ភ្នំពេញ៖ រដ្ឋាភិបាលជប៉ុន បានឯកភាពផ្តល់ថវិកាសរុបចំនួន ១.០៥២.២៩៨ ដុល្លារអាមេរិកដល់អង្គការចំនួនពីរ ក្រោមគ្រោងការណ៍ជំនួយឧបត្ថម្ភឥតសំណង សម្រាប់គម្រោងរបស់អង្គការក្រៅរដ្ឋាភិបាលជប៉ុន។ កិច្ចសន្យាផ្តល់ជំនួយ ត្រូវបានចុះហត្ថលេខានៅថ្ងៃទី៤តុលានេះ ដោយលោក មិកាមិ ម៉ាសា ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និង អ្នកតំណាងអង្គភាពទទួលជំនួយទាំងពីរ ។
ស្ថានទូតជប៉ុនប្រចាំព្រះរាជាណាចក្រកម្ពុជាបានចេញសេចក្តីប្រកាសព័ត៌មានថ្ងៃទី៤ ខែតុលា ឆ្នាំ២០១៩ ថា ១-គម្រោងការលើកកម្ពស់ការអភិវឌ្ឍសហគមន៍ តាមរយៈការបោសសម្អាតមីនក្នុងខេត្តបន្ទាយមានជ័យ (ឆ្នាំទី៣) (ថវិកាចំនួន ៨៤៣.១៥៦ដុល្លារអាមេរិក) ដែលអង្គភាពទទួលជំនួយ អង្គការសកម្មភាពកម្ចាត់មីនជប៉ុន(JMAS)។ នៅក្នុងគម្រោងនេះ JMASនឹងធ្វើការអភិវឌ្ឍន៍លើបច្ចេកទេស បោសសំអាតមីន ដោយ
ប្រើម៉ាស៊ីន ដោះមីន នៅតំបន់ដែលពោរពេញទៅដោយគ្រាប់មីននិងយុទ្ធភណ្ឌមិនទាន់ផ្ទះ(UXOs) នៅ លាយបញ្ចូលគ្នា ។ អង្គការនេះក៏នឹង ផ្ទេរវិធីសាស្ត្របោសសំអាតមីនប្រកបដោយប្រសិទ្ធភាព និងសុវត្ថិភាពទៅមជ្ឈមណ្ឌលសកម្មភាពកម្ចាត់មីនកម្ពុជា
(CMAC)ក្នុងគោលបំណងបង្កើនសមត្ថភាព និងពន្លឿនកិច្ចខិតខំប្រឹងប្រែងរបស់ខ្លួនក្នុងការធ្វើឲ្យ ដី ប្រទេសជាតិមានសុវត្ថិភាព។
២-គម្រោងពង្រឹងការថែទាំសុខភាពសហគមន៍និងបណ្តាញគាំទ្រ សម្រាប់កុមារក្នុងកំពង់ចាម (ឆ្នាំទី ១) (ថវិកាចំនួន ២០៩.១៤២ ដុល្លារអាមេរិក) ដែលអង្គភាពទទួលជំនួយ គឺអង្គការ Peoples.Hope Japan។ នៅក្នុងគម្រោង នេះ អង្គការនឹងផ្តល់ការបណ្តុះបណ្តាលដល់បុគ្គលិកសុខាភិបាល អ្នកស្ម័គ្រចិត្តសុខាភិបាល និង ការអប់រំសុខភាពមាតាក្នុងស្រុកប្រតិបត្តិ ស្ទឹងត្រង់ ខេត្តកំពង់ចាម ក្នុងគោលបំណងកាត់បន្ថយអត្រាស្លាប់របស់កុមារអាយុក្រោម ៥ឆ្នាំ និងលើកកម្ពស់សុខភាពកុមារ តាមរយៈបណ្តាញទំនាក់ទំនង រវាងបុគ្គលិកសុខាភិបាលនិង អ្នកស្ម័គ្រចិត្តសុខភាពក្នុងសហគមន៍ ។ គម្រោងនេះ ក៏រួមបញ្ចូលទាំងការសាងសង់បន្ទប់ក្រោយសម្រាលនិង ផ្តល់ឧបករណ៍វេជ្ជសាស្ត្រមួយចំនួន នៅមណ្ឌលសុខភាពស្រុក ដើម្បី
កែលម្អបរិស្ថាន វេជ្ជសាស្ត្រ ។
កម្មវិធីជំនួយឥតសំណងសម្រាប់គម្រោង អង្គការក្រៅរដ្ឋាភិបាលជប៉ុន បានចាប់ផ្តើមនៅប្រទេសកម្ពុជាតាំងពីឆ្នាំ២០០២ ដើម្បីគាំទ្រដល់សកម្មភាពអង្គការក្រៅរដ្ឋាភិបាលជប៉ុន ក្នុងកិច្ចខិតខំប្រឹងប្រែង ដើម្បីជួយដល់ការអភិវឌ្ឍ និងស្ថាបនាប្រទេសកម្ពុជាឡើងវិញនៅតាមកម្រិតមូលដ្ឋាន។ ចាប់តាំងពីឆ្នាំ២០០២មក រដ្ឋាភិបាលជប៉ុន បានផ្តល់ថវិកាជាង៣៧លានដុល្លារអាមេរិក ដល់គម្រោងចំនួន១២០ ដែលផ្តោតសំខាន់ទៅលើវិស័យអប់រំនៅកម្រិតមូលដ្ឋាន វិស័យសុខាភិបាល វិស័យកសិកម្ម និង សកម្មភាពបោសសម្អាតមីនក្នុងប្រទេសកម្ពុជា។
លោកឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន ប្រចាំព្រះរាជាណាចក្រកម្ពុជា បានថ្លែងក្នុងពិធីចុះហត្ថលេខាលើកិច្ចសន្យាផ្តល់ជំនួយថា សម្រាប់គម្រោងជំនួយបោសសម្អាតគ្រាប់មីន ចាប់តាំងពីឆ្នាំ២០០២ អង្គការ
JMAS បានចាប់ចាប់ផ្តើមសកម្មភាពរបស់ខ្លួន នៅក្នុងប្រទេសកម្ពុជា រហូតមកដល់ពេលនេះ អង្គការនេះ បានធ្វើការដោះគ្រាប់មីននិងគ្រាប់មិនទាន់ផ្ទុះជាច្រើន ជាមួយអង្គការCMAC(មជ្ឈមណ្ឌលសកម្មភាពកម្ចាត់មីនកម្ពុជា) ។ តាមរយៈការទទួលណែនាំដោយផ្ទាល់ពីអ្នកជំនាញជប៉ុន បានរួមចំណែកធ្វើឲ្យសមត្ថភាពកាន់តែប្រសើរឡើង ប្រកបដោយសុវត្ថិភាពនិងប្រសិទ្ធភាព។ លើកនេះផងដែរ រដ្ឋាភិបាលជប៉ុនផ្តល់ថវិកាប្រមាណ ៨៤.៣០០០ ដុល្លារអាមេរិកដល់អង្គការ JMAS។ អង្គការនេះ នឹងធ្វើការផ្ទេរបច្ចេកវិទ្យាដល់អង្គការ CMAC (អាជ្ញាធរកម្ចាត់មីនកម្ពុជា) តាមរយៈការបណ្តុះបណ្តាល ការងារនៅក្នុងតំបន់ដែលមានគ្រាប់មីន និងគ្រាប់មិនទាន់ផ្ទុះនៅលាយបញ្ចូលគ្នា ។ លោក បានថ្លែងថា “តាមរយៈគម្រោងនេះ ខ្ញុំសង្ឃឹមយ៉ាងមុតមាំថាប្រជាជនដែលរស់នៅក្នុងតំបន់ និងបានរួចផុតពីការភ័យខ្លាច នៃគ្រាប់មីននិងគ្រាប់មិនទាន់ផ្ទះ ហើយនឹងរួមចំណែក
ដល់ការអភិវឌ្ឍក្នុងតំបន់បន្ថែមទៀត”។
បន្ទាប់ទៀតសម្រាប់គម្រោង ជំនួយថែទាំកុមារ ចាប់តាំងពី២០០៣ អង្គការមូលនិធិជប៉ុន-ភីអេចស៍ បានចាប់ចាប់ផ្តើមសកម្មភាពរបស់ខ្លួន នៅក្នុងប្រទេសកម្ពុជា។ ការណែនាំបច្ចេកទេសដល់បុគ្គលិកមណ្ឌលសុខភាពមូលដ្ឋាន និងសកម្មភាព លើកកម្ពស់ការយល់ដឹង សម្រាប់សហគមន៍នីមួយៗ ត្រូវបានអនុវត្តន៍ចាប់តាំងពីពេលចាប់ផ្តើមដំបូង ។ សកម្មភាពបានរួមចំណែក ក្នុងការបង្កើនទំនាក់ទំនងនិង ការទុកចិត្តរវាងមណ្ឌលសុខភាព និងប្រជាជន ក៏ដូចជាការពារការស្លាប់របស់ម្តាយនិងទារក។ សម្រាប់លើកនេះ រដ្ឋាភិបាលជប៉ុននឹងផ្តល់ថាប្រមាណ ២០.៩០០០ ដុល្លារអាមេរិកដល់អង្គការមូលនិធិជប៉ុន-ភី អេចស៍។ អង្គការនេះ និងបង្កើតនូវបណ្តាញអ្នកស្ម័គ្រចិត្តសុខភាពភូមិ និងបុគ្គលិកមណ្ឌលសុខភាពក្នុងខេត្តកំពង់ចាមដើម្បីកាត់បន្ថយជំងឺ ដែលអាចការពារបាននិងការស្លាប់ចំពោះកុមារអាយុក្រោម៥ឆ្នាំ បន្ថែមពីនេះគឺ ដើម្បីផ្សព្វផ្សាយពីការលូតលាស់របស់កុមារ ប្រកបដោយសុខភាពល្អ។
លោកឯកអគ្គរាជទូត បានមានប្រសាសន៍ថា “តាមរយៈគម្រោងនេះខ្ញុំសង្ឃឹមថា ការលើកកម្ពស់សុខភាព និងការការពារជំងឺរបស់ប្រជាជន ក្នុងតំបន់នឹងមានការកើនឡើងដែលនាំឲ្យមានការផ្លាស់ប្តូរ នូវសកម្មភាពប្រចាំថ្ងៃ ក្នុងគ្រួសារនីមួយៗ “៕ដោយ៖កូឡាប
