ភ្នំពេញ ៖ លោកសុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក បានលើកឡើងនូវពីរចំណុចដែលយើងកំពុងតែ មាននៅក្នុងសង្គមសព្វថ្ងៃនេះគឺ យើងខ្សោយតែមិនទទួល និងយើងខុសតែមិនកែ ដែលជាហេតុនាំឲ្យមានបញ្ហានៅក្នុងសង្គម និងការបង្អាក់ការរីកចម្រើន ក្នុងការបង្ហាញមុខមាត់ប្រទេសជាតិ នៅលើឆាកអន្តរជាតិ។
លោកបានលើកឡើងយ៉ាងដូច្នេះថា យើងខ្សោយតែមិនទទួល និយាយពីខ្សោយ យើងមានចំណុចខ្សោយច្រើនតែអត់ព្រមទទួល ប្រឹងពង្រីកថាខ្លួនខ្លាំង ពង្រីកតួរលេខបិទបាំងភាពខ្សោយរបស់ខ្លួន លឺនរណាថាខ្សោយមិនបានទេ ព្រួតគ្នាទាំងទ័ពទៅរោមខាំគេ ? បើយើងខ្សោយដដែលហ្នឹង ! ជាពិសេសយើងអត់ដឹងខ្លួនឯង ថាខ្លួនជាអ្វីនៅចំណុចណាយើងជាប្រទេសតូចតែ ពោរពេញដោយធនធានធម្មជាតិពីកំណើត ជាប្រទេសក្នុងតំបន់ភូមិសាស្ត្រនយោបាយនៃការប្រទាញប្រទង់ , បើយើងខ្លាំង គឺខ្លាំងដោយសារភូមិសាស្ត្រ បើយើងខ្សោយ ក៏ខ្សោយដោយសារកត្តាហ្នឹងដែរ សំខាន់យើងអ្នកក្រោកឡើងពុះពារតស៊ូដើម្បីខ្លាំង រឿងដែលនាំឲ្យយើងខ្សោយបំផុតគឺ ពលរដ្ឋយើង មន្ត្រីយើងដណ្ដើមគ្នាខ្លាំងតែសម្រាប់ក្រុមគ្រួសារមួយក្ដាប់របស់គាត់ ហេតុអ្វីបានរដ្ឋយើងក្រ ព្រោះមកពីមន្ត្រីយើងសុទ្ធតែអ្នកមាន ដូចនេះកម្លាំងសាមគ្គីដែលក្រោកចាំឱកាសខ្លាំងនោះវាដូចសំណាញ់ដែលដាច់ ពិបាកបង់យកត្រីធំ ទោះយ៉ាងណាក៏ដោយនៅថ្ងៃមួយយើងអាចខ្លាំងបាន តែមុននឹងខ្លាំងត្រូវហ៊ានទទួលស្គាល់ថាពេលនេះយើងខ្សោយ ហើយពេលនេះយើងកំពុងតែត្រដាបត្រដួសទៅរកភាពខ្លាំងដោយប្រឈមដោយសត្រូវសងខាងចាំតែត្របាក់
លោកបន្តថា យើងខុសតែមិនកែ ។ និយាយពីខុស ខុសមួយគរ អ្នកណារិះគន់ល្មមៗ ចោទគេប្រឆាំងតែម្ដង ខុសតាំងពីកម្រិតអាតូមតូចមួយ រហូតធ្វើឲ្យអង្គធាតុនៃប្រទេសទាំងមូលប្រែវាសនា , មន្ត្រីក៏ខុស រាស្ត្រក៏ខុស ទាញអោយវាសនាជាតិទាំងមូលបិះនឹងដើរផ្លូវខុសម្ដងៗ , មន្ត្រីថ្នាក់ស្មើៗមេឃក្រោមជើងព្រះឥន្ទ្រពេលខ្លះនិយាយមួយបន្ទាត់ ខុស ៣ម៉ាត់ សាករិះគន់មើល គេអត់ទទួលទេ លេសឆ្វេងលេសស្ដាំ ការពារកំហុសខ្លួន តែបើរាជការ អស់លោកអ្នកមុខអ្នកការដែលសកម្មបំផុត តាមខ្ញុំសង្កេតគឺគឺសកម្មខាងដណ្ដើមគ្នាយកគុណសម្បត្តិ , មន្ត្រីពូកែៗ គេខឹង គេជ្រេញដែរ តែគេអត់ហ៊ានរិះគន់ ព្រោះគេចង់កែតម្រូវ ដឹងតែរកវិធីកម្ចាត់គេចោល យូយូ ក្លាយជា គ ហើយធ្វើខុសចេះតែខុសបន្តរហូតក្លាយជាវប្បធម៌ ខុសកាន់តែធ្ងន់រហូតខ្លាចនិងទទួលកំហុស៕ ដោយ៖កូឡាប