តាកែវ៖ថ្លែងក្នុងពិធីបើកវគ្គបំប៉នជំនាញបឋមរយៈពេលខ្លី ដល់មន្ត្រីប៉ុស្តិ៍នគរបាលរដ្ឋបាលនេះ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវបាន លើកឡើងថា ក្នុងពេលសិក្សា«វិន័យ និងក្រមសីលធម៌»គឺជាចំណុចសំខាន់ក្នុងការក្រេបជញ្ជក់យកវិជ្ជាពីគ្រូបង្រៀន ដូច្នេះកងកម្លាំងនគរបាលទាំងអស់ត្រូវ មានការទទួលខុសត្រូវខ្ពស់ ក្នុងនាមយើងជាមន្ត្រីនគរបាលយុតិធម៌ ត្រូវតាមដានស្តាប់ដោយយកចិត្តទុកដាក់ នៅការណែនាំរបស់គ្រូឧទ្ទេស អំពីជំនាញ និងច្បាប់នានា ក្នុងពេលដែលយើងចុះអនុវត្តជាក់ស្តែងផ្ទាល់ ។
សូមបញ្ជាក់ផងដែរថា វគ្គបណ្តុះបណ្តាលនិងបំប៉នជំនាញបឋម ដល់មន្ត្រីប៉ុស្តិរដ្ឋបាលរយៈពេលខ្លីនេះ មានរយៈពេល ១១ ថ្ងៃ ចាប់ពីថ្ងៃទី ៣០ ខែកញ្ញា ឆ្នាំ២០១៩ ដល់ថ្ងៃទី ១០ ខែតុលា ឆ្នាំ២០១៩ ក្នុងនោះខេត្តតាកែវ មានប៉ុស្តិរដ្ឋបាលចំនួន ១០០ប៉ុស្តិ៍ និងមានមន្ត្រីនគរបាលជាសិក្ខាកាមចំនួន ២៧០នាក់ ។
ឆ្លៀតក្នុងឱកាសនោះដែរ លោកឧត្តមសេនីយ៍ទោ ផាន់ សុផេង អនុប្រធាននាយកដ្ឋានទទួលបន្ទុកកិច្ចការប៉ុស្តិ៍នគរបាលរដ្ឋបាល បានមានប្រសាសន៍ថា អង្គភាពនគរបាលប៉ុស្តិ៍រដ្ឋបាលគឺជាអង្គភាពមួយ ដែលស្ថិតនៅក្នុងចំណោមប្រជាជនរាប់ម៉ឺន រាប់សែននាក់ ហើយមន្ត្រីប៉ុស្តិ៍នេះហើយដែលជាអ្នកស្ថិតនូវជួរមុខ ក្នុងការជួបប្រទះនិងប្រឈមនៅបញ្ហាជាច្រើន ដូច្នេះនគរបាលប៉ុស្តិ៍រដ្ឋបាលត្រូវតែមានសមត្ថភាពខ្ពស់ ក្នុងការចាត់វិធានការ និងការដោះស្រាយបញ្ហាដែលកំពុងប្រឈមជាមួយ និងជនល្មើស និងសេវាកម្មនានាដែលត្រូវបម្រើឲ្យប្រជាពលរដ្ឋ ម្លេះហើយ នៅពេលមានវគ្គបំប៉នជំនាញបឋមខ្លី ដល់មន្ត្រីនគរបាលរដ្ឋបាលនាពេលនេះ សិក្ខាកាមទាំងអស់ត្រូវយកចិត្តទុកដាក់ ខិតខំស្វែងយល់ពីគ្រូឧទ្ទេស ដែលសុទ្ធសឹងតែជាអ្នកជំនាញ និងឆ្លងកាត់បទពិសោធន៍ ជាច្រើនឆ្នាំ មកបង្រៀន ហើយលោកសង្ឃឹមយ៉ាងមុតមាំថា ក្រោយបញ្ចប់នូវវគ្គបំប៉ននេះ អស់លោកដែលជាមន្ត្រីនគរបាលយុត្តិធម៌ និងយកចំណេះវិជ្ជាទៅអនុវត្តន៍លើការងារប្រកបដោយជោគជ័យ ៕ដោយ៖ តាកែវ