ចំនួនអ្នកស្លាប់ ក្នុងការតវ៉ាប្រឆាំងនឹងរដ្ឋាភិបាលអ៊ីរ៉ាក់ បានកើនឡើងដល់ចំនួនយ៉ាងតិច ៦០នាក់ ក្រោយពេលមានការផ្ទុះការតវ៉ាអស់រយៈពេល ៤ថ្ងៃ។
ក្នុងរយៈពេល ២៤ម៉ោង ចំនួនអ្នកស្លាប់បានកើនឡើងជាងពាក់កណ្តាល ខណៈពេលដែលការប៉ះទង្គិចគ្នារវាងប៉ូលីស និងក្រុមអ្នកតវ៉ាកើនឡើងរឹតតែខ្លាំង។
យោធាអ៊ីរ៉ាក់បាននិយាយថា អ្នកបាញ់កាំភ្លើងស៊ីបដែលមិនត្រូវគេស្គាល់អត្តសញ្ញាណ បានសម្លាប់មនុស្សចំនួន ៤នាក់នៅក្នុងទីក្រុងបាដាដ ហើយក្នុងចំណោមអ្នកស្លាប់ មានប៉ូលីស ២នាក់ផងដែរ។
លោកនាយករដ្ឋមន្រ្តីអ៊ីរ៉ាក់ Adel Abdel Mahdi បាននិយាយថា ការទាមទារស្របតាមច្បាប់របស់ក្រុមអ្នកតវ៉ា ត្រូវបានរដ្ឋាភិបាលដឹងឮហើយ ប៉ុន្តែលោកអំពាវនាវឲ្យមានភាពស្ងប់ស្ងាត់។
សូមបញ្ជាក់ថា ការតវ៉ាដ៏ខ្លាំងផ្ទុះឡើងកាលពីថ្ងៃអង្គារ បន្ទាប់ពីការបរាជ័យលើការដោះស្រាយបញ្ហាអត្រា គ្មានការងារធ្វើដ៏ខ្ពស់របស់យុវជន បញ្ហាសេវាកម្មសាធារណៈធ្ងន់ធ្ងន់ និងអំពើពុករលួយដ៏រ៉ាំរ៉ៃ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC