កូរ៉េខាងជើងបានធ្វើការបញ្ជាក់ថា ខ្លួនបានបាញ់សាកល្បងមីស៊ីលផ្លោងប្រភេទថ្មី ចេញពីនាវាមុជទឹកបានដោយជោគជ័យ។ មីស៊ីនោះគឺជាប្រភេទមីស៊ីលរយៈចម្ងាយខ្លី ដែលកូរ៉េខាងជើងបាញ់សាកល្បង កាលពីខែឧសភាមកម្លេះ។
ការបាញ់សាកល្បងមីស៊ីល ដែលអាចមានសមត្ថភាពបំពាក់ក្បាលគ្រាប់នុយក្លេអ៊ែរបាន គឺជាការបាញ់សាកល្បងលើកទី ១១របស់កូរ៉េខាងជើងក្នុងឆ្នាំនេះ។
ប៉ុន្តែមីស៊ីលដែលកូរ៉េខាងជើងទើបធ្វើការបាញ់សាកល្បងម្សិលមិញ ត្រូវបានបាញ់ចេញពីនាវាមុជទឹក។
ការអាចមានសមត្ថភាពបាញ់មីស៊ីលចេញពីនាវាមុជទឹក ពិតជាមានសារសំខាន់ខ្លាំងណាស់ សម្រាប់កូរ៉េខាងជើង ព្រោះវាមានន័យថា របបកុម្មុយនិស្តនេះអាចធ្វើការបាញ់មីស៊ីលបានស្ថិតនៅខាងក្រៅដែនដីរបស់ខ្លួនបានក្នុងសមុទ្រ។
បើតាមមន្រ្តីកូរ៉េខាងត្បូង បានឲ្យដឹងថា មីស៊ីលរបស់កូរ៉េខាងជើងហោះបានចម្ងាយប្រហែល ៤៥០គីឡូម៉ែត្រ និងហោះបានរយៈកម្ពស់ ៩១០គីឡូម៉ែត្រ មុនពេលវាធ្លាក់ចូលក្នុងសមុទ្រ។
មីស៊ីលធ្លាក់ចូលក្នុងសមុទ្រជប៉ុន។ ជប៉ុននិយាយថា មីស៊ីលរបស់កូរ៉េខាងជើងហោះចូលក្នុងតំបន់សេដ្ឋកិច្ចផ្តាច់មុខរបស់ខ្លួន។
ការបាញ់សាកល្បងនោះកើតឡើងតែប៉ុន្មានម៉ោងប៉ុណ្ណោះ ក្រោយពេលរបបព្យុងយ៉ាងបាននិយាយថា ការចរចាបញ្ហានុយក្លេអ៊ែរជាមួយនឹងអាមេរិចនឹងបន្ត៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
