ខេត្តព្រះសីហនុ ៖ ប្រជាពលរដ្ឋខ្មែរឥស្លាម ឬប្រជាពលរដ្ឋចាមចំនួន ៥៥គ្រួសារ រស់នៅចំណុចតំបន់តាបិន ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ នៅចុងសប្តាហ៍នេះ មានបង្ហាញការព្រួយបារម្មណ៍ខ្លាចបាត់បង់ដីធ្លីធ្លាប់បង្កបង្កើនផល ដែលដូនតាបន្សល់ទុកតាំងពីជំនាន់សង្គមរាស្ត្រនិយម។
តំណាងប្រជាពលរដ្ឋចាម រស់នៅសហគមន៍តាបិន ភូមិស្មាច់ដែង បានសំណូមពរ ជាមួយការលើដៃសំពះសំណូមពរដល់ លោក គួច ចំរើន អភិបាលខេត្តព្រះសីហនុ និងជាពិសេស សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេច ប៊ុន រ៉ានី ហ៊ុន សែន ឲ្យជួយជម្រុញកាតឆ្វៀលដីមានទំហំជាង ៥០ហិកតា ឈានដល់ចេញប័ណ្ណកម្មសិទ្ធិកាន់កាប់ដីធ្លីស្របច្បាប់ ជូនពួកគាត់ឲ្យបានឆាប់ ។
ត្រង់ចំណុចនេះ ប្រជាពលរដ្ឋអះអាងថា រាល់ថ្ងៃនេះ ប្រជាពលរដ្ឋពួកគាត់ទាំង ៥៥គ្រួសារ មានការព្រួយបារម្ភពីការរំលោភបំពាន ដីធ្លី របស់ពួកគាត់ ពីសំណាក់ក្រុមហ៊ុនឯកជន, មន្ត្រីមានអំណាច និងឈ្មួញមានទ្រព្យធនមួយចំនួន ដែលប៉ុនប៉ងឃុបឃិតរំលោភយកជាបន្តបន្ទាប់មកនេះ ..។
តំណាងប្រជាពលរដ្ឋចាម បានបញ្ជាក់ថា ក្នុងចំណោមប្រជាពលរដ្ឋពួកគាត់ គឺមានអ្នកខ្លះ បានមករស់នៅ សង់ផ្ទះ សង់ព្រះវិហារសាសនា និងអាស្រ័យផល ចិញ្ចឹមសត្វពាហនៈ ធ្វើស្រែចំការ ដាំដុះដាំណាំផ្សេងៗ នៅលើដីកំពុងកាន់កាប់នោះ ជាប់ជាប្រចាំតាំងពីឆ្នាំ២០១៤ មកម្ល៉េះ ។ ជាងនេះទៀត ទីតាំងដី ដែលមានទំងំជាង ៥០ហិចតាខាងលើនេះ គឺជាដីដូនតា របស់ពួកគាត់ ធ្លាប់មករស់នៅតាំងពីសម័យសង្គមរាស្ត្រនិយម ដោយមានដីសម្រាប់កប់សពដូនតា បន្សល់ទុកកាលពីជំនាន់មុន នៅទីកន្លែងនោះថែមទៀតផង..។
ជាពិសេសជាងនេះ គឺប្រជាពលរដ្ឋពួកគាត់ ដែលគ្រប់អាយុ ឬមានសិទ្ធិបោះឆ្នោត មានប័ណ្ណបោះឆ្នោត និងបានទៅបោះឆ្នោតគ្រប់អាណត្តិបោះឆ្នោតទាំងការបោះឆ្នោតឃុំសង្កាត់ និងបោះឆ្នោតជ្រើសរើសតំណាងរាស្ត្រគ្រប់អាណត្តិថែមទៀតផង..។ ក្នុងនោះដែរ ក៏ធ្លាប់អាជ្ញាធរស្ថាប័នពាក់ព័ន្ធបានចុះមកធ្វើជំរឿនជាបន្តបន្ទាប់ផងដែរ។
ផ្តើមពីបញ្ហានេះ តំណាងប្រជាពលរដ្ឋចាមចំនួន ៥៥គ្រួសារ រស់នៅតំបន់តាបិន ស្ថិតក្នុងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ បាន សំណូមពរទៅកាន់ លោក គួច ចំរើន អភិបាលខេត្តព្រះសីហនុ ជាពិសេស សម្តេចតេជោ ហ៊ុន សែន និងសម្តេច ប៊ុន រ៉ានីហ៊ុនសែន ឲ្យជួយអន្តរាគមន៍ ជួយកាត់ឆ្វៀលដីផ្តល់ប័ណ្ណកម្មសិទ្ធស្របច្បាប់ជួនពួកគាត់ ឲ្យបានឆាប់ ដើម្បីឲ្យពួកគាត់មានសុវត្ថិភាពដីធ្លីត្រឹមត្រូវ..៕ ដោយ៖ ដែន សីមា