តាកែវ៖ នៅក្នុងកិច្ចប្រជុំគណៈបញ្ជាការឯកភាពខេត្តតាកែវ នាព្រឹកថ្ងៃទី២ ខែតុលា ឆ្នាំ២០១៩នេះ លោក អ៊ាក ផល្លា ប្រធានសាលាដំបូង និងលោក ជីវ ចាន់តារា ព្រះរាជាអាជ្ញាអមសាលាដំបូងខេត្តតាកែវ បានធ្វើការស្នើសុំឲ្យអាជ្ញាធរស្រុកក្រុងទាំង១០ នៃខេត្តតាកែវ ចូលរួមផ្សព្វផ្សាយសេចក្តីប្រកាសព័ត៌មានរបស់ក្រសួងយុត្តិធម៌ ដើម្បីឲ្យបងប្អូនប្រជាពលរដ្ឋបានយល់ដឹងច្បាស់ អំពីផ្លូវច្បាប់ ដែលពាក់ព័ន្ធជាមួយនិងផែនការវិលត្រឡប់ មកកម្ពុជារបស់ទណ្ឌិត សម រង្ស៊ី ព្រោះផែនការនេះ មិនមែនជារឿងលទ្ធិប្រជាធិបតេយ្យ និងសិទ្ធិមនុស្សនោះទេ ប៉ុន្តែគឺជាផែនការប៉ុនប៉ងធ្វើរដ្ឋប្រហារ តាមរយៈការប្រើប្រាស់វិធីញុះញង់អុជអាលបំផុសបំផុល និងការប្រើឧបាយកលបោកបញ្ជោត ដើម្បីអូសទាញប្រមូលកម្លាំងប្រជាជនស្លូតត្រង់ និងកម្លាំងប្រដាប់អាវុធរបស់ជាតិ ឲ្យបះបោរតាមរូបភាព ជាបដិវត្តន៍ដោយហឹង្សា ក្នុងគោលដៅផ្តួលរំលំរាជរដ្ឋាភិបាលនៃព្រះរាជាណាចក្រកម្ពុជា ។
ក្រសួងយុត្តិធម៌បានចាត់ទុកសកម្មភាពជុំវិញផែនការខាងលើនេះ គឺជាអំពើរិទ្ធង្សនា ដែលជាឧក្រិដ្ឋកម្មធ្ងន់ធ្ងរបំផុត ប៉ះពាល់ដល់សន្តិសុខនៃរដ្ឋ ។
លោក ជីវ ចាន់តារ៉ា ព្រះរាជអាជ្ញាអមសាលាដំបូងខេត្តបានបន្តថា ចំពោះរាល់បុគ្គលទាំងឡាយ ដែលចូលរួមក្នុងគម្រោងការនេះ ត្រូវជាប់ទោសពី បទល្មើសរួមគំនិតក្បត់ ដែលជាបទឧក្រិដ្ឋមានចែង និងផ្តន្ទាទោសតាមបញ្ញត្តិមាត្រា ៤៥៣ នៃក្រមព្រហ្មទណ្ឌ ដោយដាក់ពន្ធនាគារ ពី ៥ឆ្នាំ ទៅ ១០ឆ្នាំ ហើយទោសនេះ ត្រូវបន្ថែមទម្ងន់ដាក់ពន្ធនាគារពី ១០ ទៅ ២០ឆ្នាំ ប្រសិនបើជនល្មើស គឺជាអ្នករាជការសាធារណៈ ។ ដោយឡែក ចំពោះបុគ្គលណាដែលបានចូលរួមក្នុងអំពើរួមគំនិតក្បត់ខាងលើ ហើយបុគ្គលនោះបានសារភាពចំពោះមុខអាជ្ញាធរ មានសមត្ថកិច្ច និងសហការបង្ក្រាបបទល្មើសនេះ និងត្រូវទទួលបានការលើកលែង ឲ្យរួចផុតពីការទទួលទោស ដោយអនុលោមតាមបញ្ញត្តិមាត្រា ៤៥៤ នៃក្រមព្រហ្មទណ្ឌ នៃព្រះរាជាណាចក្រកម្ពុជា ។
ជុំវិញការលើកឡើងនៅក្នុងអង្គប្រជុំគណៈបញ្ជាការឯកភាពខេត្ត របស់ស្ថាប័នតុលាការនេះដែរ លោក អ៊ូច ភា អភិបាលខេត្តតាកែវ បានជំរុញដល់កងកម្លាំងសមត្ថកិច្ចពាក់ព័ន្ធទាំងអស់ ត្រូវចាត់វិធានការឲ្យបានម៉ឺងម៉ាត់បំផុត និងតឹងរ៉ឹងបំផុតចំពោះឧក្រិដ្ឋកម្មប្រឆាំង និងសន្តិសុខនៃរដ្ឋខាងលើ ដើម្បីធានាការពារ និងថែរក្សាសន្តិភាព ស្ថិរភាពសង្គម របស់ប្រទេសជាតិ និងសេចក្តីសុខសាន្តរបស់ ប្រជាជនកម្ពុជា ។
ទន្ទឹមនិងការជំរុញចាត់វិធានការតឹងរ៉ឹងនេះ ដែលលោកអភិបាលខេត្តតាកែវ ក៏បានធ្វើការអំពាវនាវ ដល់បងប្អូនប្រជាពលរដ្ឋទាំងអស់ សូមកំចាញ់ឧបាយកលបោកបញ្ឆោតរបស់ឧក្រិដ្ឋជន ដែលអាចនាំឲ្យខ្លួនជាប់ពាក់ព័ន្ធ និងអំពើរួមគំនិតក្បត់ ដែលត្រូវមានទោសធ្ងន់ធ្ងរតាមច្បាប់ សូមចូលរួមប្រឆាំងទាំងអស់គ្នាទៅលើឧក្រិដ្ឋកម្ម បំផ្លិចបំផ្លាញជាតិខាងលើនេះ ៕ដោយ៖តាកែវ