អ្នកកាសែតឥណ្ឌូណេស៊ីម្នាក់បានរងរបួស បណ្តាលឲ្យខ្វាក់ភ្នែកខាងស្តាំរបស់គាត់ម្ខាង ដោយសារតែគ្រាប់កាំភ្លើងជ័រ ដែលបាញ់ដោយប៉ូលីស ក្នុងអំឡុងការចលាចលក្នុងទីក្រុងហុងកុង។
អ្នកកាសែតឈ្មោះ Veby Mega Indah បានចូលរួមយកព័ត៌មានក្នុងការតវ៉ា នៅក្នុងទីក្រុងហុងកុង កាលពីថ្ងៃអាទិត្យកន្លងទៅនេះ។ ក្នុងហេតុការណ៍នោះ មានគ្រាប់កាំភ្លើងជ័រហោះមកបុកនឹងវែនវ៉ាការពាររបស់គាត់ បណ្តាលឲ្យគាត់ខ្វាក់ភ្នែកជាអចិន្រ្តៃយ៍។ នេះបើតាមការបញ្ជាក់របស់មេធាវីគាត់។
តើអ្នកកាសែតរងរបួសដោយរបៀបណា?
បើតាមវីដេអូនៃការផ្ទុះការតវ៉ាកាលពីថ្ងៃអាទិត្យកន្លងទៅនេះ បានបង្ហាញថា គ្រាប់កាំភ្លើងជ័រ ត្រូវបានប៉ូលីសបាញ់ ទៅលើក្រុមអ្នកតវ៉ា និងអ្នកកាសែត ដែលកំពុងស្ថិតនៅលើស្ពានថ្មើជើង នៅតំបន់ Wan Chai ស្ថិតក្នុងហុងកុង។
គ្រាប់កាំភ្លើ់ងបាញ់ហោះចម្ងាយប្រមាណ ១២ម៉ែត្រ មកត្រូវនឹងកញ្ចក់ការពាររបស់គាត់ បណ្តាលឲ្យគាត់រងរបួសភ្នែកទាំងសងសាង ប៉ុន្តែភ្នែកខាងស្តាំត្រូវពិការ។
ក្រោយហេតុការណ៍ នាងត្រូវបានគេបញ្ជូនយកទៅកាន់មន្ទីរពេទ្យជាបន្ទាប់ ហើយនៅថ្ងៃពុធម្សិលមិញនេះ វេជ្ជបណ្ឌិតបានបញ្ជាក់ថា ភ្នែករបស់នាងម្ខាងនឹងត្រូវមើលលែងឃើញរៀងរហូត។
សូមបញ្ជាក់ថា ទីក្រុងហុងកុងត្រូវបានញាំញីដោយការតវ៉ាអស់រយៈពេលជាច្រើនខែមក ហើយការតវ៉ា កាលពីថ្ងៃអង្គារកន្លងទៅនេះ បានប្រែក្លាយទៅជាអំពើហឹង្សា ដោយប៉ូលីសបានប្រើប្រាស់គ្រាប់កាំភ្លើងជ័រ បាញ់លើក្រុមបាតុករ។
ក្រុមអ្នកតវ៉ា ដែលខ្លះមានប្រដាប់ដោយដំបង គ្រាប់បែកសាំង និងវត្ថុផ្សេងៗទៀត បានវាយតបតលើប៉ូលីស នៅតំបន់ជាច្រើននៃទីក្រុងហុងកុង។
ហុងកុង ត្រូវបានអង់គ្លេសប្រគល់ឲ្យចិន កានកាប់វិញក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
