ភ្នំពេញ៖ អង្គភាពប្រឆាំងអំពើពុករលួយ និងវិស័យឯកជន បើកអង្គសិក្ខាសាលា ស្តីពី “ការចូលរួមរបស់ធុរកិច្ចក្នុងការប្រយុទ្ធប្រឆាំងអំពើពុករលួយនៅកម្ពុជា” នៅសណ្ឋាគារសាន់វេភ្នំពេញ ថ្ងៃទី២ ខែតុលា ឆ្នាំ២០១៩។
សិក្ខាសាលានេះ មានការចូលពីលោក បណ្ឌិត ឱម យិនទៀង ប្រធានអង្គភាពប្រឆាំងអំពើពុករលួយ (ACU) នៃព្រះរាជាណាចក្រកម្ពុជា
និង លោក Luke Arnold អនុប្រធានបេសកកម្មការទូត នៃស្ថានទូតអូស្ត្រាលីប្រចាំនៅកម្ពុជា លោក FranceBoo Checel ទីប្រឹក្សាការប្រឆាំងអំពើពុករលួយ អង្គការសហប្រជាជាតិទទួលបន្ទុកគ្រឿងញៀន និងបទឧក្រិដ្ឋ (UNODC) ប្រចាំតំបន់អាស៊ីអាគ្នេយ៍និងប៉ាស៊ីហ្វិក។
លោកទេសរដ្ឋមន្រ្តី បានថ្លែងថា សិក្ខាសាលាស្តីពីការចូលរួមរបស់វិស័យធុរកិច្ច ក្នុងការប្រយុទ្ធប្រឆាំងអំពើពុករលួយ នៅកម្ពុជា សហការរៀបចំដោយស្ថាប័នចំនួន៥រួមមាន ការិយាល័យអង្គការសហប្រជាជាតិទទួលបន្ទុកគ្រឿងញៀន និងបទឧក្រិដ្ឋ
(UNODC), អង្គភាពប្រឆាំងអំពើពុករលួយ, សភាពាណិជ្ជកម្មអឺរ៉ុប (EuroCham), តំបន់សេដ្ឋកិច្ចពិសេសភ្នំពេញ
(PPSEZ), សហព័ន្ធនិយោជកនិងសមាគមពាណិជ្ជកម្មកម្ពុជា (CAMFEBA) និងគាំទ្រដោយរដ្ឋាភិបាល
អូស្ត្រាលី។
លោកបានបន្ថែមថា សិក្ខាសាលានេះ ត្រូវបានរៀបចំឡើងក្នុងគោលបំណង កៀរគរការចូលរួមរបស់សហគមន៍ធុរកិច្ចនៅកម្ពុជា រួម
ជាមួយតំណាងរាជរដ្ឋាភិបាល សង្គមស៊ីវិល ពិភាក្សាលើការរួមគ្នាដោះស្រាយបញ្ហាអំពើពុករលួយ ក្នុងវិស័យឯកជន
ដោយកំណត់នូវ ឧត្តមានុវត្តន៍នៃការពង្រឹងការបង្ការទប់ស្កាត់អំពើពុករលួយ ក្នុងកិច្ចលទ្ធកម្មសាធារណៈ និងបញ្ហាអំពើពុក
រលួយនៃភាពជាដៃគូរវាងវិស័យឯកជន និងសាធារណៈ។ ដំណោះស្រាយនិងការពង្រឹងសុចរិតភាពធុរកិច្ចក្នុងវិស័យឯកជន
តាមរយៈការចែករំលែកបទពិសោធន៍ ពីភាគីពាក់ព័ន្ធជាអ្នកជំនាញ អ្នកអនុវត្តន៍ផ្ទាល់លើការងារ មកពីអង្គការអន្តរជាតិ
ស្ថាប័នសាធារណៈ វិស័យឯកជន និងសង្គមស៊ីវិលផងដែរ លើប្រធានបទប្រទាក់ក្រឡាគ្នាចំនួន4រួមមាន 1. ក្របខ័ណ្ឌបទដ្ឋានអន្តរជាតិនៃការប្រឆាំងអំពើពុករលួយក្នុងវិស័យឯកជន 2. ក្របខ័ណ្ឌច្បាប់សម្រាប់ការដោះស្រាយ អំពើពុករលួយប្រឈមដោយធុរកិច្ចនៅកម្ពុជា 3. អភិក្រមក្រុមហ៊ុនធានានូវសុថតភាពធុរកិច្ច និងបទពិសោធន៍ នៃការអនុវត្តការបង្ការទប់ស្កាត់អំពើពុករលួយ 4. លើកកម្ពស់សកម្មភាពរួមសម្រាប់សុចរិតភាពធុរកិច្ច ។
លោកប្រធានអង្គភាពប្រឆាំងអំពើពុករលួយ បានមានប្រសាសន៍ថា គោលបំណងនៃសិក្ខាសាលានេះ គឺស្របនឹងសភាពការណ៍ក្នុងប្រទេស និងអន្តរជាតិ ក្នុងការបន្តពង្រឹងការចូលរួមរបស់វិស័យឯកជន ក្នុងការប្រយុទ្ធប្រឆាំងអំពើពុករលួយ ដើម្បីកម្ពុជាបន្តរក្សាបាន និងធ្វើឱ្យប្រសើរឡើងនូវបរិយាកាសធុរកិច្ច អំណោយផលដល់ការវិនិយោគប្រកបដោយចីរភាព ជំរុញកំណើនសេដ្ឋកិច្ចគួរជាទីគាប់
ចិត្តបន្តទៀត (កំណើនសេដ្ឋកិច្ចក្នុងរង្វង់ជាង 8% ក្នុងមួយ១ឆ្នាំក្នុងទសវត្សរ៍កន្លង) ក៏ដូចជាការឆ្លើយតបទៅនឹងកាតព្វកិច្ចរបស់កម្ពុជា ក្នុងឋានៈជារដ្ឋភាគីនៃអនុសញ្ញាអង្គការសហប្រជាជាតិប្រឆាំងអំពើពុករលួយ (UNCAC)ពាក់ព័ន្ធការបង្ការទប់ស្កាត់អំពើពុករលួយ ក្នុងវិស័យឯកជន និងក្នុងកិច្ចលទ្ធកម្មសាធារណៈ ដែលជាកម្មវត្ថុនៃការត្រួតពិនិត្យការអនុវត្តសម្រាប់ជុំទី២នេះ ។
សិក្ខាសាលានេះ ក៏បានឆ្លុះបញ្ចាំងនូវឆន្ទៈ ការប្តេជ្ញា សហការរួមគ្នាបន្តប្រយុទ្ធប្រឆាំងអំពើពុករលួយពីគ្រប់ភាគីពាក់ព័ន្ធបន្ថែមកិច្ចសហការកន្លងមក ដូចជា ការចូលរួមគោរពច្បាប់ ការចូលរួមក្នុងគំនិតផ្តួចផ្តើមប្រឆាំងអំពើពុករលួយផ្សេងៗ ដាក់ចេញដោយអង្គភាពប្រឆាំងអំពើពុករលួយ ការចូលរួមរៀបចំនិងដាក់ចេញនូវសៀវភៅណែនាំស្តីអំពីកម្មវិធីប្រឆាំងអំពើពុករលួយ សម្រាប់ធុរកិច្ចនៅកម្ពុជា និងកិច្ចសហការផ្សេងៗទៀត ។ អ.ប.ព. សូមបញ្ជាក់ពីការគាំទ្រតាមគ្រប់រូបភាព ក្នុងសមត្ថកិច្ចរបស់ខ្លួន ដល់វិស័យឯកជន ក្នុងការប្រកបធុរកិច្ចស្អាតស្អំនៅកម្ពុជា ។
លោកទេសរដ្ឋមន្រ្តី សូមលើកទឹកចិត្តដល់សិក្ខាកាមទាំងអស់ឱ្យចូលរួម និងទាញយកប្រយោជន៍ពីវេទិកានៃសិក្ខាសាលានេះ តាម
រយៈការទទួលយកបទពិសោធន៍ ដែលបានចែករំលែកដោយភាគីពាក់ព័ន្ធកម្រិតជាតិ អន្តរជាតិ ពីវិស័យសាធារណៈឯកជន និងអង្គការសង្គមស៊ីវិល លើកឡើងពិភាក្សារកដំណោះស្រាយលើបញ្ហាដែលខ្លួនជួបប្រទះ និងរួមគ្នាកំណត់នូវឧត្តមានុវត្តន៍ នៃការបង្ការទប់ស្កាត់អំពើពុករលួយ តាមរយៈគំនិតផ្តួចផ្តើមផ្សេងៗ ស្របតាមបរិបទ និងកាលៈទេសៈជាក់ស្តែង។
ឆ្លៀតក្នុងឱកាសនេះ លោកឱម យ៉ិនទៀង ថ្លែងអំណរគុណដល់អង្គការ UNODC ដែលមានលោក Francesco Checci ទីប្រឹក្សា
ប្រចាំតំបន់ជាតំណាងវាគ្មិន និងដៃគូសហការ ដែលបានគាំទ្រ និងប្រឹងប្រែងរៀបចំឲ្យសិក្ខាសាលាដ៏មាន
សារសំខាន់នេះ លេចចេញជារូបរាងឡើង ។ លោកថា “ខ្ញុំក៏សូមអរគុណចំពោះសិក្ខាកាមចូលរួមទាំងអស់ដែលបានជួបជុំ
គ្នានៅថ្ងៃនេះ ដើម្បីចែករំលែកចំណេះដឹង ផ្លាស់ប្តូរបទពិសោធន៍ និងពិគ្រោះយោបល់ ឈានទៅរួមគ្នាដាក់ចេញនូវ
អនុសាសន៍ជាគោលនយោបាយ ដើម្បីពង្រឹងបរិយាកាសធុរកិច្ចនៅកម្ពុជា”៕ដោយ៖កូឡាប
