ខេត្តព្រះវិហារ៖ នៅថ្ងៃពុធ ទី២ ខែតុលា ឆ្នាំ២០១៩ លោកវរសេនីយ៍ឯក គង់ គា នាយការិយាល័យប្រឆាំងការជួញដូរមនុស្ស និងការពារអនីតិជន បានឲ្យដឹងថា កម្លាំងជំនាញអធិការដ្ឋាននគរបាលស្រុកជាំក្សាន្ត បានឃាត់ខ្លួនជនសង្ស័យម្នាក់ លួងលោម និងគំរាមរំលោភសេពសន្ថវ:លើក្មេងស្រី២នាក់បងប្អូន ហើយជំនាញកំពុងបំពេញសំណុំរឿងតាមនីតិវិធី បញ្ជូនទៅអយ្យការអមសាលាដំបូងខេត្តចាត់ការតាមច្បាប់។
លោកវរសេនីយ៍ឯក បានបញ្ជាក់ថា កាលពីខែមេសា ឆ្នាំ ២០១៩ កម្លាំងជំនាញអធិការដ្ឋាននគរបាលស្រុកជាំក្សាន្ត បានទទួលបណ្តឹងពីម្តាយជនរងគ្រោះ ថាមានករណីពាក់ព័ន្ធលួងលោម និងគំរាមរំលោភសេពសន្ថវ: ដែលកើតឡើងម៉ោងប្រហែល ២២៖០០ យប់ នៅលើផ្ទះជនរងគ្រោះ ស្ថិតនៅលើភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហា។ ជនរងគ្រោះឈ្មោះ ឈ.ស.ល អាយុ ១៩ឆ្នាំ មុខរបរ កសិករ និងឈ្មោះ .ឈ.ស.ល អាយុ១៦ឆ្នាំ មុខរបរ កសិករ អ្នកទាំងពីរជាបងប្អូនបង្កើតនឹងគ្នា។ ជនសង្ស័យ ឈ្មោះ ប៉ុយ វិទូ អាយុ ២៦ឆ្នាំ មុខរបរ កសិករ អ្នកទាំងអស់គ្នា រស់នៅភូមិ ឃុំស្រុក កើតហេតុខាងលើ ។ ករណីនេះជំនាញកំពុងបំពេញសំណុំរឿងតាមនីតិវិធី បញ្ជូនទៅអយ្យការអមសាលាដំបូងខេត្តចាត់ការតាមច្បាប់៕ដោយ៖បញ្ញាស័ក្តិ