តាកែវ ៖ ក្រុងដូនកែវ ខេត្តតាកែវ ក្រោយទទួលនូវឥទ្ធិពលខ្យល់សំពាធទាប បានធ្វើអោយក្រុងដូនកែវ ប៉ុន្មានថ្ងៃកន្លងមកនេះទទួលរងនៅទឹកភ្លៀងធ្លាក់មកយ៉ាងជន់ជោរ បណ្តាលអោយបណ្តាញប្រព័ន្ធផ្លូវលូរបង្ហូរទឹក ហូរមិនទាន់មានការជន់លិច នៅតាមផ្ទះប្រជាពលរដ្ឋ ផ្លូវថ្នល់ និងផ្សារតាកែវផងនោះ លោក កង អាណាន់ អភិបាលក្រុងដូនកែវ រួមជាមួយនិងមន្ត្រីជំនាញ បានចុះពិនិត្យស្ថានភាពផ្លូវបង្ហូរទឹក នៅតាមប្រឡាយរំដោះទឹកសំខាន់ៗចេញពីក្រុង ដោយប្រើប្រាស់អេស្កាវ៉ាទ័រ ស្តារភក់ ឫសឈើ សំរាមចេញ និងកាយលូរតូចៗដែលដាក់ដោយបងប្អូនប្រជាពលរដ្ឋនោះចេញ ដើម្បីបញ្ជៀសការជន់លិច នៅពេលមានភ្លៀងធ្លាក់ ។
ការចុះស្តារប្រឡាយនេះដែរ គឺធ្វើនៅចំណុចភូមិឡូរី ភូមិផ្សារតាកោរ ក្នុងសង្កាត់រកាក្នុង ក្រុងដូនកែវ ដោយធ្វើការស្តារភក់ជ្រាំ និងសំរាមចេញ បានចម្ងាយជាង ២គីឡូហើយ បើគិតមកដល់រសៀលថ្ងៃទី០១ ខែតុលា ឆ្នាំ២០១៩នេះ ។
លោក កង អាណាន់ អភិបាល ក្រុងដូនកែវ បានអោយដឹងថា ការចុះនាំគ្រឿងចក្រមកស្ដារប្រឡាយទឹកបណ្ដោះអាសន្ននេះ គឺអាជ្ញាធរក្រុងបានចុះធ្វើការស្ដារ ពេញ ១ថ្ងៃមកហើយ ហើយការចុះមកស្ដារនាពេលនេះ គឺបានមើលឃើញថា ប្រឡាយទឹក ដែលជាប្រឡាយរំដោះទឹកយ៉ាងសំខាន់ក្នុងក្រុង ត្រូវបានកកស្ទះដោយសារ សំរាម ដើមឈើដុះស៊ប់ទ្រុបក្នុងប្រឡាយ និងមានភក់ល្បាប់ច្រើន និងមូលហេតុមួយទៀតគឺបណ្តាលមកពីការដាក់លូរតូចៗហើយចាក់ដីលុបពីលើប្រឡាយ ធ្វើអោយទឹកហូរមិនទាន់ ដែលជាហេតុបង្កឲ្យមានការកកស្ទះមុខទឹក រំដោះចេញពីក្រុងដូនកែវ ដែលបង្កឲ្យជន់លិចផ្ទះបងប្អូនប្រជាពលរដ្ឋ និងផ្លូវសាធារណៈនៅន្លែងមួយចំនួនក្នុងក្រុងដូនកែវ ។ ដូច្នេះនៅពេលបងប្អូនប្រជាពលរដ្ឋមានគោលបំណងចង់ដាក់លូរលុបលើមាត់ប្រឡាយដើម្បីមានផ្លូវចូលលំនៅដ្ឋាននោះ ពួកគាត់ត្រូវតែមកសុំការអនុញ្ញាតពីមន្ត្រីជំនាញឫអាជ្ញាធរជាមុនសិនទើបអាចដាក់លូរ និងចាក់ដីលុបបាន ៕ ដោយ ៖ តាកែវ