ព្រះសីហនុ៖ រដ្ឋបាលខេត្តព្រះសីហនុ បានឲ្យដឹងថា នារសៀលម៉ោង ១២ ថ្ងៃទី៣០ ខែកញ្ញា ឆ្នាំ២០១៩ មនុស្ស៣នាក់ បានស្លាប់នៅនឹងកន្លែង ដោយសារគ្រោះថ្នាក់ចរាចររវាងរថយន្ត៣គ្រឿង បុកប៉ះគ្នាបង្កដោយរថយន្តតាក់ស៊ី រថយន្តដឹកថ្ម និងរថយន្តដឹកខ្សាច់ នៅផ្លូវជាតិលេខ៤ ចំណុចចំណោតអូរត្រាវ ។
ជាមួយនឹងហេតុការណ៍គួរឲ្យរន្ធត់នេះ បណ្តាលឲ្យការធ្វើចរាចរណ៍នៅចំណុចនេះ មានការកកស្ទះរាប់ម៉ោង
រដ្ឋបាលខេត្តព្រះសីហនុ សូមការអធ្យាស្រ័យចំពោះប្រជាពលរដ្ឋដែលធ្វើដំណើរឆ្លងកាត់ចំណុចនោះ ដោយហេតុថា កម្លាំងសមត្ថកិច្ច និងក្រុមការងារបានមមារញឹក ដើម្បីសម្រួលការយករថយន្តរងគ្រោះ និងអ្នករងគ្រោះចេញពីកន្លែងកើតហេតុ ។
សូមថ្លែងអំណរគុណ ដល់កងកម្លាំងអាវុធហត្ថ កម្លាំងនគរបាល កម្លាំងប្រជាការពារ មន្ទីរសាធារណការ មន្ទីរសុខាភិបាល និងមន្រ្តីនៃកំពង់ផែស្វយ័តក្រុងព្រះសីហនុ ក្រុមហ៊ុនប្រមូលសំរាម kswm ដែលបានផ្តល់រថយន្តស្ទូច និងគ្រឿងចក្រ ព្រមទាំងជួយសម្រួលចរាចរណ៍ បានរលូន ។
មានគ្រោះថ្នាក់ចរាចរមួយកើតឡើង បង្កដោយរថយន្ត ១គ្រឿងម៉ាក STAREX ពណ៌ស ផ្លាកលេខ កំពត2B-216 អ្នកបើកបរ ឈ្មោះ សេង ភារៈ ភេទប្រុស អាយុ ២៦ឆ្នាំ មុខរបរ រត់តាក់ស៊ី ភូមិល្បើក ស្រុកឈូក ខេត្តកំពត រួមដំណើរមនុស្ស៧នាក់ ( ស្រី ២នាក់ ) មានទិសដៅពី ខេត្តកំពត ឆ្ពោះមក ខេត្តព្រះសីហនុ លុះមកដល់ចំណុចខាងលើ ស្ថានភាពផ្លូវឡើងចំណោត បានវ៉ាជែងរថយន្តធុនធំ ១គ្រឿងម៉ាក HYUNDAI ពណ៌សផ្លាកលេខភ្នំពេញ3D-0144 អ្នកបើកបរមិនស្គាល់អត្តសញ្ញាណ វ៉ាមិនផុតរួចហើយបុករថយន្តធុនធំ ១គ្រឿងទៀត ដែលមានទិសដៅផ្ទុយគ្នា រថយន្តធុនធំ ម៉ាក HYUNDAI ពណ៌ស ពាក់ផ្លាកលេខ ភ្នំពេញ3D-1142 អ្នកបើកបរមិនស្គាល់អត្តសញ្ញាណ បន្ទាប់មកបណ្ដាលឲ្យរថយន្តធុនធំទាំងពីរគ្រឿងបុកគ្នាតែម្ដង ។
តុល្យការគ្រោះថ្នាក់នេះ បណ្ដាលឲ្យស្លាប់មនុស្សចំនួន ៣នាក់ ភេទប្រុស នៅនឹងកន្លែងកើតហេតុ មិនទាន់ស្គាល់អត្តសញ្ញាណ សមត្ថកិច្ចកំពុងស្វែងរកសាច់ញាតិយកទៅធ្វើបុណ្យតាមប្រពៃណី ។
១-អ្នកបើកបររថយន្តធុនធំពាក់ផ្លាកលេខភ្នំពេញ3D-0144 កៀបជាប់ក្នុងរថយន្ត ។
២-អ្នករួមដំណើរលើរថយន្តទេសចរណ៍ចំនួន២នាក់ស្លាប់ នៅនឹងកន្លែងកើតហេតុ ។
ចំណែកអ្នកបើកបររថយន្តបង្កបាននាំខ្លួន មកសាកសួរមកនៅការិយាល័យនគរបាលចរាចរណ៍ផ្លូវគោក ។
រីឯវត្ថុតាង រថយន្ត ០៣គ្រឿង សមត្ថកិច្ចជំនាញ កំពុងចាត់ចែងស្ទូច យកមករក្សាទុកនៅការិយាល័យ នគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ ៕ដោយ៖ស្រីនាថ