រហូតមកដល់ពេលនេះ ក្រុមជួយសង្រ្គោះបានរកឃើញសាកសពមនុស្សចំនួន ៤នាក់ហើយ បន្ទាប់ពីមានហេតុការណ៍បាក់ស្ពានប្រវែង ១៤០ម៉ែត្រនៅតៃវ៉ាន់ ខណៈក្រុមសង្រ្គោះនៅបន្តដុតដៃដុតជើង ស្វែងរកមនុស្ស ២នាក់ទៀតដែលកំពុងបាត់ខ្លួន។
ភ្នាក់ងារសង្រ្គោះបានឲ្យដឹងថា សាកសពចំនួន ២ត្រូវបានរកឃើញនៅក្នុងទឹកក្បែរទូកមួយគ្រឿង ដែលជាប់ក្រោមគំនរស្ពាន ខណៈសាកសពផ្សេងទៀតត្រូវបានរកឃើញ នៅក្បែរទូកដែលត្រូវបំផ្លាញយ៉ាងដំណំដោយសារស្ពានបាក់។
ក្នុងហេតុការណ៍ដ៏រន្ធត់នោះ ក៏បណ្តាលឲ្យមនុស្ស ១២នាក់រងរបួសផងដែរ រួមមានជនជាតិហ្វីលីពីនចំនួន ៦នាក់ កម្មករទូកនេសាទជនជាតិឥណ្ឌូណេស៊ីចំនួន ៣នាក់ អ្នកបើកបរឡានដឹកប្រេងដែលធ្លាក់ចូលក្នុងទឹក និងឆ្មាំសមុទ្រចំនួន ២នាក់។
បន្ទាប់ពីបាក់ស្ពាននៅកំពង់ផែ Nanfangao រថយន្តដឹកប្រេងបានធ្លាក់ចូលទៅក្នុងទឹក បណ្តាលឲ្យឆេះជាភ្លើង និងបង្កជាភ្លើង និងផ្សែងយ៉ាងខ្លាំង។
សូមបញ្ជាក់ថា តៃវ៉ាន់គឺជាតំបន់ឧស្សាហកម្មត្រីដ៏ធំ ហើយអ្នកដែលធ្វើការនៅលើទូកនេសាទ ភាគច្រើនជាកម្មករ ទទួលបានកម្រៃពលកម្មទាប មកពីប្រទេសជាច្រើនដូចជា ប្រទេសហ្វីលីពីន ឥណ្ឌូណេស៊ី និងវៀតណាមជាដើម។
កាលពីឆ្នាំ ២០០៩ ស្ពានចំនួន ២ត្រូវបានបំផ្លាញដោយខ្យល់ព្យុះទីហ្វូងមរកត ដែលបណ្តាលឲ្យមនុស្សច្រើនជាង ៤០០នាក់ស្លាប់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia