ភ្នំពេញ ៖ រោងកាហ្វេជាប់មាត់ទន្លេមេគង្គក្រោម ស្ថិតក្នុងភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ ដែលបងប្អូនពលរដ្ឋអ្នកច្បារអំពៅ ត្រូវបានបាក់ស្ទើរតែលិចចូលទៅក្នុងបាតទន្លេទៅហើយ ដោយសារតែរងឥទ្ធិពលធម្មជាតិ ។ ហេតុការណ៍បាក់ច្រាំងនេះ បង្កឱ្យមានការភ្ញាក់ផ្អើលឡើងកាលពីម៉ោង១២ថ្ងៃត្រង់ ថ្ងៃទី២៩ ខែកញ្ញា ឆ្នាំ២០១៩ ។
យោងតាមការរៀបរាប់របស់បុរសចំណាស់ជាម្ចាស់ផ្ទះ និងជាម្ចាស់រោងកាហ្វេបានឱ្យដឹងថា កាលពីប៉ុន្មានថ្ងៃមកនេះ មានភ្លៀងធ្លាក់ខ្លាំងលាយលំជាមួយខ្យល់បោកបក់យ៉ាងខ្លាំងផងដែរ នាំឱ្យមានរលកទឹកទន្លេរឹតតែបោកបក់ផ្ទប់មាត់ច្រាំងកាន់តែខ្លាំង ជាហេតុធ្វើឱ្យសសរជើងរោងកាហ្វេដែលសង់ជាប់នឹងទន្លេត្រូវរង្គើរ និងសសរខ្លះត្រូវប្រេះ ដូច្នេះហើយជាហេតុនាំឱ្យគាត់ និងក្រុមគ្រួសារផ្អាកលក់ និងនាំគ្នាប្រមែប្រមូលអីវ៉ាន់យកចេញ ចៀសវាងការបាក់រលំដោយយថាហេតុណាមួយបង្កឱ្យមានគ្រាះថ្នាក់ដល់មនុស្ស ។
រោងកាហ្វេខាងលើនេះ គឺសង់ជាប់នឹងលំនៅឋានដែលគាត់កំពុងស្នាក់ប្រាស្រ័យជុំគ្រួសារបច្ចុប្បន្ននេះផងដែរ ដែលមានប្រវែង៥០ម៉ែត្រគុណ៥ម៉ែត្រ ហើយពីដើមឡើយរោងកាហ្វេ និងលំនៅឋានរបស់លោក គឺស្ថិតនៅពាក់កណ្តាលទន្លេបច្ចុប្បន្ន គឺប្រមាណ១០ឆ្នាំមុនផ្ទៃទន្លេគឺតូចប៉ុណ្ណោះដែលមានលំនៅឋានពលរដ្ឋជាច្រើន ប៉ុន្តែដោយសារទឹកជំនន់ចេះតែឡើងជន់រហូត ហើយច្រាំងក៏ចេះតែបាក់ ទើបពលរដ្ឋមួយចំនួនសម្រេចចិត្តចាកចេញ ដោយប្តូរទីលំនៅឋានទៅទីទួលនៅកន្លែងផ្សេង។
លំនៅឋានស្នាក់អាស្រ័យរបស់លោកដែលនៅជាប់នៅរោងកាហ្វេនោះ ក៏ប្រឈមនឹងការបាក់ស្រុតចូលទន្លេផងដែរ ព្រោះដីនៅទីនោះ មានលក្ខណៈទន់ជ្រាយ ជាពិសេសផ្ទៃការ៉ូឡា គឺមានការប្រេះស្រាំងខ្លាំងផងដែរ ដែលជាហេតុអាចបង្កឱ្យមានការបាក់រលំនៅឋានចូលទន្លេដោយថាហេតុណាមួយ ។
ជាមួយនឹងគ្រោះថ្នាក់បាក់ច្រាំងទន្លេនេះ លោកជិន ប៊ុនធឿន នាយកប្រតិបត្តិសាខាកាកបាទក្រហមកម្ពុជារាជធានីភ្នំពេញ និងជានាយករងរដ្ឋបាលសាលារាជធានីភ្នំពេញ បានអោយដឹងកាលពីល្ងាចថ្ងៃទី ៣០ ខែ កញ្ញា ឆ្នាំ ២០១៩នេះថា តាមអនុសាសន៍ណែនាំដ៏ខ្ពង់ខ្ពស់របស់ លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ ក្នុងនោះបានអោយសាខាកាកបាទក្រហមកម្ពុជារាជធានីភ្នំពេញ ដឹកនាំក្រុមការងារ ចុះពិនិត្យមើលពីស្ថានភាព និងសហការជាមួយអាជ្ញាធរក្នុងការស្រង់នូវស្ថិតិ ករណីគ្រោះមហន្តរាយធម្មជាតិបាក់ច្រាំងទន្លេ នាវេលាម៉ោង១១ព្រឹក នាថ្ងៃ៣០ ខែកញ្ញានេះដែល ស្ថិតនៅភូមិកណ្តាល១ និងភូមិដើមចាន់១ សង្កាត់ច្បារអំពៅទី២ ខណ្ឌច្បារអំពៅ ដែលហេតុការណ៍នេះ បានបណ្តាលឲ្យបាក់ស្រុតផ្ទះចូលទន្លេបាសាក់ នៅតំបន់ច្រាំងបាក់ចំនួន២ខ្នង ផ្ទះនិងរងផលប៉ះពាល់៧ខ្នង ផ្ទះត្រៀមរុះរើ១ខ្នង សរុប១០ខ្នង ផ្ទះស្មើនឹង១៤គ្រួសារ តែមិនបណ្តាលឲ្យប៉ះពាល់ដល់អាយុជីវិតមនុស្សឡើយ ។
លោកនាយកប្រតិបត្តិសាខាកាកបាទក្រហមកម្ពុជារាជធានីភ្នំពេញ បានឲ្យដឹងទៀតថា នាខណៈនោះ ក្នុងនាមលោក ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ បាននាំនូវការចូលរួមសោកស្តាយ និងចូលរួមរំលែកនូវទុក្ខលំបាក ជាមួយគ្រួសាររងគ្រោះទាំងអស់ ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ។ ជាមួយគ្នានេះ សូមអំពាវនាវដល់បងប្អូនប្រជាពលរដ្ឋទាំងអស់ដែលរស់នៅតាមតំបន់ច្រាំងបាក់ នាមាត់ទន្លេ សូមមានការប្រុងប្រយ័ត្ន ពីការស្រុតបាក់ដីមាត់ច្រាំង បើឃើញស្ថានការណ៍មិនស្រួលត្រូវឆាប់រុះរើផ្ទះ ឬអីវ៉ាន់ និងរាយការណ៍ ជូនអាជ្ញាធរមូលដ្ឋានភ្លាម ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើង ជាយថាហេតុផងដែរ៕ ដោយ ៖ កូឡាប