ភ្នំពេញ ៖ នាយឧត្តមសេនីយ៍ វង្ស ពិសេន បានថ្លែងថា រាជរដ្ឋាភិបាលបានបញ្ជូនដីកាចាប់ខ្លួន ទណ្ឌិត សម រង្ស៊ី ដល់បណ្ដាប្រទេសអាស៊ានគ្រប់អស់ហើយ ពីព្រោះជនក្បត់ជាតិ សម រង្ស៊ី កំពុងដើរដល់បន្ទាត់ក្រហមមានលក្ខណៈផ្នែកច្បាប់ និងផ្នែកនយោបាយ ហើយត្រូវតុលាការចោទប្រកាន់ ‘’បទល្មើសឧបឃាត” ជាបទល្មើសឧក្រិដ្ឋកម្មធ្ងន់ធ្ងរ ហើយកំណត់ថាក្បត់ជាតិ គៀងគរកម្លាំងបង្កើតកម្លាំងឧទ្ទាមខុសច្បាប់ ដើម្បីធ្វើរដ្ឋប្រហារ ផ្តួលរំលំរាជរដ្ឋាភិបាលស្របច្បាប់។
អគ្គបញ្ជាការដ្ឋាននៃកងយោធពលខេមរភូមិន្ទ បានផ្សព្វផ្សាយព័ត៌មានថា នៅរសៀលថ្ងៃពុធ ទី២ ខែតុលា ឆ្នាំ២០១៩ លោក នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានអនុញ្ញាតឱ្យសេនានុព័ន្ធយោធាថៃចាស់ និងថ្មី ប្រចាំព្រះរាជាណាចក្រកម្ពុជា ចូលជួបជម្រាបលា និងសម្តែងការគួរសម នៅបន្ទប់សវនាការ អគ្គបញ្ជាការដ្ឋាន។
នៅក្នុងឱកាសនោះដែរ លោក នាយឧត្ដមសេនីយ៍ អគ្គមេបញ្ជាការ បានបញ្ជាក់អំពីសភាពការណ៍ខ្លះៗមួយចំនួន ជុំវិញជនក្បត់ជាតិ សម រង្ស៊ី ដែលកំពុងដើរដល់បន្ទាត់ក្រហមមានលក្ខណៈផ្នែកច្បាប់ និងផ្នែកនយោបាយ។ សម រង្ស៊ី ត្រូវតុលាការចោទប្រកាន់ ‘’បទល្មើសឧបឃាត” ជាបទល្មើសឧក្រិដ្ឋកម្មធ្ងន់ធ្ងរ ហើយកំណត់ថាក្បត់ជាតិ គៀងគរកម្លាំងបង្កើតកម្លាំងឧទ្ទាមខុសច្បាប់ ដើម្បីធ្វើរដ្ឋប្រហារ ផ្តួលរំលំរាជរដ្ឋាភិបាលស្របច្បាប់ និងប្រមាថមើលងាយព្រះមហាក្សត្រ ទាមទារឱ្យព្រះមហាក្សត្រដាក់រាជ្យ ចង់ប្ដូររបបដឹកនាំដែលខុសពីរដ្ឋធម្មនុញ្ញបានកំណត់។ ពេលបច្ចុប្បន្ន រាជរដ្ឋាភិបាលបានបញ្ជូនដីកាចាប់ខ្លួន ទណ្ឌិត សម រង្ស៊ី ដល់បណ្ដាប្រទេសអាស៊ានគ្រប់អស់ហើយ។
លោក អគ្គមេបញ្ជាការ បានថ្លែងអំណរគុណចំពោះកងទ័ព ក៏ដូចជា រដ្ឋាភិបាលព្រះរាជាណាចក្រថៃ ដែលតែងតែមានកិច្ចសហប្រតិបត្តិការល្អ ទាំងក្នុងការផ្លាស់ប្ដូរគណៈប្រតិភូ និងព័ត៌មានផ្សេងៗ ដើម្បីបង្ក្រាបឧក្រិដ្ឋកម្មឆ្លងដែន និងភេរវកម្ម ជាងនេះទៅទៀត នាពេលកន្លងមក ភាគីមិត្តថៃ មានការយកចិត្តទុកដាក់ ក្នុងការជួយបណ្ដុះបណ្ដាលធនធានមនុស្ស នៃកងយោធពលខេមរភូមិន្ទផងដែរ។ ជាមួយគ្នានោះ លោក វង្ស ពិសេន បានសំណូមពរឱ្យរដ្ឋាភិបាល ក៏ដូចជា ក្រសួងការពារជាតិ នៃព្រះរាជាណាចក្រថៃ បន្តជួយបណ្ដុះបណ្ដាល ធនធានមនុស្សរបស់កងយោធពលខេមរភូមិន្ទបន្ថែមទៀត៕ ដោយ ៖ កូឡាប
