ភ្នំពេញ៖ លោកឧកញ៉ា ស្រី សុធា និងលោកឧកញ៉ា ស្រី ចន្ធូ មិនព្រមចូលខ្លួនដោះស្រាយ ជាមួយប្រជាពលរដ្ឋរងគ្រោះនោះ ទើបអាជ្ញាធររាជធានី បានស្នើសុំឲ្យក្រុមជនរងគ្រោះដាក់ពាក្យប្តឹងទៅតុលាការ ដើម្បីរកយុត្តិធម៌។ នេះបើយោងតាមលិខិតលេខ ១០៤៩ ឆតច របស់សាលារាជធានីភ្នំពេញ ដែលចុះហត្ថលេខាដោយលោក មាន ចាន់យ៉ាដា អភិបាលរងរាជធានីភ្នំពេញ ចុះថ្ងៃទី២៥ ខែកញ្ញា ឆ្នាំ២០១៩។
លោក មាន ចាន់យ៉ាដា អភិបាលរងរាជធានីភ្នំពេញ បានប្រាប់ឱ្យប្រធានសម្ព័ន្ធទាំង ៦ខណ្ឌ រួមមាន ខណ្ឌទួលគោក ដូនពេញ ឫស្សីកែវ សែនសុខ មានជ័យ និង ខណ្ឌ៧មករា ប្តឹងទៅតុលាការ ករណីក្រុមហ៊ុន 7NG របស់ឧកញ៉ា ស្រី សុធា និងឧកញ៉ា ស្រី ចន្ធូ មិនដោះស្រាយរឿងសន្សំប្រាក់ទិញដីក្រុមហ៊ុន។
យោងតាមលិខិតរបស់លោក មាន ចាន់យ៉ាដា ដែលសារព័ត៌មានទើបទទួល បានបញ្ជាក់ថា ចំពោះសំណើសុំជួយអន្តរាគមន៍ជំរុញឱ្យក្រុមហ៊ុន 7NG ពន្លឿនការដោះស្រាយជូនសមាជិកសន្សំប្រាក់ទិញដីក្រុមហ៊ុន ឱ្យបានឆាប់នោះ, កន្លងមក រដ្ឋបាលរាជធានីភ្នំពេញ បានខិតខំសម្របសម្រួលដោះស្រាយ ជូនប្រជាពលរដ្ឋដែលមានបញ្ហាជាមួយក្រុមហ៊ុន 7NG ជាច្រើនលើកច្រើនសារ ប៉ុន្តែឧកញ៉ាប្រធានក្រុមហ៊ុន 7NG មិនបានចូលរួមតាមការអញ្ជើញរបស់រដ្ឋបាលរាជធានីភ្នំពេញ ដោយបានចាត់តំណាង ដែលមិនមានសិទ្ធិសម្រេចចូលរួមទៅវិញ។
តាមរយៈលិខិតរបស់រដ្ឋបាលរាជធានីភ្នំពេញ លោក មាន ចាន់យ៉ាដា បានបញ្ជាក់ថា “ដើម្បីដោះស្រាយរកយុត្តិធម៌ជូនប្រជាពលរដ្ឋ ដែលមានបញ្ហាជាមួយក្រុមហ៊ុន 7NG ឱ្យបានឆាប់បញ្ចប់នោះ រដ្ឋបាលរាជធានីភ្នំពេញ សូមឲ្យលោក-លោកស្រី រៀបចំដាក់បែបបទពាក្យបណ្តឹងទៅតុលាការ ដើម្បីដោះស្រាយតាមនីតិវិធីច្បាប់”។
ពាក់ព័ន្ធករណីខាងលើនេះ អ្នកសារព័ត៌មាន មិនអាចសុំការបំភ្លឺពីឧកញ៉ា ស្រី សុធា ឬ ឧកញ៉ា ស្រី ចន្ធូ ដើម្បីបំភ្លឺបានទេ នៅរសៀលថ្ងៃទី៣តុលានេះ។
សូមជម្រាបជូនថា ពាក់ព័ន្ធករណីទិញ-លក់ដីខ្យល់របស់ក្រុមហ៊ុន 7NG មកដល់ពេលនេះ មានជនរងគ្រោះ ៣នាក់បានប្តឹង ឧកញ៉ា ស្រី សុធា និងឧកញ៉ា ស្រី ចន្ធូ ទៅតុលាការ ហើយមានសំណុំរឿង ២ ដែលតំណាងអយ្យការបានចោទប្រកាន់លើឧកញ៉ា ២នាក់ ឪពុកកូននេះ ពីបទ ឆបោក និងមួយសំណុំរឿងទៀតកំពុងស្ថិតក្រោមចំណាត់ការ របស់តំណាងអយ្យការ នៃសាលាដំបូងរាជធានីភ្នំពេញ។
សូមជម្រាបជូនថា កាលពីអំឡុងដើមឆ្នាំ២០១៩នេះ មានករណីផ្ទុះការតវ៉ា និងទាមទារដី ពីក្រុមហ៊ុន 7NG ពីសំណាក់អតិថិជនជាច្រើននាក់ នៅក្នុងការិយាល័យលក់ដីឡូត៍របស់ក្រុមហ៊ុននេះ ស្ថិតនៅភូមិព្រៃចាស់ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល។
បន្ទាប់ពីមានការតវ៉ារបស់ពលរដ្ឋរងគ្រោះនោះ ឧកញ៉ា ស្រី សុធា ជាប្រធានក្រុមប្រឹក្សាភិបាលក្រុមហ៊ុន 7NG និងកូនប្រុសគឺ ឧកញ៉ា ស្រី ចន្ធូ ជានាយកក្រុមហ៊ុន 7NG បានចេញមុខដោះស្រាយ និងសន្យាថា នឹងប្រគល់ដីជូនអតិថិជនតាមកិច្ចសន្យា ឲ្យបានមុនបំណាច់ឆ្នាំ២០១៩នេះ ប៉ុន្តែមកដល់ពេលនេះ គេសង្កេតឃើញថា មានអតិថិជនកាន់តែច្រើនឡើងៗ ដែលបានអះអាងថា ពួកគេពុំទាន់ទទួលបានដីពីក្រុមហ៊ុន 7NG តាមការសន្យា និងអ្នកខ្លះទៀតបញ្ជាក់ថាដីដែលក្រុមហ៊ុនប្រគល់ឲ្យនោះ មិនមែនជាដីដែលស្ថិតនៅទីតាំង ដែលពួកគាត់ទិញកាលពីពេលមុននោះទេ៕ដោយ៖បញ្ញាស័ក្តិ