ខេត្តបន្ទាយមានជ័យ ៖ កម្លាំងជំនាញការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត បន្ទាយមានជ័យ បានរៀបចំសំណុំរឿងបញ្ជូនជនសង្ស័យជាជនជាតិ JORDAN ចំនួន៣នាក់ ក្នុងនោះស្ត្រី១នាក់ រួមទាំងវត្ថុតាងរថយន្ត១គ្រឿង និងសម្ភារមួយចំនួនទៅសាលាដំបូងខេត្តបន្ទាយមានជ័យ នៅរសៀលថ្ងៃទី៣០ ខែកញ្ញា ឆ្នាំ២០១៩នេះ ដើម្បីចាត់ការតាមនីតិវិធីច្បាប់ ។
លោកវរសេនីយ៍ឯក ខែម សុភ័ណ នាយការិយាល័យនគរបាលព្រហ្មទណ្ឌកម្រិតស្រាល បានឲ្យដឹងថា ៖ ជនសង្ស័យជាជនជាតិ JORDAN ចំនួន៣នាក់ គឺមានឈ្មោះ ១/- MUNA RAMADAN RASHED ភេទស្រី អាយុ៤៦ឆ្នាំ ,២/-ឈ្មោះ AHMAD RAMADAN RASHEED SALEH ភេទប្រុស អាយុ៣១ឆ្នាំ ,៣/-ឈ្មោះ KHALED RAMADAN RASHEED SALEH ភេទប្រុស អាយុ៣២ឆ្នាំ ។
លោកនាយការិយាល័យ បានបញ្ជាក់ថា ៖ នៅវេលាម៉ោង៣រសៀល ថ្ងៃទី២៨ ខែកញ្ញា ឆ្នាំ២០១៩ ជនសង្ស័យទាំង៣នាក់នេះ បានជិះរថយន្ត១គ្រឿងម៉ាក LUXUS RX 300 ពណ៌ស ពាក់ផ្លាកលេខ ភ្នំពេញ 2T 8490 បានធ្វើសកម្មភាពចូលក្នុងផ្ទះរបស់ឈ្មោះ សាយ សុភា ភេទស្រី អាយុ ៤៤ឆ្នាំ នៅភូមិកណ្តាលលិច ឃុំស្រះជីក ស្រុកភ្នំស្រុក ខេត្តបន្ទាយមានជ័យ ដោយសួររកទិញបារីរួចដើរចូលទៅយកបារីម៉ាក CAMBO ចំនួន១សុង មកដាក់លើទូដូរប្រាក់ ហើយជនល្មើសនោះ បានដកប្រាក់ចំនួន100ដុល្លារ ឲ្យទៅម្ចាស់ផ្ទះ ហើយពេលនោះឈ្មោះ សាយ សុភា បានរកប្រាក់ដុល្លារអាប់ ជនល្មើសបានយកដៃលូកចូលក្នុងទូប្រាក់ឆក់យកលុយចំនួន 1.000ដុល្លារ ភ្លាមនោះម្ចាស់ផ្ទះឃើញក៏បានទាញប្រវាយប្រតប់គ្នា យកលុយមកវិញ តែមិនបានជនល្មើសបានរត់ចូលរថយន្តបើកចេញគេចខ្លួន ហើយត្រូវជនរងគ្រោះថតបានភាគីរថយន្ត មកប្តឹងនគរបាល ភ្នំស្រុក ជួយអន្តរាគមន៍ តាមចាប់បាននៅភូមិព្រៃមាន់ ឃុំរហាល ស្រុកព្រះនេត្រព្រះ ខេត្តបន្ទាយមានជ័យ នៅយប់ ថ្ងៃដដែល ហើយបានបញ្ជូនខ្លួនមកកាន់ស្នងការដ្ឋាននគរបាលខេត្ត ផែនការងារព្រហ្មទណ្ឌ ដើម្បីចាត់ការបន្តតាមនីតិវិធីច្បាប់ ៕ ដោយ ៖ បញ្ញាស័ក្តិ
