ភ្នំពេញ៖ សម្តេចតេជោហ៊ុន សែន បានអបអរសាទរចំពោះ លទ្ធផលនៃការប្រឡងមធ្យមសិក្សាទុតិយភូមិ(បាក់ឌុប) ដែលបានខិតខំប្រឡងសម្រេចនូវភាពជោគជ័យ ទោះបីជាពេលប្រឡងនោះយើងបានជួបនូវគ្រោះទឹកជំនន់ក៏ដោយ។
សម្តេចតេជោហ៊ុនសែនអញ្ជើញប្រគល់សញ្ញាបត្រដល់និស្សិតនៃសាកលវិទ្យាល័យប៊ែលធី(BELTEI) អន្តរជាតិជាង១ពាន់នាក់ និងប្រកាសផ្សព្វផ្សាយសៀវភៅ ហ៊ុនសែនកម្ពុជា។ សៀវភៅ ហ៊ុនសែនកម្ពុជា ដែលត្រូវបានចាប់ផ្តើមស្រាវជ្រាវនិពន្ធកាលពីខែសីហា ឆ្នាំ២០១៥ ហើយបានបញ្ចប់ជាស្ថាពរនៅខែឧសភា ឆ្នាំ២០១៩។
សម្តេចតេជោបានថ្លែងអំណរគុណ ចំពោះអាជ្ញាធរពាក់ព័ន្ធទាំងអស់ ដែលដែលបានចូលរួមយ៉ាងសកម្មចាត់វិធានការ ដោះស្រាយនិងជួយដល់បងប្អូនប្រជាពលរដ្ឋដែល បានរងគ្រោះដោយទឹកជំនន់កន្លងទៅថ្មីៗនេះ។ សម្តេចតេជោបានបញ្ជាក់ថា នៅថ្ងៃទី៧តុលាខាងមុខនេះ សម្តេចនឹងអញ្ជើញជួបជាមួយសិស្សនិន្ទេស(A) ចំនួន៤៤៣នាក់នៅវិមានសន្តិភាព ដើម្បីលើកទឹកចិត្ត និងផ្តល់រង្វាន់លើកទឹកចិត្តដល់ពួកគេ។
សម្តេចតេជោនាយករដ្ឋមន្ត្រីក៏បានមានប្រសាសន៍អំពីសារសំខាន់ នៃគោលនយោបាយបើកទូលាយ នៃវិស័យអប់រំឯកជន ដែលមានសារសំខាន់បំផុត ក្នុងការអភិវឌ្ឍន៍ប្រទេសជាតិ ជាពិសេសធ្វើឲ្យធនធានមនុស្សរបស់យើងកាន់តែ មានភាពល្អប្រសើរ។ សម្តេចតេជោបានជំរុញឲ្យនិស្សិតជ័យលាភីទាំងអស់ ត្រូវខិតខំប្រឹងប្រែងបន្ថែមទៀត ជាពិសេសដើរឲ្យទាន់ បច្ចេកវិទ្យា និងបដិវត្តឧស្សាហកម្មទី៤ ដើម្បីរួមចំណែកក្នុងការអភិវឌ្ឍប្រទេសជាតិ ឲ្យកាន់តែរីកចម្រើនទៅមុខ។
នៅថ្ងៃនេះសម្តេចតេជោនាយករដ្ឋមន្ត្រី បានរំលឹកពីថ្ងៃដែលប្រទេសកម្ពុជា បានចាប់ផ្តើមធ្លាក់ចូលក្នុងរបបវាលពិឃាត សម័យប៉ុលពត ដែលពេលនោះប្រជាជនក្នុងទីក្រុងភ្នំពេញទាំងអស់ ត្រូវបានគេជម្លៀសទៅទីជនបទ ហើយពេលនោះទីក្រុងភ្នំពេញ គឺគ្មានមនុស្សនៅ។ កម្ពុជាត្រូវជួបរបបវាលពិឃាត រហូតដល់ថ្ងៃ៧មករាឆ្នាំ១៩៧៩ ទើបយើងបានរំដោះប្រទេសជាតិ ពីរបបដ៏ឃោរឃៅនេះវិញ ហើយចាប់ផ្តើមកសាងនិងអភិវឌ្ឍន៍ ប្រទេសជាតិពីបាតដៃទទេ។ សម្តេចតេជោនាយករដ្ឋមន្ត្រី បានមានប្រសាសន៍ដោយក្តីមោទភាព ចំពោះភាពរីកចម្រើន នៃវិស័យអប់រំរបស់ប្រទេសកម្ពុជា ដែលកម្ពុជាបានចាប់ផ្តើមឡើងពីចំណុចសូន្យ ដែលពេលនោះការចាប់ផ្តើម នៃវិស័យអប់រំរបស់យើង គឺផ្តើមពីអ្នកចេះច្រើនបង្រៀនអ្នកចេះតិច អ្នកចេះតិចបង្រៀនអ្នកមិនចេះសោះ រហូតដល់ពេលបច្ចុប្បន្ននេះ យើងមានគ្រូបង្រៀននិងអ្នកជំនាញជាច្រើន ក្នុងការបណ្តុះបណ្តាលធនធានមនុស្ស។
សម្តេចតេជោហ៊ុនសែន ក៏បានថ្លែងអំណរគុណ ចំពោះអាជ្ញាធរគ្រប់លំដាប់ថ្នាក់ ដែលបានការពារសណ្តាប់ធ្នាប់ និងសុវត្ថិភាពយ៉ាងល្អប្រសើរ ដល់បងប្អូនប្រជាពលរដ្ឋក្នុងពិធីកាន់បិណ្ឌ និងភ្ជុំបិណ្ឌកន្លងទៅថ្មីៗនេះ។ សម្តេចតេជោក៏បានអរគុណផងដែរ ចំពោះសាលារាជធានីភ្នំពេញ ដែលបានផ្តល់រថយន្តក្រុងចំនួន១២០គ្រឿង ក្នុងការជួយដឹកបងប្អូនប្រជាពលរដ្ឋ និងកម្មករកម្មការិនី ទៅលេងស្រុកកំណើត ដោយមិនគិតថ្លៃដែលមានអ្នកធ្វើជាង២៣.០០០នាក់ ដោយមិនមានការបង់ថ្លៃ តាមរថយន្តក្រុងក្នុងពេលភ្ជុំបិណ្ឌកន្លងមកនេះ។
សម្តេចតេជោហ៊ុនសែន បានមានប្រសាសន៍ថា មានកត្តាចំនួន៤ ដែលបានធ្វើឲ្យបងប្អូនប្រជាពលរដ្ឋ មានឱកាសសប្បាយរីករាយ ក្នុងពិធីបុណ្យទានធំៗ ដូចជា បុណ្យភ្ជុំបិណ្ឌ និងចូលឆ្នាំ ជាដើមគឺ៖
ទី១) កត្តាសុខសន្តិភាព គឺពិតជាមានតម្លៃខ្លាំងណាស់ ក្នុងការផ្តល់ឱកាស ឲ្យបងប្អូនប្រជាពលរដ្ឋ បានដើរកម្សាន្ត គ្រប់ទីកន្លែង។
ទី២) កម្ពុជាមានហេដ្ឋារចនាសម្ព័ន្ធគ្រប់គ្រាន់ ដូចជា ផ្លូវធ្វើដំណើរ ស្ពានឆ្លងកាត់ទន្លេទាំងទីក្រុង និងជនបទ។
ទី៣) គឺប្រជាពលរដ្ឋយើង មានមធ្យោបាយធ្វើដំណើរគ្រប់ៗគ្នា ដែលយ៉ាងហោចណាស់ ក៏មានត្រឹមម៉ូតូផងដែរ។
ទី៤) គឺប្រាក់ចំណូលរបស់បងប្អូនប្រជាពលរដ្ឋ កាន់តែមានកំណើន ជាពិសេសប្រាក់ខែមន្ត្រីរាជការយើង ក៏ត្រូវបានតម្លើងជាបន្តបន្ទាប់។
នៅថ្ងៃនេះសម្តេចតេជោហ៊ុនសែន បានប្រកាសថា នៅថ្ងៃទី៩ខែវិច្ឆិកាឆ្នាំ២០១៩ខាងមុខ ដែលជាថ្ងៃបុណ្យឯករាជ្យជាតិ ហើយបន្តរហូតមកដល់បុណ្យអុំទូក អកអំបុក និងសំពះព្រះខែនោះ គឺយើងយកថ្ងៃនោះ ជាថ្ងៃហូបអំបុកទាំងអស់គ្នា ទូទាំងប្រទេសគឺ” ហូបអំបុកការពារជាតិ សាសនា ព្រះមហាក្សត្រ“ ។
ទាក់ទងទៅនឹងការការប្រកាសផ្សព្វផ្សាយ សៀវភៅ ហ៊ុនសែនកម្ពុជា សម្តេចតេជោហ៊ុនសែន បានថ្លែងអំណរគុណ ក្រុមការងារស្រាវជ្រាវបង្កើតសៀវភៅនេះឡើង ក្នុងការចងក្រងឯកសារជាប្រវត្តិសាស្ត្រ ដ៏មានសារសំខាន់ និងគោលនយោបាយបង្រួបបង្រួមជាតិ និងអភិវឌ្ឍប្រទេសពីគំនរបាក់បែក ដោយសារសង្គ្រាម និងការបំផ្លាញខ្ទេចខ្ទី ក្នុងរបបប្រល័យពូជសាសន៍ប៉ុលពត ដើម្បីទុកជាឯកសារដ៏មានតម្លៃបំផុត ជូនដល់សិស្ស និស្សិត និងអ្នកសិក្សា គ្រប់មជ្ឈដ្ឋានរបស់យើង៕ដោយ៖កូឡាប
