាព ពិសេសក្នុងឱកាសបុណ្យភ្ជុំបិណ្ឌឆ្នាំ២០១៩នេះ។
លោកអភិបាលខេត្ត ក៏បានធ្វើការផ្ដាំផ្ញើដល់ មន្ទីរ-អង្គភាព រដ្ឋបាលក្រុង ស្រុក កងកម្លាំងប្រដាប់អាវុធ និងអ្នកពាក់ព័ន្ធ បន្តយកចិត្តទុកដាក់នូវកិច្ចការសំខាន់ៗ មួយចំនួនដូចខាងក្រោម ៖ ១- ក្នុងឱកាសថ្ងៃឈប់សម្រាកថ្ងៃបុណ្យភ្ជុំបិណ្ឌ មន្ទីរអង្គភាពទាំងអស់ត្រូវរៀបចំឱ្យមានវេនប្រចាំការ។ ២-កងកម្លាំងមានសមត្ថកិច្ចគ្រប់លំដាប់ថ្នាក់ ត្រូវបង្កើនការការពារសន្តិសុខសុវត្ថិភាព ជូនបងប្អូនប្រជាពលរដ្ឋ ក្នុងឱកាសថ្ងៃឈប់សម្រាកនៃថ្ងៃបុណ្យភ្ជុំបិណ្ឌ។ ៣-លោកអភិបាលក្រុង ស្រុក ត្រូវត្រៀមលក្ខណៈរៀបចំធ្វើវេទិកាសាធារណៈ ក្រុមប្រឹក្សាខេត្ត។ ៤-បន្តរឹតបន្តឹងការអនុវត្តច្បាប់ចរាចរណ៍ផ្លូវគោក។ ៥-អាជ្ញាធរពាក់ព័ន្ធជាប់ព្រំដែន ត្រូវហាមដាច់ខាតការជួលដីឲ្យទៅប្រជាជនប្រទេសជិតខាង។ ៦-សមត្ថកិច្ចពាក់ព័ន្ធ ត្រូវយកចិត្តទុកដាក់ទប់ស្កាត់បង្ក្រាប បទល្មើសនេសាទខុសច្បាប់ និងបន្តការទប់ស្កាត់បង្ក្រាបបទល្មើស ការនាំចេញឈើខុសច្បាប់ ឆ្លងកាត់ខេត្តស្វាយរៀងយើង៕ ដោយ៖វ៉ៃកូ
