ប្រធានាធិបតីអាមេរិច ដូណាល់ ត្រាំ កាលពីថ្ងៃព្រហស្បតិ៍ម្សិលមិញ បានស្នើឲ្យប្រទេសអ៊ុយក្រែននិងចិនធ្វើការស៊ើបអង្កេតលើអ្នកនយោបាយបក្សប្រជាធិបតេយ្យ លោកគឺលោក Joe Biden ដែលនឹងក្លាយជាដៃគូប្រជែងរបស់ខ្លួន សម្រាប់ការបោះឆ្នោតឆ្នាំ ២០២០ខាងមុខ។
មុនពេលចាកចេញទៅកាន់រដ្ឋ Florida លោកត្រាំ បានថ្លែងប្រាប់អ្នកសារពត៌មានដូច្នេះថា គាត់ជឿជាក់ថា ទីក្រុងប៉េកាំងគួរធ្វើការស៊ើបអង្កេតលើលោក Biden និងកូនប្រុសរបស់លោកឈ្មោះ Hunter Biden ដែលជាអ្នកជំនួញ។
លោកថ្លែងថា “ចិនគួរចាប់ផ្តើមធ្វើការស៊ើបអង្កេតលើលោក Biden ពីព្រោះអ្វីដែលបានកើតឡើងនៅចិនគឺវាអាក្រក់ដូចអ្វីដែលបានកើតឡើងនៅប្រទេសអ៊ុយក្រែន”។
លោកត្រាំ និងមេធាវីរបស់លោកឈ្មោះ Rudy Giuliani បានចោទប្រកាន់លោក Joe Biden ដែលជាអតីតប្រធានាធិបតីថា ជួយជ្រោមជ្រែងជំនួញកូនប្រុសរបស់លោកដោយមិនសមរម្យ នៅក្នុងប្រទេសអ៊ុយក្រែន និងចិន។ ទោះយ៉ាងណា លោកត្រាំ មិនបានបង្ហាញ់ភស្ថុតាងនោះទេ។
លោកត្រាំ បានស្នើលោកប្រធានាធិបតីអ៊ុយក្រែន Volodymyr Zelenskiy តាមទូរស័ព្ទកាលពីខែកក្កដាកន្លងទៅ ដើម្បីឲ្យធ្វើការស៊ើបអង្កេតលើលោក Biden និងកូនប្រុសរបស់គាត់ពីបទពុករលួយ។ លោក Hunter Biden គឺជាសមាជិកក្រុមប្រឹក្សារបស់ក្រុមហ៊ុនសាំងអ៊ុយក្រែន។
ការស្នើរបស់លោកត្រាំ បណ្តាលឲ្យប្រធានសភាតំណាងរាស្រ្តលោក Nancy Pelosi ប្រកាសការស៊ើបអង្កេតប្រឆាំងលោក ដូណាល់ ត្រាំ កាលពីសប្តាហ៍មុន។
លោកត្រាំ បានបង្កកប្រាក់ជំនួយចំនួន ៤០០លានដុល្លាទៅឲ្យប្រទេសអ៊ុយក្រែន មុនពេលគាត់បានស្នើឲ្យប្រធានាធិបតីអ៊ុយក្រែនធ្វើតាមសំណើររបស់គាត់ ដែលទង្វើរបស់លោកត្រាំ បណ្តាលឲ្យមានការចោទប្រកាន់ពីខាងបក្សប្រជាធិបតេយ្យថា លោកត្រាំ បានប្រើប្រាស់គោលនយោបាយអាមេរិចដើម្បីបំរើផលប្រយោជន៍ខ្លួនឯង៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia