តាកែវ ៖ ព្រះសង្ឃមួយអង្គ គង់នៅវត្តថ្មអន្ទង ត្រូវបានសមត្ថកិច្ចធ្វើការឃាត់ខ្លួន និងចាប់ផ្សឹកភ្លាមៗ ក្រោយឆែកឆេរឃើញថ្នាំញៀនប្រភេទម៉ាទឹកកក ចំនួន៣កញ្ចប់ ក្នុងនោះមាន២កញ្ចប់មិនទាន់ជក់ និង១កញ្ចប់ទៀតជក់រួច កាលពីវេលាម៉ោង៥និង៣០នាទីល្ងាច ថ្ងៃទី៣០ ខែកញ្ញា ឆ្នាំ២០១៩ នៅចំណុចវត្តថ្មអន្ទង ភូមិឱភាសាំង ឃុំកណ្តឹង ស្រុកបាទី ខេត្តតាកែវ ។
សមត្ថកិច្ចបានឲ្យដឹងថា ព្រះសង្ឃអង្គនោះ មានព្រះនាម កី បូរី ព្រះជន្ម២១វស្សា គង់នៅវត្តថ្មអន្ទង ត្រូវបានចៅអធិការវត្តថ្មអន្ទង ដឹកនាំកម្លាំងជំនាញរបស់អធិការដ្ឋាននគរបាលស្រុកបាទី សហការជាមួយនគរបាលកម្លាំងប៉ុស្តិ៍កណ្តឹង ចុះបង្ក្រាប ពាក់ព័ន្ធករណីប្រើប្រាស់នូវសារធាតុញៀន នៅក្នុងវត្តថ្មអន្ទង ដកហូតបានក្រាមពណ៌ស ប្រភេទ ម៉ាទឹកកកចំនួន១កញ្ចប់តូច និងថង់ក្រាមពណ៌ស ម៉ាទឹកកក ជក់រួច ចំនួន១កញ្ចប់។ បន្ទាប់ពីឃាត់ខ្លួនហើយនោះ ចៅអធិការវត្តការិយាល័យធម្មការ និងសាសនាស្រុកបាទី និងលោកអភិបាលស្រុកបាទី បានធ្វើការចាប់ផ្សឹក រួចបញ្ជូនបន្តមកកាន់ អធិការដ្ឋាននគរបាលស្រុកបាទី ដើម្បីចាត់ការតាមច្បាប់បន្តទៀត៕ដោយ៖បញ្ញាស័ក្តិ
