ខេត្តព្រះសីហនុ៖ កម្លាំងកងរាជអាវុធហត្ថខេត្តខេត្តព្រះសីហនុ កាលពីព្រឹកថ្ងៃទី៦ ខែតុលា ឆ្នាំ២០១៩នេះ បានចុះបង្ក្រាបជនល្មើស លើសំណុំរឿងបង្ខាំងមនុស្សជម្រិតទាប្រាក់ ដោយបានឃាត់ខ្លួនជនសង្ស័យចំនួន៧នាក់។
យុទ្ធនាការខាងលើនេះ ដឹកនាំដោយលោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ដោយមានការសម្របសម្រួលនីតិវិធីច្បាប់ពី លោក ហួត វិចិត្រព្រះរាជអាជ្ញារងសាលាដំបូងខេត្តព្រះសីហនុ បានចុះបង្ក្រាប និងរំដោះជនរងគ្រោះជនជាតិចិនចំនួន១០នាក់ (ជនរងគ្រោះ) ដែលត្រូវបានជនសង្ស័យជនជាតិចិនដូចគ្នា ចាប់ជម្រិតទាប្រាក់ និងធ្វើទារុណកម្មដោយហឹង្សា ស្ថិតនៅក្នុងបុរីមួយកន្លែង មានទីតាំងក្នុងក្រុម១២ ភូមិ៣ សង្កាត់១ ក្រុងព្រះសីហនុ។
ទាក់ទិនបញ្ហានេះ លោក ហេង ប៊ុនទី បានឲ្យដឹងថា យុទ្ធនាការនេះ កម្លាំងកងរាជអាវុធហត្ថខេត្ត បានឃាត់ខ្លួនបានជនសង្ស័យចំនួន៧នាក់ និងដកហូតវត្ថុតាងមួយចំនួន រួមមាន៖ ទូរស័ព្ទ ៦គ្រឿង ខ្នោះដៃចំនួន១០ ខ្នោះជើងចំនួន៤ ស្រោមខ្នោះចំនួន៤
ក្រណាត់រំមុខចំនួន២ កាំបិតបុ័ងតោចំនួន១ កំប៉ុងហ្គាសចំនួន២៥ លិខិតឆ្លងដែនចំនួន១ កិច្ចសន្យាជួលផ្ទះចំនួន១
អត្តសញ្ញាណប័ណ្ណជនជាតិចិនចំនួន១ច្បាប់។
បច្ចុប្បន្នជនរងគ្រោះទាំង១០នាក់ ត្រូវបានបញ្ជូនទៅសង្គ្រោះព្យាបាល នៅមន្ទីរពេទ្យបង្អែកខេត្តព្រះសីហនុ។
ចំណែកឯជនសង្ស័យ និងវត្ថុតាង ត្រូវបានបញ្ជូនទៅកាន់ទីបញ្ជាការកងរាជអាវុធហត្ថខេត្តព្រះសីហនុ ដើម្បីសួរនាំ និងឈានទៅកសាងសំណុំរឿងតាមនីតិវិធីច្បាប់៕ ដោយ៖ ដែន សីមា