ភ្នំពេញ៖ លោកណឹម សុវត្ថិ ប្រធានក្រុមការងារសាងសង់វិមានឈ្នះ ឈ្នះ កាលពីថ្ងៃទី៤ខែតុលាឆ្នាំ២០១៩ បានដឹកនាំនាយទាហាន និងសមាជិកក្រុមការងារសាងសង់វិមានឈ្នះ ឈ្នះ ដើម្បីធ្វើការពិនិត្យ និងការប្រជុំ៩ ខែ និងទិសដៅបន្តជាពិសេសប្រមូលផ្ដុំលើការគ្រប់គ្រងថែរក្សា និងការផ្ដល់សេវាកម្មឱ្យកាន់តែល្អនៅវិមានឈ្នះ ឈ្នះ ដែលជាទីតាំងមួយកាន់តែទាក់ទាញការចូលរួមទស្សនារបស់ប្រជាជនទាំងអស់ ។
ក្នុងឱកាសនោះ លោកក៏បានបញ្ជាក់ផងដែរនូវអត្ថន័យ ខ្លឹមសារ និងលទ្ធផលដែលទទួលបានគួរជាទីពេញចិត្ត និងមទនភាពមានលក្ខណៈប្រវត្តិសាស្រ្តផងដែរ។ នៅក្នុងបទសម្ភាសន៍ដែលអ្នកសារព័ត៌មានសួរ អំពីប្រការដែលមានរូបវិមានឈ្នះ ឈ្នះ និងរូបដំរីក្បាលបី រួមទាំងហង្សនិងគ្រុឌ លោកបានបញ្ជាក់ គឺជាអត្តសញ្ញាណនៃតឹកតាងសន្តិភាព និងការអភិវឌ្ឍដែលមានវត្តមានកសាងឡើងនៅទីនោះ ជាមួយនឹងការសួរពីមនុស្សមួយចំនួនបានសរសេរអំពីករណីវិមានឈ្នះ ឈ្នះ ថា ជារបស់យួន និងបង្ហាញរូបខ្លះៗដែលមិនមែនជាការពិត លោកបានបញ្ជាក់យ៉ាងច្បាស់អំពីករណីនេះ ហើយប្រហែលជាមិនបានស្ដាប់ចប់ឬអានចប់ ឬក៏យល់ឱ្យអស់នូវខ្លឹមសារនោះ។
លោក បានបន្ថែមថា ន័យរបស់ខ្ញុំដែលបានបញ្ជាក់ហាក់គឺច្បាស់លាស់ណាស់ហើយថា សម្រាប់មតិដែលលើកឡើងជាលក្ខណៈអវិជ្ជមានទាំងអស់នោះ គឺគ្រាន់តែជាមតិយោបល់មួយតិចតួចប៉ុណ្ណោះ ប្រៀបដូចជាល្អងធូលី ដែលហើរមកប៉ះ ហើយត្រូវខ្យល់បក់ទៅ ។ ហេតុផលត្រង់នេះ គឺ សំណង់វិមានឈ្នះ ឈ្នះ ដែលបានកសាងឡើងជារបស់កូនខ្មែរដែលបានធ្វើ និងសុទ្ធសឹងតែជាស្មាដៃខ្មែរដែលខិតខំជាមួយការដឹកនាំ ទស្សនៈនៃនយោបាយឈ្នះ ឈ្នះ ការចាត់ចែងរបស់ស្ថាបត្យករ វិស្វករ ធ្វើក្នុងការគិតគូររួមទាំងសម្ភារៈ។ ដូច្នេះសំណង់ដែលមានអត្ថន័យ និងអាចប្រៀបធៀបកម្រិតតំបន់ផ្សេងទៀតផង មិនមែនជាសំណង់របស់អ្នកណាក្រៅពីខ្មែរដែលបានធ្វើដើម្បីបង្ហាញពីសន្តិភាព និងសមិទ្ធផលជាតិ។ ន័យគឺសម្ដីមិនត្រឹមត្រូវ មិនពិតប្រាកដនិងមានគោលបំណងបំភ្លៃ បំភន្ត័នេះគឺត្រូវបានចាត់ទុកថាជាល្អងធូលី ឬក៏ជាអ្វីដែលគ្រាន់តែហើរមកប៉ះព្រោះមិនអាចធ្វើឲ្យរង្គោះរង្គើរនូវតឹកតាង ដ៏ស្កឹមស្កៃ ស្ដុកស្ដម្ភដែលមាននូវសិលាចារឹក ចម្លាក់ទម្រង់នានាដែលនៅទីនេះបាន។ លោកបានលើកឡើងថា “ខ្ញុំថែមទាំងបើកចំហនិងអញ្ជើញមកផឹកតែ ចំពោះអ្នកដែលយល់មិនច្បាស់ ឬក៏មានការយល់ឃើញបែបណា ដែលមិនត្រឹមត្រូវនោះ ដើម្បីមកពន្យល់ស្វាគមន៍យ៉ាងកក់ក្ដៅថែមទៀត ក្នុងទិដ្ឋភាពនៃភាពសុខដុម តាមបាវចនារបស់វិមានឈ្នះ ឈ្នះ ដែលមានស្ដីពី កត្តញ្ញូ សុខដុមនិងការចូលរួមនេះ ។ នេះគឺជាចំណុចសំខាន់ដែលខ្ញុំចង់បញ្ជាក់ ប៉ុន្ដែអាចមានការបកស្រាយដោយមិនត្រឹមត្រូវហើយបាត់បង់នូវខ្លឹមសារជាក់ស្ដែង និងអត្ថន័យដ៏ធំធេងជាប្រវត្តិសាស្ត្រដែលខ្ញុំបានបញ្ជាក់។ ដូច្នេះសូមដើម្បីកុំឱ្យមានការយល់ច្រឡំ សូមយកចិត្តទុកដាក់ក្នុងការស្ដាប់នូវខ្លឹមសារបទសម្ភាសន៍របស់ខ្ញុំ ឱ្យបានចប់គ្រប់ជ្រុងជ្រោយ និងកុំបក បេះតែ១ចំណែកតូចណាមួយធ្វើអាជីវកម្មខុសឆ្គង ហើយកុំសូមធ្វើការប្រៀបធៀបនិងពិនិត្យមើលបន្ថែមទៀត។ នេះគឺជាអ្វីដែលខ្ញុំចង់បញ្ជាក់ឡើងវិញ និងនៅតែមានជំហរយ៉ាងរឹងមាំថាទស្សនៈនៃការកសាងស្ថាបត្យកម្មមួយនេះ មានចក្ខុវិស័យដែលដាក់ចេញមកយ៉ាងច្បាស់លាស់ ប្រកបដោយគតិបណ្ឌិតដ៏ខ្ពង់ខ្ពស់ដោយសម្តេចតេជោ នាយករដ្ឋមន្រ្តី និងមានទស្សនទានដែលសម្តេចពិជ័យសេនា បានផ្ដល់និងដឹកនាំការសាងសង់នេះ ហើយក្រុមការងារពោរពេញដោយឆន្ទៈស្មារតីទទួលខុសត្រូវមុះមុត ទោះបន្ទាប់ពីការសាងសង់រួចហើយ ក្នុងដំណាក់កាលទី៣នេះហើយក្តី ក៏បន្តធានាបំពេញការងារទាំងថ្ងៃយប់ ព្រឹកល្ងាច ក្នុងឱកាសពិធីបុណ្យនានា និងក្រោយពីពិធីបុណ្យហើយបានបញ្ជាក់ ហើយបញ្ជាក់ទៀតថា បទពិសោធន៍ដែលយើងមានក្នុងរយៈពេល៩ខែនេះ ក្រោយបុណ្យនីមួយៗតែងតែមាន ប្រជាជនមកឆ្លងកាត់ពីកើតទៅលិច ពីជើងទៅត្បូង និងចូលទស្សនាជាក្រុមគ្រួសារ និងឈ្វេងយល់ អ្នកខ្លះក៏បានយល់ជាមុន និងអ្នកខ្លះក៏ឈ្វេងយល់ផ្ទាល់ ដោយត្រូវឈរលើលក្ខណៈដែលមានភាពវិទ្យាសាស្រ្ត ដែលមានប្រវត្តិសាស្រ្តប្រាកដនេះ និងមានទឡ្ហីកនៅក្នុងនោះ។ ដូច្នេះសូមចូលរួមជាមួយគ្នា ក្នុងការកសាងប្រទេសជាតិ ថែរក្សាការពារសន្តិភាព និងការអភិវឌ្ឍឱ្យកាន់តែបានជឿនលឿន និងឧដុង្គឧត្តម”៕ដោយ៖កូឡាប