បាត់ដំបង៖ ស្នងការដ្ឋាននគរបាលខេត្តបាត់ដំបង បានឲ្យដឹងថា សមត្ថកិច្ចនគរបាលបាត់ដំបង និងនគរបាលខេត្តព្រះវិហារ សហការ ធ្វើការឃាត់ និងនាំខ្លួនជនសង័្សយចំនួន ២ នាក់ ក្នុងករណីដោះស្រាយគំនុំចាស់មុនថ្ងៃបុណ្យភ្ជុំបិណ្ឌធំ កាប់គូនទំនាស់បណ្តាលឲ្យ ស្លាប់ និងរបួស ត្រូវបានសមត្ថកិច្ចនគរបាលខេត្តបាត់ដំបង តាមចាប់រហូតដល់ទឹកដីខេត្តព្រះវិហារ យកមកផ្តន្ទាទោសតាមផ្លូវច្បាប់។
នៅថ្ងៃ ពុធ ទី២ ខែ តុលា ឆ្នាំ ២០១៩ អនុវត្តតាមដីកាបង្គាប់ឲ្យនាំខ្លួនរបស់អយ្យការអមសាលាដំបូងខេត្តបាត់ដំបង និងអនុវត្តន៍តាមបទបញ្ជាដ៏ម៉ឹងម៉ាត់របស់ លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ នៃស្នងការដ្ឋានបានដឹកនាំកងកម្លាំងនគរបាលក្នុងផែន ដែលមានលោក វរសេនីយ៍ឯក អូន ហ្វៃ នាយការិយាល័យនគរបាលព្រហ្មទណ្ឌកម្រិតធ្ងន់ បានសហការ ជាមួយសមត្ថកិច្ចនគរបាល នៃស្នងការដ្ឋាននគរបាលខេត្តព្រះវិហារ ធ្វើការឃាត់និងនាំខ្លួនជនសង័្សយចំនួន ២ នាក់ ភេទប្រុស ដែលទាក់ទង នឹងករណី (បង្កហិង្សាដោយចេតនាមានស្ថានទម្ងន់ទោសដោយការប្រើប្រាស់អាវុធ) កាលពីថ្ងៃទី ២៧ ខែ កញ្ញា ឆ្នាំ ២០១៩ នៅភូមិដូង ឃុំចែងមានជ័យ ស្រុកបាណន់ ខេត្តបាត់ដំបង ។
ជនសង័្សយទាំងពីរនាក់រួមមាន៖ ១-ឈ្មោះ ចក់ ផល្លី ភេទប្រុស អាយុ ២៣ ឆ្នាំ រស់នៅភូមិដូង ឃុំចែងមានជ័យ ស្រុកបាណន់ ខេត្តបាត់ដំបង និង២-ឈ្មោះ ចក់ សានិត ហៅ នុត ភេទប្រុស អាយុ១៩ឆ្នាំ រស់នៅភូមិដូង ឃុំចែងមានជ័យ ស្រុកបាណន់ ខេត្តបាត់ដំបង។
លោកវរសេនីយ៍ឯក ប៉ាន់ វណ្ណនី អធិការនគរបាលស្រុកបាណន់ បានឲ្យដឹងថា កាលពីយប់ថ្ងៃទី ២៧ ខែ កញ្ញា ឆ្នាំ ២០១៩ វេលាម៉ោង ២០ និង១៤នាទី នៅលើដងផ្លូវក្នុងភូមិដូង ឃុំចែងមានជ័យ ស្រុកបាណន់ ខេត្តបាត់ដំបងមានករណី (ហិង្សាដោយចេតនាមានស្ថានទម្ងន់ទោសដោយប្រើប្រាស់អាវុធ) មួយបានកើតឡើង បង្កដោយជនសង័្សយមួយក្រុម មានគ្នាចំនួន ៤នាក់ បានប្រើប្រាស់កាំបិត ស្ទាក់កាប់ប្រហារទៅលើជនរងគ្រោះចំនួន ៣នាក់បណ្តាលឲ្យ (ស្លាប់) ចំនួន១នាក់ និង២នាក់ទៀត ទទួលរងរបួសត្រូវនាំយកទៅសង្គ្រោះនៅមន្ទីរពេទ្យ ។
ជនរងគ្រោះទាំង៣នាក់រួមមាន៖ ១-ឈ្មោះ លន់ ឡា ភេទប្រុស អាយុ ១៥ ឆ្នាំ មានទីលំនៅភូមិបុះខ្នុរ ឃុំចែងមានជ័យ ស្រុកបាណន់ ខេត្តបាត់ដំបង (ស្លាប់) ២-ឈ្មោះ រ៉ុង ណារ៉ូ ភេទប្រុស អាយុ ១៧ ឆ្នាំ មានទីលំនៅភូមិបុះខ្នុរ ឃុំចែងមានជ័យ ស្រុកបាណន់ ខេត្តបាត់ដំបង (រងរបួស) ៣-ឈ្មោះ កូវ សុជឿត ភេទប្រុស អាយុ ១៤ឆ្នាំ មានទីលំនៅភូមិបុះខ្នុរ ឃុំចែងមានជ័យ ស្រុកបាណន់ ខេត្តបាត់ដំបង (រងរបួស)។
លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ បានបញ្ជាក់ថា នៅក្រោយពេលករណីនេះកើតឡើង និងអនុវត្តន៍នូវបទបញ្ជារបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង សមត្ថកិច្ចនគរបាលបានធ្វើការស្រាវជ្រាវ ជាបន្ទាន់រហូតឈានទៅធ្វើការឃាត់ខ្លួនជនសង័្សយចំនួន ១ នាក់នៅថ្ងៃទី ១ ខែ តុលា ឆ្នាំ២០១៩ គឺឈ្មោះ នី គឹមហេង ភេទប្រុស អាយុ ២០ ឆ្នាំ រស់នៅភូមិថ្មី ឃុំកន្ទឺ១ ស្រុកបាណន់ ខេត្តបាត់ដំបង ហើយឆ្លងតាមរយៈការស្រាវជ្រាវ និងអនុវត្តន៍តាមដីកាបង្គាប់របស់អយ្យការអមសាលាដំបូងខេត្តបាត់ដំបង ទើបសមត្ថកិច្ចនគរបាលសហការ ឃាត់និងនាំខ្លួនបក្ខពួកជនសង័្សយចំនួន២នាក់ បន្ថែមទៀត រហូតដល់ខេត្តព្រះវិហារ។
លោកវរសេនីយ៍ឯក អូន ហ្វៃ នាយការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបាត់ដំបង បានបញ្ជាក់ថា ករណីហិង្សាដោយចេតនាមានស្ថានទម្ងន់ទោស ដែលកើតឡើងខាងលើនេះ គឺបណ្តាល មកពីរឿងគំនុំ រវាងក្រុមជនសង័្សយ និងក្រុមជនរងគ្រោះ ។
បច្ចុប្បុន្នសមត្ថកិច្ចនគរបាលកំពុងធ្វើការស្រាវជ្រាវបន្ថែម និងរៀបចំបញ្ជូនជនសង័្សយខាងលើ ទៅកាន់អយ្យការ អមសាលាដំបូងខេត្តបាត់ដំបង ចាត់ការតាមផ្លូវច្បាប់ ៕ ដោយ៖កូឡាប
