ភ្នំពេញ ៖ ជនសង្ស័យជាជនជាតិចិនតៃវ៉ាន់ម្នាក់ ដែលបាញ់សម្លាប់មិត្តភក្តិមិនបានសម្រេច ត្រូវបានកម្លាំងនគរបាលព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ ស្រាវជ្រាវឃាត់ខ្លួន និងបង្ហាញមុខជាសារណៈ កាលពីវេលាម៉ោងប្រមាណជាង១រសៀល ថ្ងៃទី៤ ខែតុលានេះហើយ ។
លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាល បានឲ្យដឹងថា ជនសង្ស័យត្រូវបានកម្លាំងនគរបាលរបស់លោកសហការជាមួយកម្លាំងអធិកាដ្ឋាននគរបាលខណ្ឌទួលគោក កម្លាំងអធិការដ្ឋាននគរបាលខណ្ឌច្បារអំពៅ និងស្នងការដ្ឋាននគរបាលខេត្តកណ្តាលធ្វើការស្រាវជ្រាវឃាត់ខ្លួនបានកាលពីវេលាម៉ោង១ និង៤៥នាទីរសៀល ថ្ងៃទី២ ខែតុលានេះ ពីបទឃាតកម្មគិតទុកជាមុន (ប្រើអាវុធខ្លីម៉ាកSIG SAUER P៣២០SPលេខ៥៨C៣៩២៦៧៧ បាញ់ទៅលើមិត្តភក្តិរបស់ខ្លួន ចំនួន៣គ្រាប់ដែលបានប្រព្រឹត្តកាលប្រព្រឹត្តកាលពីវេលាម៉ោង៧ និង៥០នាទីយប់ ថ្ងៃទី២៧ ខែកញ្ញា ឆ្នាំ២០១៩ នៅចំណុចមុខទ្វារច្រកចូលភោជនីយដ្ឋាននិងកាហ្វេហ្គ្រីន ភូមិ៣ សង្កាត់ទឹកល្អក់២ ខណ្ឌទួលគោក ។
ជនសង្ស័យរូបនោះ ក៏ជាប់ចោទពីបទរក្សាទុក ដោយខុសច្បាប់នូវសារធាតុញៀន និងបទប្រើប្រាស់ដោយខុសច្បាប់ នូវសារធាតុញៀន ប្រព្រឹត្តនៅចំណុចផ្ទះសំណាក់ឡេងសុផាន បន្ទប់លេខ២២ ផ្លូវលេខ៦៤៤ ភូមិដើមអំពិល សង្កាត់ច្បារអំពៅ១ ខណ្ឌច្បារអំពៅរាជធានីភ្នំពេញ កាលពីថ្ងៃទី២ ខែតុលា ឆ្នាំ២០១៩ វេលាម៉ោង១៣និង៤៥នាទី និងចាប់យកវត្ថុតាងបញ្ជូនមក ការិយាល័យដើម្បីចាត់ការតាមនីតិវិធីច្បាប់។ ជនសង្ស័យឈ្មោះLAI SUNG MAO ភេទប្រុស អាយុ៥៣ឆ្នាំ ជនជាតិចិនតៃវ៉ាន់ មុខរបរពាណិជ្ជករ កាន់លិខិតឆ្លងដែនលេខ៣០៦៧០១៩៧១ ចុះថ្ងៃទី២៣ ខែមេសា ឆ្នាំ២០១៣ មានទីលំនៅស្នាក់នៅផ្ទះសំណាក់យីហោឡេងសុផាន បន្ទប់លេខ២២ ផ្លូវលេខ៦៤៤ ភូមិដើមអំពិល សង្កាត់ច្បារអំពៅ១ ខណ្ឌច្បារអំពៅ រាជធានីភ្នំពេញ។ វត្ថុតាងចាប់យក៖ អាវុធខ្លីម៉ាក SIG SAUER P៣២០SP លេខ៥៨C៣៩២៦៧៧ ចំនួន១ដើម បង់កាំភ្លើងចំនួន១ និងគ្រាប់ចំនួន៣០គ្រាប់ លិខិតឆ្លងដែនចំនួន២ក្បាលលេខ ៣០៦៧០១៩៧១ និងលេខ០៣៦៦៧១៩១ ទូរស័ព្ទដៃចំនួន២គ្រឿង ម៉ាកIPhone7 ពណ៌ខ្មៅ និងម៉ាកHAUWEI ពណ៌ទឹកប៊ិច ម្សៅពណ៌ស (សង្ស័យជាគ្រឿងញៀន) ចំនួន១០កញ្ចប់ ថ្នាំគ្រាប់ម៉ាកហ្វាយ (សង្ស័យជាគ្រឿងញៀន) ចំនួន៥គ្រាប់ ថ្នាំគ្រាប់ពណ៌ខៀវ និងពណ៌ផ្កាឈូក (សង្ស័យជាគ្រឿងញៀន) ចំនួន១៨គ្រាប់ កាបូបពណ៌ខ្មៅចំនួន១ កូនសោរថយន្តចំនួន១ កូនសោម៉ូតូចំនួន១ រថយន្តម៉ាកTOYOTA HIGHLANDER ពណ៌ទឹកមាសលេខតួ JTFGD២១A៥១០០១៧៥៥៦ ពាក់ផ្លាកលេខភ្នំពេញ ២AY ៩២២៣ អាវយឺតដៃខ្លីពណ៌ខ្មៅមានអក្សរHUGO BOSS(SPRONG/SUMMER 2018) ចំនួន១ ខោជើងខ្លីពណ៌ត្រួយចេក (មានខ្សែចងពណ៌ខ្មៅ) ចំនួន១ ស្បែកជើងសង្រែកពណ៌ខ្មៅចំនួនមួយគូរ។
ជនរងគ្រោះឈ្មោះXIAO HONG JE ភេទប្រុស អាយុ៣៧ឆ្នាំ ជនជាតិចិន ស្នាក់នៅផ្ទះជួលផ្លូវលេខ៣៩៦ សង្កាត់ទួលទំពូង ខណ្ឌចំការមន រាជធានីភ្នំពេញ មុរខរបរពាណិជ្ជករ និងឈ្មោះស្រូរិទ្ធី ភេទប្រុស អាយុ៤០ឆ្នាំ ជនជាតិខ្មែរ ស្នាក់នៅ ផ្ទះលេខ៣៧២ ផ្លូវលេខ១១៣សេ ភូមិអូរបែកក្អម សង្កាត់អូរបែកក្អម ខណ្ឌសែន សុខរាជធានីភ្នំពេញ មុរខរបរគ្រូបង្រៀន។ មុនឈានទៅបាញ់សម្លាប់មិត្តភក្តិខ្លួនឯង គឺផ្តើមចេញពីទំនាស់ ដែលជនដៃដល់ខឹងជនរងគ្រោះជំពាក់ប្រាក់១៥០០០ដុល្លារ ហើយមិនព្រមសង ហើយជិះរថយន្តម៉ាកTOYOTA HIGHLANDER ពណ៌ទឹកមាស ពាក់ផ្លាកលេខភ្នំពេញ ២AY៩២២៣ ទៅបាញ់សម្លាប់ មិត្តភក្តិចំនួន៣គ្រាប់ តែពុំបណ្តាលឲ្យរងរបួស ។ បន្ទាប់ពីមានករណីឃាតកម្ម សមត្ថកិច្ចបានធ្វើការស្រាវជ្រាវ ហើយឈានទៅឃាត់ខ្លួនជនសង្ស័យតែម្តង ។
បច្ចុប្បន្នជនសង្ស័យ និងវត្ថុតាងខាងលើ ការិយាល័យកសាងសំណុំរឿងបញ្ជូនទៅ សាលាដំបូងរាជធានីភ្នំពេញចាត់ការតាមនីតិវិធី៕ ដោយ៖កូឡាប