ភ្នំពេញ៖ សម្ដេចក្រឡាហោម ស ខេង នាយករដ្ឋមន្ត្រីស្ដីទី អញ្ជើញជាអធិបតី ពិធីអបអរសាទរ ទិវាគ្រូបង្រៀន ក្រោមប្រធានបទ “គុណភាពគ្រូជាមូលដ្ឋានគ្រឹះ នៃ យុគសម័យឌីជីថល” នាព្រឹកថ្ងៃសៅរ៍ ទី៥ ខែតុលា ឆ្នាំ២០១៩ នៅវិទ្យាស្ថានជាតិអប់រំ ។
សម្តេចក្រឡាហោម បានមានប្រសាសន៍ថា “ថ្វីត្បិតបច្ចេកវិទ្យាមានភាពរីកចម្រើន តែមិនទាន់អាចជំនួសតួនាទីគ្រូបង្រៀនបាននៅឡើយ” ដែលនេះ បានឆ្លុះបញ្ចាំងពីតួនាទីដ៏សំខាន់មិនអាចខ្វះបានរបស់គ្រូបង្រៀន ក្នុងការផ្ទេរចំណេះដឹងដល់មនុស្សពីមួយជំនាន់ទៅមួយជំនាន់។
ក្នុងឱកាសនោះផងដែរ សម្តេចក្រឡាហោម បានមានប្រសាសន៍ផ្ដាំផ្ញើដល់លោកគ្រូ អ្នកគ្រូ សាស្ត្រាចារ្យទូទាំងប្រទេស ត្រូវខិតខំប្រឹងប្រែងបន្តអភិវឌ្ឍន៍សមត្ថភាពបន្ថែមទៀត ដើម្បីដើរទាន់បច្ចេកវិទ្យាឌីជីថល ដែលកំពុងរីកចម្រើនឥតឈប់ឈរ ដើម្បីយកចំណេះដឹងដែលទទួលបាន ទៅបង្រៀនដល់សិស្សានុសិស្សជាបន្តទៀត សំដៅកសាងធនធានមនុស្សប្រកបដោយគុណភាព សមត្ថភាព។
ក្នុងឱកាសនោះផងដែរ លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងឱកាសនៃការថ្លែងសន្ទរកថាស្វាគមន៍ បានថ្លែងអំណរគុណចំពោះប្រមុខរាជរដ្ឋាភិបាលកម្ពុជា ក្រសួង ស្ថាប័នពាក់ព័ន្ធ ដែលជានិច្ចកាល តែងតែយកចិត្តទុកដាក់វិនិយោគតាមគ្រប់រូបភាព ដល់វិស័យអប់រំ ជួយសម្របសម្រួល និងគាំទ្រដល់កំណែទម្រង់វិស័យអប់រំ។
លោកក៏បានថ្លែងអំណរគុណដល់ថ្នាក់ដឹកនាំក្រសួង មន្ត្រីអប់រំគ្រប់លំដាប់ថ្នាក់ លោកគ្រូ អ្នកគ្រូ សិស្សានុសិស្ស និស្សិត និងយុវជនគ្រប់រូប ដែលបានចូលរួមយ៉ាងសកម្មក្នុងកំណែទម្រង់កន្លងមក និងនាពេលខាងមុខ។ ក្រសួងអប់រំ ប្តេជ្ញាចិត្តលើកកម្ពស់គុណភាពគ្រូបង្រៀន ដែលជាមូលដ្ឋានគ្រឹះនៃការអប់រំបែបឌីជីថល។
សូមជម្រាបថា ទិវាគ្រូបង្រៀន ត្រូវបានរៀបចំឡើងនាថ្ងៃទី៥ ខែតុលា ជារៀងរាល់ឆ្នាំ ក្នុងគោលបំណងបំផុសឡើងវិញនូវវប្បធម៌ និងប្រពៃណីរបស់សិស្សានុសិស្សទាំងឡាយ ឱ្យរំលឹកនូវគុណូបការៈដ៏ថ្លៃថ្លារបស់គ្រូបង្រៀននៅទូទាំងប្រទេស ដែលពួកគាត់ជារៀមច្បងក្នុងការងារអប់រំ បណ្ដុះបណ្ដាល ធនធានមនុស្ស សម្រាប់ការពារ កសាង និងអភិវឌ្ឍន៍មាតុភូមិលើគ្រប់វិស័យ ព្រមទាំងបាន និងកំពុងបំពេញការងារជាអ្នកអប់រំ និងជាអ្នកផ្ទេរចំណេះដឹងផងដែរ។ គួររំលឹកផងដែរថា ទិវាគ្រូបង្រៀនដោយត្រូវបានផ្ដួចផ្ដើមជាលើកដំបូងនៅប្រទេសកម្ពុជា កាលពីថ្ងៃ ទី៣ ខែ កញ្ញា ឆ្នាំ១៩៩៧ ដោយកំណត់យក ថ្ងៃទី ៥ ខែតុលា ជារៀងរាល់ឆ្នាំ ដើម្បីប្រារព្ធទិវាគ្រូបង្រៀននេះ។
បើតាមសេចក្តីប្រកាសក្រសួងអប់រំយុវជននិងកីឡា បានឲ្យដឹងថា ក្នុងឱកាសប្រារព្ធទិវាគ្រូបង្រៀនឆ្នាំ ២០១៩ នេះក្រសួងនឹងរៀបចំកម្មវិធី ដូចខាងក្រោម៖ ១.ប្រឡងប្រណាំង តែងនិពន្ធពានរង្វាន់ សម្តេចព្រះសង្ឃរាជ ជួន ណាត និងស្ងួតកំណាព្យ ពានរង្វាន់ព្រះភិរម្យភាសាអ៊ូ ហៅ ង៉ុយ ២.ជ្រើសរើសវិទ្យាល័យ ចំនួន ៥ មានសិស្សទទួលបាននិទ្ទេស A ច្រើនជាងគេ ក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១៩ សីហា ២០១៩ ដើម្បីផ្តល់ជូនពានរង្វាន់ វិទ្យាល័យសិស្សពូកែ ៣.ជ្រើសរើសគ្រូបង្រៀន ចំនួន ១១ រូប ដែលបានបង្រៀនសិស្សឲ្យទទួលបាននិទ្ទេស A ហើយមានពិន្ទុខ្ពស់បំផុត នៃមុខវិជ្ជានីមួយៗ ដើម្បីផ្តល់ជូនគ្រឿងឥស្សរិយយសមុនីសារាភ័ណ្ឌ ថ្នាក់ ធិបឌិន្ទ ៤.ផ្តល់ជូនប័ណ្ណសរសើរ ជូនដល់គ្រប់វិទ្យាល័យ ដែលមានសិស្សទទួលបាននិទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១៩ សីហា ២០១៩ ៥.ប្រឡងប្រណាំងស្នាដៃសិក្សាកថាលើប្រធានបទ “ហេតុអ្វីបានជាខ្ញុំជ្រើសរើសអាជីពជាគ្រូបង្រៀន?” ៦.វេទិកាពិភាក្សាលើប្រធានបទ ចំនួន ៣ រួមមាន ៖ ១.បទពិសោធការកែលម្អការគ្រប់គ្រងតាមសាលារៀន ២.រួមគ្នាវិនិយោគលើវិស័យអប់រំ ដើម្បីមូលធនមនុស្ស និង៣.ហេតុអ្វីបានជាខ្ញុំជ្រើសរើសអាជីពជាគ្រូបង្រៀន?៕ ដោយ៖កូឡាប
