រតនគីរី៖ ស្នងការដ្ឋាននគរបាលខេត្តរតនគិរី បានឲ្យដឹងថា ករណីឃាតកម្មបាញ់សម្លាប់មន្ត្រីនគរបាលម្នាក់នៅក្នុងហាងកាហ្វេ ស្ថិតក្នុងសង្កាត់បឹងកន្សែង ក្រុងបានលុង ខេត្តរតនគិរី កាលពីវេលាម៉ោង៩និង២០នាទី ដែលធ្វើឲ្យមានភាពភ្ញាក់ផ្អើលនោះ ពេលនេះត្រូវបានសម្ថកិច្ចជំនាញព្រហ្មទណ្ឌសហការជាមួយកម្លាំងអធិការក្រុងបានលុង ធ្វើការបង្ក្រាបនិងឃាត់ខ្លួនជនសង្ស័យបានហើយ កំពុងធ្វើការសួរបំភ្លឺនៅស្នងការដ្ឋាន។
ជនដៃដល់ដែលបានបាញ់សម្លាប់ ជនរងគ្រោះនៅកណ្ដាលក្រុងបានលុង ក្នុងហាងកាហ្វេមួយកន្លែង បង្កឲ្យមានការភ្ញាក់ផ្អើល និងតក់ស្លុតយ៉ាងខ្លាំង ដែលត្រូវសមត្ថកិច្ចចាប់ខ្លួនបាន ក្រោយប្រព្រឹត្តអំពើឃាតកម្ម រយៈពេលជាងមួយម៉ោងនោះ គឺជាមន្ដ្រីនគរបាល ហើយក៏ជាមិត្តភក្តិជាមួយជនរងគ្រោះ។
ស្នងការនគរបាលខេត្តរតនគិរី លោកយិន ចំណាន បានប្រាប់ឲ្យដឹងថា ជនដៃដល់ត្រូវបាន កម្លាំងនគរបាលរបស់លោកដឹកនាំដោយ លោកឧត្តមសេនីយ៍ត្រី ផែន ឌីណា ស្នងការរងនគរបាលទទួលផែនព្រហ្មទណ្ឌ តាមចាប់ខ្លួនបាននៅវេលាម៉ោង១០និង៤៥នាទី នៅរមណីយដ្ឋានបឹងយក្សឡោម ក្រុងបានលុង ពោលក្រោយធ្វើសកម្មភាព ក្នុងរយៈពេលជាង ១ម៉ោង និងដកហូតរថយន្ដរបស់ជនដៃដល់ ដែលបើកទៅធ្វើសកម្មភាពមួយគ្រឿង ម៉ាក NISSAN ពណ៌ស ពាក់ផ្លាកលេខ 2N-5011។
លោកឧត្តមសេនីយ៍ស្នងការ បានបញ្ជាក់ទៀតថា ជនដៃដល់រូបនេះ ឈ្មោះ នួន មករា អាយុ៣១ឆ្នាំ ជាមន្ដ្រីនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តរតនគិរី។ លោកស្នងការ បានអះអាងថា ការសម្លាប់ជនរងគ្រោះ ដោយការបាញ់ប្រហារនេះ ផ្ដើមចេញពីរឿងគំនុំផ្ទាល់ខ្លួន។
ជនដៃដល់ នួន មករា ស្ថិតក្រោមការសួរនាំ របស់នគរបាលព្រហ្មទណ្ឌ នៅស្នងការដ្ឋាននគរបាលខេត្តរតនគិរី ដើម្បីកសាងសំណុំរឿងបញ្ជូនទៅកាន់តុលាការ ផ្ដន្ទាទោសទៅតាមផ្លូវច្បាប់។
ចំណែកជនរងគ្រោះ លោក ផន ទុំ ដែលមានតួនាទីជានាយរងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តរតនគិរី ពេលកំពុងអង្គុយផឹកកាហ្វេ នៅក្នុងហាងមួយកន្លែង ភូមិអូរកន្សែង សង្កាត់បឹងកន្សែង ក្រុងបានលុង នៅវេលាម៉ោងប្រមាណ៩និង២០នាទីព្រឹកមិញនេះ បានរង់នូវការបាញ់ប្រហារ មួយគ្រាប់ចំក្បាល ពីសំណាក់ជនដៃដល់បណ្ដាលឲ្យស្លាប់នៅកន្លែងកើតហេតុ ហើយសាក្សី ព្រមទាំងសមត្ថកិច្ចបានអះអាងដូចគ្នាថា ជនរងគ្រោះបានស្លាប់នៅពេលនោះ៕ដោយ : កូឡាប