ខេត្តស្វាយរៀង៖ លោកនាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិ ចុះជួយស្រុកចន្ទ្រា និងក្រុងបាវិត នារសៀលថ្ងៃទី៤ ខែតុលា ឆ្នាំ២០១៩នេះ។
បានថ្លែងទៅកាន់កងកម្លាំងការពារព្រំដែន និងក្រុមម៉ូតូឌុប នៅស្រុកចន្ទ្រា បានប្រាប់កងកម្លាំងទាំងអស់ ដាច់ខាតមិនឲ្យជនក្បត់ជាតិ សមរង្ស៊ី និងបក្ខពួកបង្កអសន្តិសុខបំផ្លាញសុខសន្តិភាព ព្រះមហាក្សត្រ និងរាជរដ្ឋាភិបាលស្របច្បាប់ជាដាច់ខាត។
ការថ្លែងបែបនេះ នៅគ្រាដែលនាយឧត្តមសេនីយ៍ម៉ឹង សំផន អញ្ជើញចូលរួមសំណេះសំណាលជាមួយកងកម្លាំងការពារ ព្រំដែនដែលឈរជើងនៅតាមព្រំដែន ក្នុងស្រុកចន្ទ្រា និងក្រុងបាវិត និងក្រុមរត់ម៉ូតូឌុប ប្រមាណជិត៨០០នាក់ នៅក្នុងបរិវេណវត្តបទុមរង្សីហៅវត្តចេក ស្ថិតក្នុងឃុំសំរោង ស្រុកចន្ទ្រា ខេត្តស្វាយរៀង។
លោកនាយឧត្តមសេនីយ៍ បាននាំមកនូវការសាកសួរ សុខទុក្ខពីសំណាក់ សម្តេចតេជោហ៊ុន សែន នាយករដ្ឋមន្ត្រី នៃព្រះរាជរាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់អង្គពិធីផងដែរ។
លោកបានបន្តថា ប្រទេសកម្ពុជាយើង បានឆ្លងកាត់នូវភ្លើងសង្គ្រាម ឥតឈប់ឈរ តែដោយសារការដឹនាំដ៏ត្រឹមត្រូវ របស់សម្តេចតេជោ ហ៊ុន សែន ជាប្រមុខដឹកនាំក្រោម នយោបាយឈ្នះ ឈ្នះ ធ្វើឲ្យប្រទេសកម្ពុជាទាំងមូល ទទួលបានសុខសន្តិភាព និងការអភិវឌ្ឍរីកចម្រើនលើគ្រប់វិស័យ ដូច្នេះមិនអាចឲ្យក្រុមក្បត់ជាតិណា មកបំផ្លាញបានឡើយ ព្រោះសន្តិភាពនេះ រកដោយលំបាកណាស់ទម្រាំមកដល់ថ្ងៃនេះ។
លោកនាយឧត្តមសេនីយ៍ បានអំពាវនាវ ដល់អាជ្ញាធរមូលដ្ឋាន និងកម្លាំងត្រូវខិតខំការពាសន្តិសុខណ្តាប់ធ្នាប់សាធារណៈ ឲ្យបានល្អប្រសើរ អនុវត្តន៍គោលនយោបាយភូមិ ឃុំមានសុវត្ថិភាពឲ្យទទួលបានជោគជ័យ និងត្រូវផ្តល់សេវាសាធារណៈ ឲ្យបានល្អប្រសើរ ទាំងសេវាសំណូមពរ និងសេវាតម្រូវការ គឺធ្វើយ៉ាងណាមិនឲ្យពលរដ្ឋ មានការថ្នាំងថ្នាក់ឡើយ។ មួយវិញទៀត ត្រូវប្រាប់ក្រុមពួកសកម្មជន អតីតគណបក្សសង្គ្រោះជាតិ ដែលត្រូវបានតុលាការ រំលាយចោលហើយនោះ កុំជឿតាមការបំផុសបំផុលញុះញង់ ពីទណ្ឌិតសមរង្សី និងបក្ខពួក ដែលមកចង់ផ្តួលរំលំរាជរដ្ឋាភិបាលស្របច្បាប់ គឺនាំតែមានទោសទណ្ឌ តាមទណ្ឌិតសមរង្ស៊ី តែប៉ុណ្ណោះ ព្រោះតុលាការកំពុងស្វែងរកចាប់ខ្លួនទណ្ឌិតនេះគឺគិតតែខិតខំរកស៊ីចិញ្ចឹមគ្រួសារ ឲ្យមានជីវភាពរីកចម្រើន ដោយគ្មានអតីតគណបក្សសង្គ្រោះជាតិ រស់ឡើងវិញទ្បើយ។
លោកបានបញ្ជាក់ថា នៅឃុំទួល គឺមានមណ្ឌលសុខភាពមួយទៀត សម្រាប់ជួយសង្គ្រោះគ្រោះមហន្តរាយផ្សេងៗ ជូនប្រជាពលរដ្ឋ នៅតំបន់ព្រំដែនផងដែរ។ អំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលបាននាំទៅចែកជូនកម្លាំង ប្រជាការពារ ក្រុមអ្នករត់ម៉ូតូឌុប ក្នុងនោះម៉ូតូ១០គ្រឿង តាមរយៈនាយឧត្តមសេនីយ៍កិត្តិបណ្ឌិតហ៊ីង ប៊ុនហៀង ប្រគល់ជូនកងកម្លាំងការពារព្រំដែន ស្រុកចន្ទ្រា និងក្រុងបាវិត ចំណែកពីរគ្រឿងទៀត ប្រគល់ជូនមណ្ឌលសុខភាពទួលស្តី ព្រមទាំវិទ្យុទាក់ទង និងឯកសណ្ឋាប្រជាការពារ ព្រមទាំងសម្លៀកបំពាក់ ចែកជូនដល់ក្រុមម៉ូតូឌុប នូវអាវម្នាក់មួយផងដែរ៕ដោយ៖ វ៉ៃកូ