ភ្នំពេញ៖ រដ្ឋបាលជលផល បានចេញសេចក្ដីជូនដំណឹង ស្ដីពី រដូវបើកនេសាទ ឆ្នាំ២០១៩-២០២០ដែលចាប់ពីថ្ងៃទី១ ខែតុលា ដល់ថ្ងៃទី៣១ ខែឧសភា។
សេចក្ដីជូនដំណឹង បានឲ្យដឹងថា រដូវបើកនេសាទសម្រាប់ ឆ្នាំ២០១៩-២០២០ ត្រូវបានកំណត់ គឺ ចាប់ពីថ្ងៃទី១ ខែតុលា ដល់ថ្ងៃទី៣១ ខែឧសភា ចំពោះដែននេសាទទឹកសាប ដែលស្ថិតនៅខាងជើង ស្របទន្លេចតុមុខ ដែលមានខេត្តទាំងអស់ ជុំវិញបឹងទន្លេសាប និងបណ្តាខេត្ត កំពង់ចាម ត្បូងឃ្មុំ ក្រចេះ រតនគីរី មណ្ឌលគិរី ព្រះវិហារ ប៉ៃលិន ឧត្តរមានជ័យ និងមួយផ្នែកក្នុងភូមិសាស្ត្ររាជធានីភ្នំពេញ ខេត្តកណ្តាល ដែលនៅប៉ែកខាងជើងទន្លេចតុម្មុខ។ ដោយឡែក ខេត្តស្ទឹងត្រែង ចាប់ពីថ្ងៃទី១ ខែតុលា រហូតដល់ថ្ងៃទី១ ខែឧសភា។ ចាប់ពីថ្ងៃទី១ ខែវិច្ឆិកា ដល់ថ្ងៃទី៣០ ខែមិថុនា ចំពោះដែននេសាទទឹកសាប ដែលស្ថិតនៅខាងត្បូងខ្សែ ស្របទន្លេចតុម្មុខ រួមមាន៖ ខេត្តព្រៃវែង តាកែវ កំពង់ស្ពឺ ស្វាយរៀង និងមួយផ្នែកក្នុងភូមិសាស្ត្ររាជធានីភ្នំពេញ ខេត្តកណ្តាល ដែលនៅប៉ែកខាងត្បូងទន្លេចតុម្មុខ។
នៅក្នុងរយៈពេលបើកនេសាទនេះ ប្រជាពលរដ្ឋអាចធ្វើអាជីវកម្មនេសាទ ដោយឧបករណ៍នេសាទជាលក្ខណៈគ្រួសារ ដែលអនុញ្ញាតនៅក្នុងដែននេសាទទឹកសាប។ ក្រៅពីនេះ ការធ្វើនេសាទត្រូវ៖ មានលិខិតអនុញ្ញាតឲ្យធ្វើអាជីវកម្មនេសាទ ។ មានកាតព្វកិច្ចបង់ពន្ធ និងថ្លៃឈ្នួលនេសាទជូនរដ្ឋ។ គោរពតាមបទបញ្ជាដែលមានចែង ក្នុងលិខិតអនុញ្ញាតឲ្យធ្វើនេសាទ។
លោកអេង ជាសាន ប្រធានរដ្ឋបាលជលផល បានថ្លែងក្នុងសេចក្តីជូនដំណឹងរបស់រដ្ឋបាលជលផល នៃក្រសួងកសិកម្មថា ចំពោះអ្នកនេសាទ ដែលមានបំណងធ្វើនេសាទដោយប្រើប្រាស់ឧបករណ៍ ម៉ាញ់ នៅដងទន្លេមេគង្គ និងដងទន្លេសាប ក្នុងទីតាំងដែលរាជរដ្ឋាភិបាលបានអនុញ្ញាត ត្រូវអញ្ជើញមកទំនាក់ទំនងចុះឈ្មោះសុំលិខិត អនុញ្ញាតឲ្យធ្វើនេសាទ នៅតាមខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទពាក់ព័ន្ធ ដើម្បីបានប្រកបមុខរបរនេសាទ និងទទួលការណែនាំ ពីសមត្ថកិច្ចជំនាញជលផលអំពីបច្ចេកទេស និងបទបញ្ជានានា ដែលពាក់ព័ន្ធដល់ការធ្វើនេសាទ ដើម្បីធានានូវនិរន្តរភាពនៃធនធានជលផល៕ដោយ៖កូឡាប
