ភ្នំពេញ ៖ ជនជាតិចិន ចំនួន ៤នាក់ មេខ្លោងជួញដូរគ្រឿងញៀនជិត ៤០គីឡូក្រាម ត្រូវបានកម្លាំងនគរបាលមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ ឃាត់ខ្លួនបានជាបន្តបន្ទាប់។
នគរបាល បានឲ្យដឹងថា ជនសង្ស័យម្នាក់មានឈ្មោះ YUN LIANFU ភេទប្រុស អាយុ ៥១ឆ្នាំ ជាជនជាតិចិន ត្រូវបានសមត្ថកិច្ចឃាត់ខ្លួន នៅក្នុងបន្ទាប់ខុនដូមួយ នៅជាន់ទី២៩ បន្ទប់លេខ១៩ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
បន្ទាប់មកសមត្ថកិច្ចបានស្រាវជ្រាវ និងឃាត់ខ្លួនបក្ខពួកចំនួន ៣នាក់ទៀត ជាជនជាតិចិនតៃវ៉ាន់ម្នាក់ និងចិនហុងកុង ២នាក់។
នៅពេលចុះបង្ក្រាបក្រុមជនសង្ស័យ សមត្ថកិច្ចបានរកឃើញ និងដកហូតគ្រឿងញៀនមានទម្ងន់ប្រមាណ ៣៩គីឡូក្រាម រួមមាន៖ មេតំហ្វេតាមីន (ICE) ហៅ ម៉ាទឹកកក ទម្ងន់ ៣៥,៦៩ គីឡូក្រាម កេតាមីន (Ketamine) ទម្ងន់ ២,៩៨ គីឡូក្រាម និងអ៊ិចស្តាស៊ី (MDMA) ទម្ងន់ ០,៥៧៦គីឡូក្រាម។ ក្រុមជនសង្ស័យ និងវត្ថុតាង ត្រូវសមត្ថកិច្ចជំនាញ នាំយកទៅក្រសួងមហាផ្ទៃ ដើម្បីកសាងសំណុំរឿងបញ្ជូន ទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់៕ដោយ៖បញ្ញាស័ក្តិ
