ភ្នំពេញ៖ អង្គការចាត់តាំងបដិវត្តន៍ពណ៌ ត្រូវបានរំលាយប៉ុន្តែឧបាយកលដ៏ពិសពុលនៃមជ្ឈដ្ឋានអគតិខាងក្រៅដែលបញ្ជាពីក្រោយខ្នងរបស់ចលនាបដិវត្តន៍ពណ៌នៅកម្ពុជាមិនទាន់ផុតរលត់ ដោយពួកគេបានប្រើវោហាស័ព្ទនានារាំងខ្ទប់លទ្ធិប្រជាធិបតេយ្យ សេរីភាព និងនីតិរដ្ឋពិតប្រាកដនៅកម្ពុជា មិនឲ្យរីកចម្រើន ដោយជ្រើសយកបុគ្គលមួយចំនួនដែលប្រឆាំងនឹងរាជរដ្ឋាភិបាល លើកទឹកចិត្តដល់អង្គការមិនមែនរដ្ឋាភិបាល និងប្រព័ន្ធព័ត៌មានមួយចំនួន។
ក្នុងទិវាប្រារព្ធខួប៣៩ឆ្នាំនៃជ័យជម្នះ៧មករា កាលពីថ្ងៃទី៧ខែមករាឆ្នាំ២០១៨ ដែលធ្វើឡើងនៅកោះពេជ្រ សម្តេចតេជោហ៊ុនសែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីកម្ពុជា បានគូសបញ្ជាក់ជូនជនរួមជាតិថា ពិតមែនតែអង្គការចាត់តាំងបដិវត្តន៍ពណ៌ត្រូវបានរំលាយហើយក្តី ប៉ុន្តែឧបាយកលដ៏ពិសពុលនៃមជ្ឈដ្ឋានអគតិខាងក្រៅដែលបញ្ជាពីក្រោយខ្នងរបស់ចលនាបដិវត្តន៍ពណ៌នៅកម្ពុជាមិនទាន់ផុតរលត់នៅឡើយទេ ។ គេបានប្រើវោហាស័ព្ទនានាដ៏ពីរោះ អំពីប្រជាធិបតេយ្យ សេរីភាព នីតិរដ្ឋ និងមនុស្សធម៌ ប៉ុន្តែសកម្មភាពពិតរបស់គេ គឺបានរាំងខ្ទប់លទ្ធិប្រជាធិបតេយ្យ សេរីភាព និងនីតិរដ្ឋពិតប្រាកដមិនឲ្យរីកចម្រើន ដោយជ្រើសយកបុគ្គលមួយចំនួនដែលប្រឆាំងនឹងរាជរដ្ឋាភិបាល លើកទឹកចិត្តដល់អង្គការមិនមែនរដ្ឋាភិបាល និងប្រព័ន្ធព័ត៌មានមួយចំនួនដែលបានបំពានច្បាប់ ហើយផ្ទុយទៅវិញ គេបោះបង់ប្រជាជនកម្ពុជា និងយកប្រជាជនកម្ពុជាធ្វើជាចំណាប់ខ្មាំងនៃនយោបាយរបស់ខ្លួន ។ សកម្មភាពបែបនេះ ក៏មិនមែនជាចំណុចថ្មីដែរ គឺជាអ្វីដែលគេធ្លាប់បានធ្វើក្នុងទសវត្ស ៨០ កន្លងមក ដោយប៉ុនប៉ងសម្លាប់អតីតសាធារណរដ្ឋប្រជាមានិតកម្ពុជា ទាំងតាមផ្លូវយោធា សេដ្ឋកិច្ច និងនយោបាយ ។
មជ្ឈដ្ឋានបរទេសទាំងនោះដែលធ្វើជាមើលមិនឃើញតថភាពនៅកម្ពុជា កំពុងព្យាយាមបិទបាំងការបរាជ័យរបស់ខ្លួន បន្តរកវិធីដាក់ការកៀបសង្កត់មកលើរាជរដ្ឋាភិបាលកម្ពុជា ឲ្យធ្វើតាមឆន្ទៈរបស់ខ្លួន នៅក្រោមលេសប្រជាធិបតេយ្យ និងសិទ្ធិមនុស្ស និងតាមរយៈការគំរាមកាត់ផ្តាច់ជំនួយ និងវិធានការរឹតបន្តឹងផ្សេងៗ ដែលជាការជ្រៀតជ្រែកយ៉ាងកម្រោលមកលើដែនសមត្ថកិច្ចរបស់រដ្ឋអធិបតេយ្យមួយ ។ ក្នុងនាមជារដ្ឋអធិបតេយ្យ កម្ពុជាមិនអាចឱនក្បាលទទួលយកការកៀបសង្កត់ណាមួយពីខាងក្រៅបានឡើយ ជាពិសេសមិនទុកឲ្យការប៉ុនប៉ងផ្លាស់ប្តូរតាមរយៈបដិវត្តន៍ពណ៌កើតមានបានជាដាច់ខាត ដែលនយោបាយបែបនេះ បាន និងកំពុងបង្កនូវជម្លោះផ្ទៃក្នុង អស្ថិរភាព អសន្តិសុខ សង្គ្រាម ទុក្ខវេទនា ការរត់ភៀសខ្លួន និងការបាត់បង់ជីវិតប្រជាជនស្លូតត្រង់រាប់សែននាក់យ៉ាងអយុត្តិធម៌បំផុតនៅប្រទេសមួយចំនួន ។ កម្ពុជាមានមេរៀនគ្រប់គ្រាន់ហើយ ដើម្បីធានានូវដំណើរទៅមុខទៀតរបស់ខ្លួន ដោយឈរលើមូលដ្ឋានការពារឯករាជ្យ អធិបតេយ្យ និងក្តាប់ជាប់សិទ្ធិសម្រេចលើជោគវាសនារបស់ខ្លួន ។ ជាមួយគ្នានេះយើងសង្ឃឹមថា មជ្ឈដ្ឋានទាំងនោះនឹងមើលឃើញការពិត ទទួលយកការពិត ហើយនៅជាមួយប្រជាជនកម្ពុជា និងឈប់បង្កើតឧបសគ្គចំពោះមាតុភូមិកម្ពុជាដ៏អភ័ព្វនេះតទៅទៀត ។
នៅក្នុងឱកាសនេះ ខ្ញុំក៏សូមបញ្ជាក់យ៉ាងឧឡារិកថា ប្រជាធិបតេយ្យពិតប្រាកដនៅកម្ពុជាមិនដើរថយក្រោយ ឬធ្លាក់ចុះឡើយ ផ្ទុយទៅវិញកំពុងត្រូវបានថែរក្សា និងពង្រឹងឲ្យកាន់តែរឹងមាំឡើង ដើរស្របជាមួយគោលការណ៍នីតិរដ្ឋ នៅក្នុងផលប្រយោជន៍របស់ជាតិ និងប្រជាជនកម្ពុជា ។ គឺមានតែប្រជាធិបតេយ្យក្លែងក្លាយទេ ដែលត្រូវបានលុបបំបាត់ ។ គណបក្សប្រជាជនកម្ពុជាបន្តប្រកាន់ខ្ជាប់នូវរបបនយោបាយប្រជាធិបតេយ្យ សេរី ពហុបក្ស ដែលបានចែងក្នុងរដ្ឋធម្មនុញ្ញរបស់ជាតិ ។ គណបក្សនឹងចូលរួមប្រកួតប្រជែងដោយសេរី និងស្មើភាពជាមួយបណ្តាគណបក្សនយោបាយដែលធ្វើសកម្មភាពស្របច្បាប់នៅកម្ពុជា ក្នុងការបោះឆ្នោតជ្រើសតាំងសមាជិកព្រឹទ្ធសភានីតិកាលទី ៤ នៅថ្ងៃទី ២៥ ខែ កុម្ភៈ ឆ្នាំ ២០១៨ និងការបោះឆ្នោតជ្រើសតាំងតំណាងរាស្ត្រនីតិកាលទី ៦ នៅថ្ងៃទី ២៩ ខែ កក្កដា ឆ្នាំ ២០១៨ ខាងមុខនេះ ។ កម្ពុជាសូមថ្លែងអំណរគុណដ៏ជ្រាលជ្រៅដល់បណ្តាប្រទេសដែលបានយល់ច្បាស់អំពីសភាពការណ៍ពិត និងបំណងប្រាថ្នារបស់ប្រជាជនកម្ពុជា ហើយបាន និងកំពុងផ្តល់ជំនួយឧបត្ថម្ភដ៏ស្មោះសដល់ដំណើរការបោះឆ្នោតនៅកម្ពុជា ។
គណបក្សប្រជាជនកម្ពុជាជំរុញអនុវត្តរាល់វិធានការរបស់រាជរដ្ឋាភិបាល ក្នុងការលើកកម្ពស់អភិបាលកិច្ចល្អនៃគ្រប់ស្ថាប័នសាធារណៈគ្រប់ថ្នាក់ និងការអនុវត្តច្បាប់ដោយម៉ឺងម៉ាត់ និងស្មើភាព ដើម្បីធានាប្រសិទ្ធភាពនៃរាល់ការងារ លុបបំបាត់បាតុភាពអសកម្មផ្សេងៗ ពង្រឹងយុត្តិធម៌ សមធម៌ក្នុងសង្គម រក្សាសណ្តាប់ធ្នាប់សាធារណៈ និងផ្តល់សេវាសាធារណៈកាន់តែកៀកនឹងប្រជាជន ។ គណបក្សនឹងបន្តប្រឹងប្រែងអនុវត្តកម្មវិធីនយោបាយរបស់ខ្លួនឲ្យសម្រេចបានសមិទ្ធផលថ្មីៗទៀតលើគ្រប់វិស័យ ឆ្លើយតបទៅនឹងបំណងប្រាថ្នា និងកង្វល់ផ្សេងៗរបស់ប្រជាជន ព្រមទាំងបន្តជំរុញអនុវត្តនូវវិធានការគោលនយោបាយនានា សំដៅកែលម្អ លើកស្ទួយជីវភាពរស់នៅរបស់ប្រជាជនឲ្យបានកាន់តែប្រសើរឡើងថែមទៀត ។ ជាមួយគ្នានេះ ខ្ញុំសូមអំពាវនាវដល់ប្រជាជនកម្ពុជាទាំងមូល សូមបង្កើនស្មារតីឯកភាពជាតិ និងសាមគ្គីជាតិ ដើម្បីការពារសន្តិភាព ការពាររាល់សមិទ្ធផលដែលយើងបានសម្រេចមកដល់ពេលនេះ និងបន្តអភិវឌ្ឍសង្គមជាតិឲ្យកាន់តែរីកចម្រើ
ន និងខ្លាំងក្លាឡើង សក្តិសមនឹងការប្រសិទ្ធនាមថា «កម្ពុជា ព្រះរាជាណាចក្រអច្ឆរិយៈ» ដែលប្រជាជនលើពិភពលោកចង់ស្គាល់ ចង់មកទស្សនា និងផ្តិតយករូបភាពទាំងឡាយដែលជានិមិត្តរូបនៃអរិយធម៌ដ៏រុងរឿងរបស់ប្រជាជាតិយើង ៕ ដោយ៖បញ្ញាស័ក្តិ
