ភ្នំពេញ៖គណៈកម្មាធិការជាតិសុវត្ថិភាពចរាចរណ៍ផ្លូវគោក បានចេញសេចក្តីអំពាវនាវ ស្តីពីការបង្ការ ទប់ស្កាត់គ្រោះថ្នាក់ចរាចរផ្លូវគោក ក្នុងឱកាស ពិធីកាន់បិណ្ឌ និងពិធីបុណ្យភ្ជុំបិណ្ឌប្រពៃណីជាតិខ្មែរ នៅថ្ងៃទី១៤ ដល់ថ្ងៃទី២៩ ខែកញ្ញា ឆ្នាំ២០១៩។
គណៈកម្មាធិការជាតិសុវត្ថិភាពចរាចរណ៍ផ្លូវគោក សង្ឃឹម និងជឿជាក់យ៉ាងមុតម៉ាំ ទុកចិត្តលើស្មារតីប្រុងប្រយ័ត្ន របស់សាធារណជន អ្នកបើកបរយានជំនិះគ្រប់ប្រភេទ ដែលធ្វើដំណើលើផ្លូវសាធារណៈ នឹងប្រកបដោយស្មារតីទទួលខុសត្រូវ ចេះយោគយល់អធ្យាស្រ័យខ្ពស់ ចូលរួមគោរពច្បាប់ចរាចរណ៍ផ្លូវគោក ដើម្បីនាំមកនូវសុវត្ថិភាព និងសុខសប្បាយជាមួយក្រុមគ្រួសារ ក្នុងឱកាសពិធីកាន់បិណ្ឌ និងពិធីបុណ្ឌភ្ជុំបិណ្ឌប្រពៃណីជាតិខ្មែរ ទាំងអស់គ្នា។
នៅក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ ដែលត្រូវនឹងថ្ងៃទី១៤ ដល់ថ្ងៃទី២៩ ខែកញ្ញា ឆ្នាំ២០១៩ខាងមុខនេះ ស្ថានភាពចរាចរណ៍ផ្លូវគោក មានភាពមមាញឹក ដោយកំណើនខ្ពស់នៃយានយន្ត ហើយដែលតែងមាន
កំណើនគ្រោះថ្នាក់ចរាចរ ក្នុងឱកាសបុណ្យភ្ជុំបិណ្ឌប្រពៃណីជាតិ នាបណ្តាឆ្នាំកន្លងទៅ។
ដើម្បីបង្ការ ទប់ស្កាត់ កាត់បន្ថយគ្រោះថ្នាក់ចរាចរផ្លូវគោក ក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ
គណៈកម្មាធិការជាតិសុវត្ថិភាពចរាចរណ៍ផ្លូវគោក សូមធ្វើការអំពាវនាវ ដល់សាធារណជនដែលជាអ្នកប្រើប្រាស់ផ្លូវថ្នល់ ដូចខាងក្រោម៖
១-ចំពោះរថយន្តដឹកអ្នកដំណើរ ឬរថយន្តដឹកទំនិញ សូមកុំផ្ទុកមនុស្ស ឬទំនិញលើសច្បាប់កំណត់ ជាពិសេសរថយន្តដឹកអ្នកដំណើរ មិនត្រូវផ្ទុកមនុស្សនៅលើដំបូល និងមិនត្រូវតម្លើងថ្លៃធ្វើដំណើរក្នុងឱកាសនេះទេ។
២-ត្រូវត្រួតពិនិត្យលក្ខណៈបច្ចេកទេសយានជំនិះរបស់ខ្លួន មុនពេលធ្វើចរាចរ។
៣-អ្នកបើកបររថយន្ត និងអ្នករួមដំណើរ សូមពាក់ខ្សែក្រវាត់សុវត្ថិភាពឱ្យបានត្រឹមត្រូវជាប់ជាប្រចាំ។
៤-អ្នកបើកបរម៉ូតូ និងអ្នករួមដំណើរទាំងអស់ ត្រូវពាក់មួកសុវត្ថិភាពឱ្យបានត្រឹមត្រូវគ្រប់ៗគ្នា ទោះធ្វើ
ដំណើរជិត ឬ ឆ្ងាយ និងគ្រប់ពេលវេលា។ ត្រូវចងចាំជានិច្ចថា ” មួកសុវត្ថិភាពមួយ ជួយការពារជីវិតបានម្នាក់ “។
៥-អ្នកបើកបរត្រូវបន្ថយល្បឿនបើកបររបស់ខ្លួន ទៅតាមច្បាប់កំណត់ និងតាមស្ថានភាពជាក់ស្តែង ដូចជាទីប្រជុំជន សាលារៀន ផ្លូវគ្រលុក ផ្លូវកោង ផ្លូវប្រសព្វ ផ្លូវចំណោត ផ្លូវចង្អៀត ឬផ្លូវរអិល។ល។
មូលហេតុចម្បងដែលបណ្តាលឱ្យមានគ្រោះថ្នាក់ចរាចរ គឺការបើកបរលឿន ។
៦-អ្នកបើកបរមុននឹងវា ជើង ត្រូវដឹងច្បាស់ថាផ្លូវខាងមុខទំនេរ អាចជែងបានដោយសុវត្ថិភាព ជៀសវាងការ វ៉ា ជើងដោយប្រថុយប្រថាន ដែលអាចបង្កឱ្យមានគ្រោះថ្នាក់ចរាចរ ជាយថាហេតុ។
៧-អ្នកបើកបរត្រូវគោរពសិទ្ធិអាទិភាព នៅត្រង់ផ្លូវប្រសព្វ ដោយត្រូវបើកបរបន្ថយល្បឿននៅពេលជិតដល់ផ្លូវប្រសព្វ និងត្រូវទុកសិទ្ធិឱ្យអ្នកបើកបរ ដែលធ្វើចរាចរនៅលើផ្លូវធំ និងត្រង់ ទៅមុន៕ដោយ៖កូឡាប