សៀមរាប ៖ នៅវេលាម៉ោង ៥និង៣០នាទីព្រឹក ថ្ងៃទី១ ខែតុលា ឆ្នាំ២០១៩ មានករណីគ្រោះថ្នាក់ចរាចរ នៅលើផ្លូវជាតិលេខ ៦A ភូមិគោករលួស ឃុំដំដែក ស្រុកសូទ្រនិគម ខេត្តសៀមរាប រវាងរថយន្តក្រុងរបស់ក្រុមហ៊ុនរិទ្ធមុនី បានបុកប៉ះជាមួយនឹងរថយន្ត ម៉ាកកាមរីឆ្លាម បណ្តាលឲ្យស្លាប់មនុស្សម្នាក់។
នគរបាល បានឲ្យដឹងថា រថយន្ត ក្រុងរបស់ក្រុមហ៊ុនរិទ្ធមុនី ម៉ាកAERO QUEENHI CLASS ពណ៌ខៀវ លាយស ពាក់ផ្លាកលេខ ភ្នំពេញ ៣C.៦៨៥៦ ធុនធំ ៤៥កៅអី
បើកបរដោយជនមិនស្គាល់អត្តសញ្ញាណ ក្នុងទិសដៅពីកើតទៅលិច បានបុកប៉ះជាមួយនឹងរថយន្ត ម៉ាកកាមរីឆ្លាមពណ៌សម្បកឪឡឹក ពាក់ផ្លាកលេខ កំពង់ចាម២A.៣០៨៣ បើកបរដោយឈ្មោះ សឿង គា ភេទប្រុស អាយុ ៤២ ឆ្នាំ សញ្ជាតិ ខ្មែរជនជាតិខ្មែរ មានទីលំនៅភូមិស្រយ៉ូវ ឃុំពុកយុក ស្រុកស្ទឹងសែន ខេត្តកំពង់ធំ
បើកបរក្នុងទិសដៅពីលិចទៅកើត (បញ្ច្រាសទិសគ្នា) បណ្ដាលឲ្យស្លាប់ ឈ្មោះ សឿង គា ជា អ្នកបើកបររថយន្តម៉ាកកាមរីឆ្លាម បណ្តាលឲ្យខូចខាតរថយន្តម៉ាកកាមរីឆ្លាម (ធ្ងន់) និងខូចខាតរថយន្តក្រុង ៤៥កៅអី(ធ្ងន់) ។
ក្រោយពេលកើតហេតុ សមត្ថកិច្ចបានចុះវាស់វែង និងបញ្ជូនជនរងគ្រោះទៅមន្ទីរពេទ្យ និងសាកសពជនរងគ្រោះ សមត្ថកិច្ចបានប្រគល់ក្រុមគ្រួសារសព យកទៅធ្វើបុណ្យតាមប្រពៃណី ចំណែកអ្នកបើកបររថយន្តក្រុង បានចុះរត់គេចខ្លួនបាត់ពីកន្លែងកើតហេតុ ហើយសមត្ថកិច្ចកំពុងធ្វើការស្រាវជ្រាវរកជនសង្ស័យ ដែលរត់គេចខ្លួន ៕ ដោយ៖កូឡាប